ಈಜಿಪುರ ಕಟ್ಟಡ ಕುಸಿತ: 5 ವರ್ಷದ ಸಂಜನಾ ಸಾವು

ಬೆಂಗಳೂರು: ಈಜಿಪುರ ಸರ್ಕಲ್ ಬಳಿಯ ಗುಂಡಪ್ಪ ಲೇಔಟ್‌ನಲ್ಲಿ ಎರಡು ಅಂತಸ್ತಿನ ಕಟ್ಟಡ ಕುಸಿತದ ಅವಶೇಷಗಳಡಿ ಸಿಲುಕಿ ಸಾವು ಬದುಕಿನ ಹೋರಾಟ ನಡೆಸಿದ್ದ ಐದು ವರ್ಷದ ಮಗು ಸಂಜನಾ ಮೃತಪಟ್ಟಿದ್ದಾಳೆ.
ಶೇಕಡ 60ರಷ್ಟು ಸುಟ್ಟ ಗಾಯಗಳಾಗಿದ್ದ ಪುಟ್ಟ ಬಾಲೆ ಸಂಜನಾಗೆ ವಿಕ್ಟೋರಿಯಾ ಆಸ್ಪತ್ರೆಯ ಐಸಿಯುನಲ್ಲಿ ಚಿಕಿತ್ಸೆ ನೀಡಲಾಗಿತ್ತು. ಆದರೆ ಚಿಕಿತ್ಸೆ ಫಲಕಾರಿಯಾಗದೆ ಸಂಜನಾ ಮೃತಪಟ್ಟಿದ್ದಾಳೆ. ಮಗುವಿನ ದೇಹ ಶೇ.60ರಷ್ಟು ಸುಟ್ಟಿದ್ದರಿಂದ ಚಿಕಿತ್ಸೆ ಫಲಕಾರಿಯಾಗದೇ ಅಂಗಾಂಗ ವೈಫಲ್ಯದಿಂದ ಸಂಜೆ 4.45ರ ಸುಮಾರಿಗೆ ಸಂಜನಾ ಕೊನೆಯುಸಿರೆಳೆದಳು ಎಂದು ವೈದ್ಯರಾದ ಡಾ. ರಮೇಶ್‌ ತಿಳಿಸಿದ್ದಾರೆ.

ಗಾಯಾಳುಗಳಾದ ದಿಲೀಪನ್, ಜಾನಕಿ ಚೇತರಿಸಿಕೊಳ್ಳುತ್ತಿದ್ದಾರೆ ಎಂದು ಸುಟ್ಟ ಗಾಯಗಳ ವಿಭಾಗದ ಮುಖ್ಯಸ್ಥ ಡಾ. ರಮೇಶ್ ಹೇಳಿದ್ದಾರೆ.

ಕಟ್ಟಡ ಕುಸಿದು ಗರ್ಭಿಣಿ ಸೇರಿದಂತೆ ಏಳು ಜನ ಮೃತಪಟ್ಟಿದ್ದರು, ಅವಶೇಷಗಳಡಿಯಲ್ಲಿ ಸಿಕ್ಕಿದ್ದ ಐದು ವರ್ಷದ ಸಂಜನಾಳಿಗೆ ಚಿಕಿತ್ಸೆ ಕೊಡಿಸಲಾಗುತ್ತಿತ್ತು. ಈ ಮಗುವಿನ ಪೋಷಕರು ಕೂಡ ದುರಂತದಲ್ಲಿ ಪ್ರಾಣ ಕಳೆದುಕೊಂಡಿದ್ದಾರೆ.

Building collapse: child sanjana Dead