ನಟಿಯರು, ಉದ್ಯಮಿಗಳು ಅರೆಸ್ಟ್ ಆದರೂ ಇನ್ನು ಸಿಕ್ಕಿಲ್ಲ ಆದಿತ್ಯ ಆಳ್ವಾ, ಬೇಟೆ ತೀವ್ರಗೊಳಿಸಿದ ಸಿಸಿಬಿ!

ಬೆಂಗಳೂರು: ಸ್ಯಾಂಡಲ್‌ವುಡ್ ಡ್ರಗ್ಸ್‌ ಮಾಫಿಯಾಗೆ ಸಂಬಂಧಪಟ್ಟಂತೆ ನಟಿಯರಿಂದ ಹಿಡಿದು ಉದ್ಯಮಿಗಳವರೆಗೆ ಕೇಂದ್ರ ಅಪರಾಧ ವಿಭಾಗದ ಪೊಲೀಸರು ಅರೆಸ್ಟ್‌ ಮಾಡಿದರು ಈ ಡ್ರಗ್ಸ್‌ ದಂಧೆಯ ಪ್ರಮುಖ ಆರೋಪಿ ಎಂದೇ ಬಿಂಬಿತವಾಗಿರುವ ಮಾಜಿ ಸಚಿವ ಜೀವರಾಜ್‌ ಆಳ್ವಾ ಅವರ ಪುತ್ರ ಆದಿತ್ಯ ಆಳ್ವಾ ಇನ್ನು ಪೊಲೀಸರಿಗೆ ಸಿಕ್ಕಿಲ್ಲ.

ಹೀಗಾಗಿ ಆತನ ಹುಡುಕಾಟವನ್ನು ಸಿಸಿಬಿ ತೀವ್ರಗೊಳಿಸಿದೆ. ಕೇಸ್‌ ಬಳಿಕ ಪರಾರಿಯಾಗಿರುವ ಪ್ರಧಾನ ಆರೋಪಿಗಳಾಗಿರುವ ಶಿವಪ್ರಕಾಶ್ ಚುಪ್ಪಿ, ಆದಿತ್ಯ ಆಳ್ವಾ ಹಾಗೂ ಶೇಖ್‌ ಫೈಜಲ್‌ಗಾಗಿ ಸಿಸಿಬಿ ಪೊಲೀಸರು ತೀವ್ರ ಶೋಧ ನಡೆಸುತ್ತಿದ್ದಾರೆ. ಸದ್ಯ ಸ್ಯಾಂಡಲ್‌ವುಡ್‌ ನಟಿಯರಾದ ರಾಗಿಣಿ ದ್ವಿವೇದಿ ಹಾಗೂ ಸಂಜನಾ ಗಲ್ರಾನಿ ಸೇರಿ ಈ ಕೇಸ್‌ಗೆ ಸಂಬಂಧಪಟ್ಟಂತೆ ಒಟ್ಟು 12 ಮಂದಿಯನ್ನು ಸಿಸಿಬಿ ಅರೆಸ್ಟ್‌ ಮಾಡಿದೆ. ಇವರೆಲ್ಲ ನ್ಯಾಯಾಂಗ ಬಂಧನದಲ್ಲಿದ್ದಾರೆ.

50 ಲಕ್ಷ ಬೆಲೆಬಾಳುವ ಗಾಂಜಾ ವಶ!
ಸ್ಯಾಂಡಲ್‌ವುಡ್‌ ಡ್ರಗ್ಸ್‌ ಪ್ರಕರಣ ಬೆಳಕಿಗೆ ಬಂದ ಬಳಿಕ ರಾಜ್ಯದ ಹಲವೆಡೆ ಡ್ರಗ್ಸ್, ಗಾಂಜಾ ಹಲವು ಮಾದಕ ವಸ್ತುಗಳು ಹಾಗೂ ಆರೋಪಿಗಳನ್ನು ಪೊಲೀಸರು ಖೆಡ್ಡಾಗೆ ಕೆಡವುತ್ತಿದ್ದಾರೆ. ಇದೀಗ ಸಿಸಿಬಿ ಪೊಲೀಸರು 50 ಲಕ್ಷ ಮೌಲ್ಯದ ಸುಮಾರು 90 ಕೆಜಿಯಷ್ಟು ಗಾಂಜಾವನ್ನು ವಶಪಡಿಸಿಕೊಂಡಿದ್ದಾರೆ.

ಡ್ರಿಂಕ್‌ & ಡ್ರೈವ್‌: ದ್ವಿಚಕ್ರ ವಾಹನ ಸವಾರನ ಸಾವು; 14 ದಿನ ನ್ಯಾಯಾಂಗ ಬಂಧನಕ್ಕೆ ಕಾರು ಚಾಲಕ

ಬೆಂಗಳೂರಿನ ದೊಡ್ಡಬಾನಹಳ್ಳಿಯ ಫ್ಲಾಟ್‌ವೊಂದರಲ್ಲಿ ಇಷ್ಟು ಮೊತ್ತದ ಗಾಂಜಾವನ್ನು ಅಡಗಿಸಿಡಲಾಗಿತ್ತು. ಖಚಿತ ಮಾಹಿತಿ ಮೇರೆಗೆ ದಾಳಿ ನಡೆಸಿದ ಸಿಸಿಬಿ ಪೊಲೀಸರು ಮೂವರು ಆರೋಪಿಗಳನ್ನು ಬಂಧಿಸಿದ್ದಾರೆ. ಬಂಧಿತರನ್ನು ಅಜಾಂ ಪಾಷಾ, ಮೊಹಮ್ಮದ್‌ ಅಬ್ಬಾಸ್‌, ಮಸ್ತಾನ್‌ ವಾಲಿ ಎಂದು ತಿಳಿದುಬಂದಿದೆ. ಇನ್ನು ಇವರು ಆಂಧ್ರಪ್ರದೇಶದಿಂದ ಗಾಂಜಾವನ್ನು ಖರೀದಿಸಿರುವುದು ತನಿಖೆ ವೇಳೆ ಬೆಳಕಿಗೆ ಬಂದಿದೆ.