ಹಾಡ ಹಗಲೇ ಸರಗಳ್ಳತನ

ಬೆಂಗಳೂರು: ಮಟಮಟ ಮಧ್ಯಾಹ್ನದ ವೇಳೆಯೇ ಮಗನನ್ನು ಶಾಲೆಯಿಂದ ಮನೆಗೆ ಕರೆದುಕೊಂಡು ಹೋಗುತ್ತಿದ್ದ ಮಹಿಳೆಯೊಬ್ಬರ ಕೊರಳಿನಲ್ಲಿದ್ದ ಸರ ಕಿತ್ತುಕೊಂಡು ಪರಾರಿ ಆಗಿರುವ ಘಟನೆ ರಾಮಮೂರ್ತಿನಗರ ಠಾಣೆ ವ್ಯಾಪ್ತಿಯ ಹೊಯ್ಸಳನಗರದಲ್ಲಿ ಮಂಗಳವಾರ ನಡೆದಿದೆ.

ಹೊಯ್ಸಳ ನಗರದ ನಿವಾಸಿ ಮಂಜುಳಾ ಸರ ಕಳೆದುಕೊಂಡವರು. ಮಧ್ಯಾಹ್ನ 3 ಗಂಟೆ ವೇಳೆಯಲ್ಲಿ ಘಟನೆ ನಡೆದಿದ್ದು, ಬೈಕಿನಲ್ಲಿ ಬಂದ ಇಬ್ಬರು ದುಷ್ಕರ್ಮಿಗಳು 72 ಗ್ರಾಂ ತೂಕದ ಸರ ಕಿತ್ತು ಪರಾರಿ ಆಗಿದ್ದಾರೆ.

ಮಂಜುಳಾ ಅವರ ಮಗನ ಸ್ಕೂಲ್‌ ಬಸ್‌ 2.45ರ ಸುಮಾರಿಗೆ ಬಂದಿತ್ತು. ಬಸ್‌ಸ್ಟಾಪ್‌ನಿಂದ ಅವರು ಮಗನನ್ನು ಮನೆಗೆ ಕರೆದುಕೊಂಡು ಹೋಗುತ್ತಿದ್ದಾಗ ಹಿಂದಿನಿಂದ ಬಂದ ದುಷ್ಕರ್ಮಿಗಳು ಮೊದಲಿಗೆ ಮಂಜುಳಾ ಅವರ ಮುಂದೆಯೇ ಹಾದು ಹೋಗಿದ್ದರು. ಸ್ವಲ್ಪ ದೂರ ಹೋಗಿ ರಸ್ತೆ ನಿರ್ಜನವಾಗಿದೆ ಎಂದು ಖಚಿತವಾಗುತ್ತಿದ್ದಂತೆ ಯು-ಟರ್ನ್‌ ಮಾಡಿಕೊಂಡು ಬಂದು ಸರ ಎರಗಿಸಿದ್ದಾರೆ.

ಮಂಜುಳಾ ಅವರು ಸಹಾಯಕ್ಕಾಗಿ ಕೂಗಿಕೊಂಡರಾದರೂ, ಸ್ಥಳೀಯರು ಮನೆಯಿಂದ ಹೊರಗೆ ಬರುವಷ್ಟರಲ್ಲಿ ದುಷ್ಕರ್ಮಿಗಳು ಸ್ಥಳದಿಂದ ಪರಾರಿ ಆಗಿದ್ದರು.