Chamarajpet Election Results 2023: ಚಾಮರಾಜಪೇಟೆಯಲ್ಲಿ ಜಮೀರ್ ಅಹ್ಮದ್‌ಗೆ ಭರ್ಜರಿ ಗೆಲುವು

ಬೆಂಗಳೂರು: ಚಾಮರಾಜಪೇಟೆ ವಿಧಾನಸಭೆ ಕ್ಷೇತ್ರದಲ್ಲಿ ಕಾಂಗ್ರೆಸ್ ಅಭ್ಯರ್ಥಿ ಜಮೀರ್ ಅಹ್ಮದ್ ಖಾನ್ ಮತ್ತೊಮ್ಮೆ ತಮ್ಮ ಕಮಾಲ್ ಮಾಡಿದ್ದಾರೆ. ಬುಧವಾರ ನಡೆದ ಚುನಾವಣೆಯ ಮತಗಳ ಎಣಿಕೆ ಶನಿವಾರ ನಡೆಯುತ್ತಿದ್ದು, ಆರಂಭಿಕ ಸುತ್ತುಗಳಿಂದಲೇ ಜಮೀರ್ ಅಹ್ಮದ್ ಭಾರಿ ಮುನ್ನಡೆ ಸಾಧಿಸುವ ಮೂಲಕ ಗೆಲುವಿನ ನಗೆ ಬೀರಿದ್ದಾರೆ. ಚುನಾವಣಾ ಆಯೋಗದ ಬೆಳಗ್ಗಿನ 11.30ರ ಮಾಹಿತಿ ಪ್ರಕಾರ ಜಮೀರ್ ಅಹ್ಮದ್ ಖಾನ್ ಅವರಿಗೆ 58,756 ಮತಗಳು ದೊರಕಿವೆ. ಜೆಡಿಎಸ್‌ನ ಸಿ ಗೋವಿಂದರಾಜು 10,675 ಮತಗಳನ್ನು ಪಡೆದಿದ್ದಾರೆ. ಬಿಜೆಪಿಯ ಭಾಸ್ಕರ್ ರಾವ್ 9,181 ಮತಗಳನ್ನು ಪಡೆದಿದ್ದಾರೆ. ಎಎಪಿಯ ಜಗದೀಶ್ ಚಂದ್ರ ಸಿ ಅವರು 459 ಮತಗಳನ್ನು ಪಡೆದಿದ್ದಾರೆ. 660 ಮತಗಳು ನೋಟಾಕ್ಕೆ ಚಲಾವಣೆ ಆಗಿವೆ.

ಜಮೀರ್ ಅಹ್ಮದ್ ಅವರು 42,802 ಮತಗಳನ್ನು ಪಡೆದಿದ್ದರೆ, ಜೆಡಿಎಸ್‌ನ ಸಿ ಗೋವಿಂದರಾಜು ಅವರು 8378 ಮತಗಳೊಂದಿಗೆ ಎರಡನೇ ಸ್ಥಾನದಲ್ಲಿದ್ದಾರೆ. ಭಾಸ್ಕರ್ ರಾವ್ 6571 ಮತಗಳೊಂದಿಗೆ ಮೂರನೇ ಸ್ಥಾನದಲ್ಲಿದ್ದಾರೆ. ಜಮೀರ್ ಅಹ್ಮದ್ ಅವರ ಶೇಕಡಾವಾರು ಮತಗಳ ಪ್ರಮಾಣ ಶೇ 71ಕ್ಕೆ ಇಳಿಕೆಯಾಗಿದೆ.

ಮೊದಲ ಹಂತ
ಜಮೀರ್ ಅಹ್ಮದ್ ಖಾನ್ ಅವರು 24,633 ಮತಗಳನ್ನು ಪಡೆದಿದ್ದು, ಅವರ ಸಮೀಪದ ಎದುರಾಳಿಯಾಗಿರುವ ಬಿಜೆಪಿ ಅಭ್ಯರ್ಥಿ ಭಾಸ್ಕರ್ ರಾವ್ ಅವರು ಕೇವಲ 3,890 ಮತಗಳನ್ನು ಪಡೆದಿದ್ದಾರೆ. ಇನ್ನು ಜೆಡಿಎಸ್‌ನ ಸಿ ಗೋವಿಂದರಾಜು ಅವರು 3235 ಮತಗಳನ್ನು ಪಡೆದಿದ್ದಾರೆ. ಬೆಳಿಗ್ಗೆ 10 ಗಂಟೆಯವರೆಗೂ ನಡೆದ ಮತ ಎಣಿಕೆಯಲ್ಲಿ ದಾಖಲಾದ ಒಟ್ಟು ಮತಗಳಲ್ಲಿ ಶೇ 75ರಷ್ಟು ಮತಗಳನ್ನು ಜಮೀರ್ ಅಹ್ಮದ್ ಪಡೆದುಕೊಂಡಿದ್ದಾರೆ.