ವಂಚಕ ಕಂಪನಿಯ ಐದು ಮಂದಿ ಸೆರೆ

ಬೆಂಗಳೂರು: ಅಧಿಕ ಲಾಭಾಂಶ ಅಥವಾ ಬಡ್ಡಿ ಕೊಡುವುದಾಗಿ ಸಾರ್ವಜನಿಕರಿಂದ ಹಣ ಹೂಡಿಕೆ ಮಾಡಿಸಿಕೊಂಡು ವಂಚಿಸುವ ಕಂಪನಿಗಳ ವಿರುದ್ಧ ತೀವ್ರ ಸ್ವರೂಪದ ಕಾರ್ಯಾಚರಣೆ ಆರಂಭಿಸಿರುವ ಸಿಸಿಬಿ ಪೊಲೀಸರು ಜಯನಗರ ಎಐಎಂಎಂಎಸ್‌ ವೆಂಚರ್ಸ್‌ ಕಂಪನಿಯ ಐದು ಮಂದಿಯನ್ನು ಬಂಧಿಸಿದ್ದಾರೆ.

ಜಯನಗರದ 9ನೇ ಬ್ಲಾಕ್‌ನಲ್ಲಿ ಕಚೇರಿ ಹೊಂದಿರುವ ಈ ವೆಂಚರ್ಸ್‌ ಕಂಪನಿಯಲ್ಲಿ ವಹಿವಾಟಿನಲ್ಲಿ ಪ್ರಮುಖ ಪಾತ್ರ ವಹಿಸಿದ್ದ ಅಯೂಬ್‌ ಅಲಿ ಖಾನ್‌ (41), ಇಲಿಯಸ್‌ ಫಾಷಾ (40), ಮೊಹಮದ್‌ ಮುಜಾಹಿದ್ದೀನ್‌ (41), ಮುದಾಸಿರ್‌ ಪಾಷಾ (35) ಹಾಗೂ ಮೊಹಮದ್‌ ಶಾಹೀದ್‌ (35) ಬಂಧಿತ ಆರೋಪಿಗಳು. ಇವರಿಂದ ಹಲವು ದಾಖಲೆಗಳನ್ನು ವಶಕ್ಕೆ ಪಡೆಯಲಾಗಿದೆ.

50 ಸಾವಿರದಿಂದ 20 ಲಕ್ಷದವರೆಗೂ ಸಾರ್ವಜನಿಕರಿಂದ ಹಣ ಹೂಡಿಕೆ ಮಾಡಿಸಿಕೊಂಡಿದ್ದ ಕಂಪನಿ ಆರಂಭದ ಕೆಲವು ತಿಂಗಳು ಮಾತ್ರ ಶೇ 3ರಿಂದ 5 ಪ್ರಮಾಣದಲ್ಲಿ ಲಾಭಾಂಶ ನೀಡಿತ್ತು. ಆ ನಂತರ ಅಸಲು ಬಡ್ಡಿ ಕೊಡುವುದನ್ನು ನಿಲ್ಲಿಸಿಬಿಟ್ಟಿತ್ತು. ಇವರ ಮಾತು ನಂಬಿ ಸುಮಾರು 500 ಮಂದಿ ಹಣ ಹೂಡಿಕೆ ಮಾಡಿದ್ದರು. ಕಂಪನಿಯು ಒಟ್ಟು 65 ಕೋಟಿ ರೂ. ವಂಚಿಸಿದೆ ಎಂದು ಅಂದಾಜಿಸಲಾಗಿದೆ.