ಬಾಲಭವನದ ಪುಟಾಣಿ ರೈಲು ಕಾರ್ಯಾರಂಭ ಶೀಘ್ರ

ಬೆಂಗಳೂರು: ದುರಸ್ತಿ ಹಿನ್ನೆಲೆಯಲ್ಲಿ ಸ್ಥಗಿತಗೊಂಡಿದ್ದ ಬಾಲಭವನದ ಪುಟಾಣಿ ರೈಲು ಒಂದು ಅಥವಾ ಎರಡು ವಾರದ ನಂತರ ಮತ್ತೆ ಕಾರ್ಯಾಚರಿಸಲಿದೆ.

ರೈಲಿನ ಹಳಿಗಳು ತುಕ್ಕು ಹಿಡಿದಿದ್ದು ಹತ್ತು ವರ್ಷಕ್ಕೆ ಒಂದು ಬಾರಿ ಇಲ್ಲವೇ ಎರಡು ಬಾರಿ ರೈಲು ಹಳಿಗಳ ದುರಸ್ತಿ ಕಾರ್ಯ ಕೈಗೊಳ್ಳಲಾಗುತ್ತದೆ. ಅದರಂತೆ ಆರೇಳು ವರ್ಷಗಳ ನಂತರ ಇದೀಗ ದುರಸ್ತಿ ಕಾರ್ಯ ಕೈಗೊಳ್ಳಲಾಗಿದೆ.

ಬಾಲಭವನದ ಅಧಿಧಿಧಿಕಾರಿಗಳ ಕೋರಿಕೆ ಮೇರೆಗೆ ನೈಋುತ್ಯ ರೈಲ್ವೆ ವಲಯವು ರೈಲು ಹಳಿಯ ದುರಸ್ತಿ ಕಾರ್ಯವನ್ನು ಕೈಗೆತ್ತಿಕೊಂಡಿದೆ. ಜ.28ರಿಂದ ಕಾಮಗಾರಿ ಆರಂಭವಾಗಿದೆ. ಇದೀಗ ಶೇ.90ರಷ್ಟು ಕಾಮಗಾರಿ ಮುಗಿದಿದೆ. ಸಣ್ಣ ಪುಟ್ಟ ತಾಂತ್ರಿಕ ಪರೀಕ್ಷೆಗಳು ನಡೆಯುತ್ತಿವೆ. ರೈಲು ಇಲಾಖೆಯಿಂದ ಸಂಚಾರಕ್ಕೆ ಹಸಿರು ನಿಶಾನೆ ಸಿಕ್ಕಿದ ಕೂಡಲೇ ಕಾರ್ಯಾರಂಭ ಮಾಡಲಾಗುವುದು ಎನ್ನುತ್ತಾರೆ ಅಧಿಕಾರಿಗಳು.

ಕೆಲ ಶಾಲಾ ಮಕ್ಕಳಿಗೆ ಒಂದೆರಡು ದಿನದಲ್ಲಿ ಬೇಸಿಗೆ ರಜೆ ಆರಂಭವಾಗಲಿದೆ. ಜತೆಗೆ ಬೇಸಿಗೆ ಶಿಬಿರಗಳನ್ನು ಆಯೋಜಿಸಬೇಕಿದೆ. ಹೀಗಾಗಿ ತುರ್ತಾಗಿ ದುರಸ್ತಿ ಮುಗಿಸಬೇಕಿದೆ ಎಂದು ರೈಲ್ವೆ ಇಲಾಖೆಗೂ ಮನವರಿಕೆ ಮಾಡಲಾಗಿದೆ ಎಂದು ಬಾಲಭವನದ ಅಧಿಕಾರಿಗಳು ತಿಳಿಸಿದರು.