ನಗರದಲ್ಲಿ 31 ಡಿಗ್ರಿಗೆ ಏರಿದ ತಾಪಮಾನ

ಬೆಂಗಳೂರು: ನಗರದಲ್ಲಿ ಮಳೆ ಕಡಿಮೆಯಾಗಿರುವುದರಿಂದ ಸೆಕೆ ಆರಂಭವಾಗಿದ್ದು, ಗರಿಷ್ಠ ತಾಪಮಾನವು 31 ಡಿಗ್ರಿ ಸೆಲ್ಸಿಯಸ್‌ಗೆ ಮುಟ್ಟಿದೆ.

ಸೆಪ್ಟೆಂಬರ್‌ನಲ್ಲಿ ಮಳೆ ಮಾಯವಾಗಿರುವುದರಿಂದ ಸೆಕೆ ಹೆಚ್ಚತೊಡಗಿದೆ. ಕೆಲ ದಿನಗಳವರೆಗೆ ಮಳೆ ಇಲ್ಲದಿರುವಾಗಲೂ ಸೆಕೆ ಕಂಡುಬಂದಿರಲಿಲ್ಲ. ಆದರೆ ಎರಡು ದಿನಗಳಿಂದ ಬಿಸಿಲ ಧಗೆ ಏರತೊಡಗಿದೆ. ಇದರ ಪರಿಣಾಮವಾಗಿ ಮಂಗಳವಾರ ಗರಿಷ್ಠ ತಾಪಮಾನ 31.2 ಡಿಗ್ರಿ ಸೆಲ್ಸಿಯಸ್‌ಗೆ ತಲುಪಿದೆ. ಈ ತಿಂಗಳ ಆರಂಭದಿಂದಲೂ ಗರಿಷ್ಠ ತಾಪಮಾನ 28 ರಿಂದ 29 ಡಿಗ್ರಿ ಸೆಲ್ಸಿಯಸ್‌ ಮಾತ್ರ ಇತ್ತು. ಈಗ ಒಂದೇ ಬಾರಿಗೆ ತಾಪಮಾನ ಹೆಚ್ಚಿ ಸೆಕೆಯ ಕಿರಿಕಿರಿ ಶುರುವಾಗಿದೆ.

ಜೂನ್‌ 1 ರಿಂದ ಇಲ್ಲಿಯವರೆಗೆ ನಗರದ ಕೇಂದ್ರಭಾಗದಲ್ಲಿ 334 ಮಿ.ಮೀ. ಮಳೆ ಸುರಿದಿದೆ. ಜಿಲ್ಲೆಯಲ್ಲಿ ಒಟ್ಟಾರೆಯಾಗಿ ಈ ಅವಧಿಯಲ್ಲಿ 343.9 ಮಿ.ಮೀ. ವಾಡಿಕೆ ಮಳೆಯಾಗುತ್ತದೆ. ಈ ವರ್ಷ 232.1 ಮಿ.ಮೀ. ಮಳೆ ಸುರಿದಿದ್ದು, ಶೇ.33 ರಷ್ಟು ಮಳೆ ಕೊರತೆ ಉಂಟಾಗಿದೆ. ಜೂನ್‌, ಜುಲೈ ಹಾಗೂ ಆಗಸ್ಟ್‌ನಲ್ಲಿ ಮಳೆ ಕಡಿಮೆಯಾಗಿದ್ದು, ಸೆಪ್ಟೆಂಬರ್‌ನಲ್ಲಿ ಮಳೆ ಜೋರಾಗಬಹುದು ಎಂದು ನಿರೀಕ್ಷಿಸಲಾಗಿತ್ತು. ಆದರೆ ಈ ಬಾರಿ ಮಳೆಯೇ ಇಲ್ಲವಾಗಿ ಸೆಕೆ ಆರಂಭವಾಗಿದೆ. ಇದಕ್ಕಿಂತ ಹಿಂದಿನ ವರ್ಷಗಳಲ್ಲೂ ಈ ತಿಂಗಳಲ್ಲಿ ಗರಿಷ್ಠ ತಾಪಮಾನ 31, 32 ಡಿಗ್ರಿ ಸೆಲ್ಸಿಯಸ್‌ ಇತ್ತು. 2017 ರ ಸೆ.15 ರಂದು 31.1 ಡಿಗ್ರಿ ಸೆಲ್ಸಿಯಸ್‌, 2016 ರ ಸೆ.20 ರಂದು 30.6 ಡಿಗ್ರಿ ಸೆಲ್ಸಿಯಸ್‌, 2015 ರ ಸೆ.25 ರಂದು 33.2 ಡಿಗ್ರಿ ಸೆಲ್ಸಿಯಸ್‌, 2014 ರ ಸೆ.24 ರಂದು 31.1 ಡಿಗ್ರಿ ಸೆಲ್ಸಿಯಸ್‌, 2013 ರ ಸೆ.3 ರಂದು 31.4 ಡಿಗ್ರಿ ಸೆಲ್ಸಿಯಸ್‌ ಗರಿಷ್ಠ ತಾಪಮಾನ ದಾಖಲಾಗಿತ್ತು. 1951 ರಲ್ಲಿ 33.6 ಡಿಗ್ರಿ ಸೆಲ್ಸಿಯಸ್‌ಗೆ ಗರಿಷ್ಠ ತಾಪಮಾನ ತಲುಪಿದ್ದು, ಈ ತಿಂಗಳ ಸಾರ್ವಕಾಲಿಕ ದಾಖಲೆಯಾಗಿದೆ.

ದಕ್ಷಿಣ ಒಳನಾಡಿನಲ್ಲಿ ನೈಋುತ್ಯ ಮುಂಗಾರು ಇನ್ನೂ ಚುರುಕಾಗಿರುವುದರಿಂದ ಎರಡು ದಿನಗಳವರೆಗೆ ಮೋಡ ಕವಿದ ವಾತಾವರಣ ಹಾಗೂ ತುಂತುರು ಮಳೆಯಾಗುವ ಸಾಧ್ಯತೆ ಇದೆ ಎಂದು ಹವಾಮಾನ ಇಲಾಖೆ ತಿಳಿಸಿದೆ.