ನಗರದಲ್ಲಿ ಮತ್ತೆ ಚಳಿ

ಬೆಂಗಳೂರು : ನಗರದಲ್ಲಿ ಸೋಮವಾರ ಬೆಳಗ್ಗೆ ದಿಢೀರನೆ ಚಳಿ ಕಾಣಿಸಿಕೊಂಡಿತು. ತಾಪಮಾನ ಹೆಚ್ಚಿನ ಪ್ರಮಾಣದಲ್ಲಿ ಇಳಿಕೆಯಾಗದಿದ್ದರೂ ಚಳಿ ಮಾತ್ರ ತುಸು ಇತ್ತು. ಚಳಿ ಹೋಯಿತು ಎಂದು ಕೊಂಡು ಮನೆಯಿಂದ ಬೆಚ್ಚನೆ ಉಡುಪು ಇಲ್ಲದೆ ಹೊರಗೆ ಬಂದವರು ಗಡ ಗಡ ನಡುಗಿದರು.

ಕನಿಷ್ಠ ತಾಪಮಾನ 15-16 ಡಿಗ್ರಿ ಸೆಲ್ಸಿಯಸ್‌ನಲ್ಲಿ ಮುಂದುವರಿದಿದೆ. ಜನವರಿ ಅಂತ್ಯದಲ್ಲಿ ಕನಿಷ್ಠ ತಾಪಮಾನ 18-19 ಡಿಗ್ರಿ ಆಸುಪಾಸಿನಲ್ಲಿತ್ತು. ನಂತರ ತಾಪಮಾನ 15 ಡಿಗ್ರಿಗೆ ಇಳಿದಿತ್ತು.

ಉತ್ತರ ಕರ್ನಾಟಕ ಭಾಗದಿಂದ ಶೀತಮಾರುತ ಬೀಸುವುದು ನಿಂತಿದ್ದು, ಪೂರ್ವ-ಪಶ್ಚಿಮ ಭಾಗದಿಂದ ಗಾಳಿ ಬೀಸುತ್ತಿದೆ. ಹೀಗಾಗಿ ಸ್ವಲ್ಪಮಟ್ಟಿಗೆ ಮಾತ್ರ ಚಳಿ ಇದೆ. ಇನ್ನೆರಡು ದಿನಗಳಲ್ಲಿ ತಾಪಮಾನ 17-18 ಡಿಗ್ರಿ ತಲುಪುವ ಸಾಧ್ಯತೆ ಇದೆ ಎಂದು ಹವಾಮಾನ ಇಲಾಖೆ ತಿಳಿಸಿದೆ.

ನಗರದ ಕೇಂದ್ರಭಾಗದಲ್ಲಿ ಫೆ.1 ರಂದು 15.7 ಡಿಗ್ರಿ, ಫೆ.2 ರಂದು 16.3 ಡಿಗ್ರಿ, ಫೆ.3 ರಂದು 16 ಡಿಗ್ರಿ ಹಾಗೂ ಫೆ.4 ರಂದು 16.8 ಡಿಗ್ರಿ ಸೆಲ್ಸಿಯಸ್‌ ಕನಿಷ್ಠ ತಾಪಮಾನ ದಾಖಲಾಗಿದೆ. ತಾಪಮಾನದಲ್ಲಿ ಸ್ವಲ್ಪಮಟ್ಟಿಗೆ ಏರಿಳಿತ ಕಂಡುಬಂದಿದೆ. ಇನ್ನು ಮುಂದೆ ತಾಪಮಾನ ಮೇಲಕ್ಕೆ ಏರುವ ಮುನ್ಸೂಚನೆಯನ್ನು ಹವಾಮಾನ ಇಲಾಖೆ ನೀಡಿದೆ.

ವಿಮಾನ ನಿಲ್ದಾಣದಲ್ಲಿ ಚಳಿ

ನಗರದ ಕೇಂದ್ರಭಾಗಗಳಿಗೆ ಹೋಲಿಸಿದರೆ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಯಾವಾಗಲೂ ತಾಪಮಾನ ಕೆಳಕ್ಕಿಳಿದಿರುತ್ತದೆ. ಸೋಮವಾರ ನಿಲ್ದಾಣದಲ್ಲಿ 15.4 ಡಿಗ್ರಿ ಸೆಲ್ಸಿಯಸ್‌ ತಾಪಮಾನ ದಾಖಲಾಗಿದೆ.