ಮತ್ತೆ ಮುಂದುವರಿಯಿತು ಮೆಟ್ರೊ ಬಾಗಿಲು ಗೊಂದಲ

- ಪುರುಷ ಪ್ರಯಾಣಿಕರನ್ನು ಸಂಭಾಳಿಸಲು ಹೆಣಗಾಟ-

Vijaya Karnataka Web

ಬೆಂಗಳೂರು: ಮೆಟ್ರೊದ ಆರು ಬೋಗಿ ರೈಲಿನಲ್ಲಿ ‘ಬಾಗಿಲು ಗೊಂದಲ’ದಿಂದಾಗಿ ಮಹಿಳಾ ಮೀಸಲಿನ ನಿರ್ವಹಣೆ ಕಷ್ಟವಾಗಿದೆ. ಸೋಮವಾರ ಕಾರ್ಯಾಚರಣೆಗೊಂಡ ಹೊಸ ರೈಲು ಪ್ರಯಾಣಿಕರಿಂದ ತುಂಬಿ ತುಳುಕಿದಾಗ ಮಹಿಳಾ ಮೀಸಲು ಕಾಯ್ದುಕೊಳ್ಳುವುದೇ ಸಿಬ್ಬಂದಿಗೆ ತಲೆ ನೋವಾಗಿ ಪರಿಣಮಿಸಿತು.

ಸೋಮವಾರ ಬೆಳಗ್ಗೆ 7.24 ಕ್ಕೆ ಬೈಯ್ಯಪ್ಪನಹಳ್ಳಿ ನಿಲ್ದಾಣದಿಂದ ಕಾರ್ಯಾಚರಣೆಗೊಂಡ ರೈಲು, ಮೆಜೆಸ್ಟಿಕ್‌ ದಾಟಿ ವಿಜಯನಗರ ನಿಲ್ದಾಣ ತಲುಪಿತು. ಅಲ್ಲಿಂದ ಮತ್ತೆ ಬೈಯ್ಯಪ್ಪನಹಳ್ಳಿವರೆಗೆ ಕಾರ್ಯಾಚರಣೆ ನಡೆಸಲಾಯಿತು. ಸಂಜೆ 5 ಗಂಟೆ ನಂತರ ಬೈಯ್ಯಪ್ಪನಹಳ್ಳಿಯಿಂದ ಮೈಸೂರು ರಸ್ತೆ ನಿಲ್ದಾಣವರೆಗೆ ಪೂರ್ಣ ಮಾರ್ಗದಲ್ಲಿ ಸಂಚಾರ ನಡೆಯಿತು. ಕಚೇರಿಗೆ ಹೋಗುವ ಹಾಗೂ ಕಚೇರಿಯಿಂದ ಮನೆಗೆ ಮರಳುವ ಪೀಕ್‌ ಅವಧಿಯಲ್ಲಿ ರೈಲು ಬಳಕೆಯಾಯಿತು. ಆರು ಬೋಗಿಗಳಲ್ಲೂ ಪ್ರಯಾಣಿಕರು ತುಂಬಿ ತುಳುಕಿದಾಗ ಮಹಿಳಾ ಮೀಸಲು ವ್ಯವಸ್ಥೆಯನ್ನು ನಿರ್ವಹಿಸುವುದು ಸಿಬ್ಬಂದಿಗೆ ಕಷ್ಟವಾಯಿತು.

ಬಾಗಿಲು ಗೊಂದಲ!

ಒಂದು ಬೋಗಿಯಲ್ಲಿ ನಾಲ್ಕು ಬಾಗಿಲುಗಳಿವೆ. ಸಿಬ್ಬಂದಿಗೆ ತರಬೇತಿ ನೀಡುವ ಉದ್ದೇಶದಿಂದ ಫೆಬ್ರವರಿಯಿಂದ ಮೂರು ಬೋಗಿಯ ರೈಲಿನ ಮೊದಲೆರಡು ಬಾಗಿಲುಗಳಲ್ಲಿ ಮಹಿಳೆಯರು ಮಾತ್ರ ಪ್ರವೇಶಿಸುವ ವ್ಯವಸ್ಥೆ ತರಲಾಗಿದೆ. ಈ ವ್ಯವಸ್ಥೆಯನ್ನು ಈಗಲೂ ಮುಂದುವರಿಸಲಾಗಿದೆ. ಆರು ಬೋಗಿಯ ಹೊಸ ರೈಲಿನಲ್ಲಿ ಒಂದಿಡೀ ಬೋಗಿಯನ್ನು ಮಹಿಳೆಯರಿಗೆ ಮೀಸಲಿಡಲಾಗಿದೆ. ಅಂದರೆ, ಮೊದಲ ಬೋಗಿಯ ನಾಲ್ಕೂ ಬಾಗಿಲುಗಳಿಂದ ಮಹಿಳೆಯರೇ ಪ್ರವೇಶಿಸಬೇಕು.

ಪೀಕ್‌ ಅವಧಿಯಲ್ಲಿ 4 ರಿಂದ 5 ನಿಮಿಷಕ್ಕೊಂದರಂತೆ ರೈಲುಗಳ ಸಂಚಾರ ನಡೆಯುತ್ತಿದೆ. ಈ ಸಮಯದಲ್ಲಿ ಆರು ಬೋಗಿಯ ರೈಲು ಯಾವಾಗ ಬರುತ್ತದೆ, ಮೂರು ಬೋಗಿಯ ರೈಲು ಯಾವಾಗ ಬರುತ್ತದೆ ಎಂಬುದು ಪ್ರಯಾಣಿಕರಿಗೆ ತಿಳಿದಿಲ್ಲ. ಪ್ಲಾಟ್‌ಫಾರಂನಲ್ಲಿರುವ ಸಿಬ್ಬಂದಿಗೂ ಈ ಬಗ್ಗೆ ತಿಳಿಯುವುದಿಲ್ಲ. ಮೂರು ಬೋಗಿಯ ರೈಲು ಬಂದಾಗ ಪುರುಷ ಪ್ರಯಾಣಿಕರು ಮೊದಲ ಬೋಗಿಯ 3 ಮತ್ತು 4 ನೇ ಬಾಗಿಲಿನಿಂದ ಪ್ರವೇಶಿಸಲು ಅವಕಾಶವಿದೆ. ಅದೇ, ಆರು ಬೋಗಿಯ ರೈಲು ಬಂದಾಗ ಮೊದಲ ಬೋಗಿಯ ಯಾವುದೇ ಬಾಗಿಲಿನಿಂದ ಪ್ರವೇಶಿಸುವಂತಿಲ್ಲ. ಇದು ಭಾರಿ ಗೊಂದಲಕ್ಕೆ ಎಡೆಮಾಡಿಕೊಟ್ಟಿದೆ.

ಆರು ಬೋಗಿ ರೈಲು ಬಂದಾಗ ನಿತ್ಯ ಪ್ರಯಾಣಿಸುವ ಪುರುಷ ಪ್ರಯಾಣಿಕರು ಮೊದಲ ಬೋಗಿಯ 3 ನೇ ಬಾಗಿಲಿನಿಂದ ಪ್ರವೇಶಿಸುತ್ತಿದ್ದಾರೆ. ಆದರೆ ಇಲ್ಲಿ ಪ್ರವೇಶವಿಲ್ಲ ಎಂದು ಕೂಗಿ ಹೇಳಿ ಸಿಬ್ಬಂದಿಗೆ ಸಾಕುಸಾಕಾಗಿದೆ. ಮೂರು ಬೋಗಿಯ ರೈಲಿನ ಎರಡು ಪ್ರವೇಶದ್ವಾರದ ಮೀಸಲು ವ್ಯವಸ್ಥೆಗೆ ಒಗ್ಗಿಹೋಗಿರುವ ಪ್ರಯಾಣಿಕರು, ಹೊಸ ವ್ಯವಸ್ಥೆಗೆ ಹೊಂದಿಕೊಳ್ಳಲು ಸ್ವಲ್ಪ ಸಮಯ ಬೇಕಾಗಬಹುದು ಎಂದು ಸಿಬ್ಬಂದಿ ಅಭಿಪ್ರಾಯಪಟ್ಟಿದ್ದಾರೆ.

ಸೂಚನಾ ಫಲಕವಿಲ್ಲ

ಆರು ಬೋಗಿ ರೈಲಿನ ಮೊದಲ ಬೋಗಿಯ ಹೊರಗೆ ಸೂಚನಾ ಫಲಕ ಅಂಟಿಸಲು ಸಾಧ್ಯವಾಗದಿರುವುದು ಮತ್ತೊಂದು ಸಮಸ್ಯೆ. ಮೆಟ್ರೊದ ಎರಡೂ ಕಡೆ ಚಾಲನಾ ಕ್ಯಾಬಿನ್‌ ಇದೆ. ಅಂದರೆ, ಲೋಕೊ ಪೈಲಟ್‌ ರೈಲಿನ ಯಾವುದಾದರೊಂದು ಬದಿ ಕುಳಿತು ಚಲಾಯಿಸಬಹುದು. ರೈಲು ಮಾರ್ಗದ ಕೊನೆ ನಿಲ್ದಾಣಕ್ಕೆ ಬಂದಾಗ ಮರಳಿ ಹೋಗಲು ಹಳಿ ಬದಲಿಸಿಕೊಳ್ಳುತ್ತದೆ. ಆಗ ಮುಂದೆ ಕುಳಿತಿರುವ ಲೋಕೊ ಪೈಲಟ್‌ ಒಳಗಿನಿಂದ ನಡೆದುಕೊಂಡು ಬಂದು ಮತ್ತೊಂದು ತುದಿಯಲ್ಲಿರುವ ಚಾಲನಾ ಕ್ಯಾಬಿನ್‌ನಲ್ಲಿ ಕುಳಿತುಕೊಳ್ಳುತ್ತಾನೆ. ರೈಲು ಬಂದಾಗ ಇದ್ದ ಮೊದಲ ಬೋಗಿ ಈಗ ಕೊನೆ ಬೋಗಿಯಾಗುತ್ತದೆ. ಲೋಕೊ ಪೈಲಟ್‌ ಕೂರುವ ಕ್ಯಾಬಿನ್‌ ಬದಲಿಸಿಕೊಳ್ಳಬೇಕೇ ಹೊರತು ರೈಲನ್ನು ‘ಯೂ’ ಟರ್ನ್‌ ಮಾಡಲು ಅಸಾಧ್ಯ. ಆದ್ದರಿಂದ ಮೊದಲ ಬೋಗಿಯ ಹೊರಗೆ ಮಹಿಳಾ ಮೀಸಲಿನ ಸೂಚನಾ ಫಲಕ ಅಳವಡಿಸಿದರೆ ಮತ್ತಷ್ಟು ಗೊಂದಲವಾಗುತ್ತದೆ. ರೈಲಿನ ಒಳಗೆ ಎರಡೂ ತುದಿಯ ಬೋಗಿಗೆ ಸೂಚನಾ ಫಲಕ ಅಂಟಿಸಲಾಗಿದೆ.

ತಳ್ಳಾಟ, ನೂಕಾಟ

ಮೊದಲ ಬೋಗಿಯಲ್ಲಿ ಮಹಿಳೆಯರು ಆರಾಮವಾಗಿ ಕೂರುತ್ತಾರೆ. ಆದರೆ ಎರಡನೇ ಬೋಗಿಯಲ್ಲಿ ತಳ್ಳಾಡಿಕೊಂಡು ನಿಲ್ಲುವ ಪುರುಷರು ಮೊದಲ ಬೋಗಿಗೆ ಬರುವ ಸಮಸ್ಯೆ ಕಡಿಮೆಯಾಗಿಲ್ಲ. ಎರಡನೇ ಬೋಗಿ ಹಾಗೂ ಮೊದಲ ಬೋಗಿಯ ನಡುವೆ ಯಾವುದೇ ತಡೆ ಇಲ್ಲ. ಪೀಕ್‌ ಅವಧಿಯಲ್ಲಿ ತಳ್ಳಾಟ, ನೂಕಾಟ ಉಂಟಾಗುವುದರಿಂದ ಸಹಜವಾಗಿ ಪುರುಷ ಪ್ರಯಾಣಿಕರು ಮೊದಲ ಬೋಗಿಗೆ ಬರುತ್ತಿದ್ದಾರೆ. ಮೊದಲ ಮತ್ತು ಎರಡನೇ ಬೋಗಿ ನಡುವೆ ನಿಲ್ಲುವ ಮಹಿಳಾ ಸಿಬ್ಬಂದಿಗೆ ದಟ್ಟಣೆ ನಿಯಂತ್ರಿಸುವುದು ಸಾಹಸದ ಕೆಲಸ.