ನಗರದಲ್ಲಿ ಮುಂದುವರಿದ ಮಳೆ

ಬೆಂಗಳೂರು: ನಗರದಲ್ಲಿ ಮಳೆ ಮುಂದುವರಿದಿದ್ದು, ಗುರುವಾರ ನಾನಾ ಪ್ರದೇಶಗಳಲ್ಲಿ 10 ಮೀಲಿ ಮೀಟರ್‌ಗೂ ಅಧಿಕ ಮಳೆ ಸುರಿದಿದೆ. ಮೇ 8ರವರೆಗೆ ಮಳೆ ಬರುವ ಸಾಧ್ಯತೆ ಇದೆ.

ಏಪ್ರಿಲ್‌ ಆರಂಭದಲ್ಲಿ ಬಂದಂತೆ ಮೇ ಆರಂಭದಲ್ಲೂ ಮಳೆ ಸುರಿಯುತ್ತಿದೆ. ಬೆಳಗ್ಗೆ 11ರಿಂದ ಸಂಜೆ 4ರವರೆಗೆ ಸೆಕೆ ಅಧಿಕವಾಗಿದ್ದು, ಸಂಜೆ ಸುರಿಯುತ್ತಿರುವ ಮಳೆಯು ತಂಪಿನ ವಾತಾವರಣ ಸೃಷ್ಟಿಸುತ್ತಿದೆ. ಗುರುವಾರ ಸಂಜೆ ಅಲ್ಲಲ್ಲಿ ಮಳೆ ಸುರಿದಿದ್ದು, ಬೇಸಿಗೆಯ ಬಿಸಿಯನ್ನು ತಣಿಸಿದೆ. ಹವಾಮಾನ ಇಲಾಖೆ ಮುನ್ಸೂಚನೆ ಪ್ರಕಾರ ಮಳೆ ಮೇ 8ರವರೆಗೆ ಮಳೆ ಬರಲಿದೆ.

ಮಳೆಯಿಂದಾಗಿ ಗರಿಷ್ಠ ತಾಪಮಾನವು ಒಂದು ಡಿಗ್ರಿ ಸೆಲ್ಸಿಯಸ್‌ ಕಡಿಮೆಯಾಗಿದೆ. ನಗರದ ಕೇಂದ್ರಭಾಗದಲ್ಲಿ 33.7 ಡಿಗ್ರಿ ಸೆಲ್ಸಿಯಸ್‌, ಎಚ್‌ಎಎಲ್‌ನಲ್ಲಿ 33.2 ಡಿಗ್ರಿ ಸೆಲ್ಸಿಯಸ್‌ ಹಾಗೂ ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ 33 ಡಿಗ್ರಿ ಸೆಲ್ಸಿಯಸ್‌ ಗರಿಷ್ಠ ತಾಪಮಾನ ದಾಖಲಾಗಿದೆ.

ಯಲಹಂಕದಲ್ಲಿ 24.5 ಮಿ.ಮೀ., ಚಿಕ್ಕಬಿದರಕಲ್ಲುವಿನಲ್ಲಿ 22.5 ಮಿ.ಮೀ., ಮಾದಾವರ, ವಿದ್ಯಾರಣ್ಯಪುರದಲ್ಲಿ 24 ಮಿ.ಮೀ., ಶೆಟ್ಟಿಹಳ್ಳಿಯಲ್ಲಿ 21 ಮಿ.ಮೀ., ಜ್ಞಾನಭಾರತಿಯಲ್ಲಿ 19 ಮಿ.ಮೀ, ಜಕ್ಕೂರಿನಲ್ಲಿ 18 ಮಿ.ಮೀ., ಹೆಗ್ಗನಹಳ್ಳಿಯಲ್ಲಿ 16 ಮಿ.ಮೀ., ಬಾಗಲಗುಂಟೆಯಲ್ಲಿ 13 ಮಿ.ಮೀ., ಕಿತ್ತನಹಳ್ಳಿಯಲ್ಲಿ 12 ಮಿ.ಮೀ., ಚಿಕ್ಕಬಾಣಾವರದಲ್ಲಿ 11 ಮಿ.ಮೀ., ನಂದಿನಿ ಲೇಔಟ್‌ನಲ್ಲಿ 9 ಮಿ.ಮೀ., ಕೊಡಿಗೆಹಳ್ಳಿಯಲ್ಲಿ 7.5 ಮಿ.ಮೀ. ಮಳೆಯಾಗಿದೆ. ಬಿಟಿಎಂ ಲೇಔಟ್‌, ಹಂಪಿನಗರ, ಶಿವನಗರ, ರಾಜಾಜಿನಗರ, ನಾಗರಬಾವಿ, ದಾಸರಹಳ್ಳಿಯಲ್ಲಿ ತುಂತುರು ಮಳೆ ಸುರಿದಿದೆ. ಜೋರಾಗಿ ಗಾಳಿ ಬೀಸಿದ್ದರಿಂದ ಗಂಗಮ್ಮ ಸರ್ಕಲ್‌ನಲ್ಲಿ ಒಂದು ಮರ ನೆಲಕ್ಕುರುಳಿದೆ.

ವಿದ್ಯುತ್‌ ಇಲ್ಲ

ಹಿಂದಿನ ದಿನ ಸುರಿದ ಮಳೆಗೆ ವಿದ್ಯುತ್‌ ಕಂಬಗಳು ತುಂಡಾಗಿದ್ದರಿಂದ ಹಲವು ಪ್ರದೇಶಗಳಲ್ಲಿ ವಿದ್ಯುತ್‌ ಪೂರೈಕೆ ಸ್ಥಗಿತಗೊಂಡಿತ್ತು. ಈಗ ಕೆಲ ಪ್ರದೇಶಗಳಲ್ಲಿ ದುರಸ್ತಿ ನಡೆದು ವಿದ್ಯುತ್‌ ಪೂರೈಕೆಯಾಗುತ್ತಿದೆ. ಮತ್ತೆ ಕೆಲ ಪ್ರದೇಶಗಳಲ್ಲಿ ಇನ್ನೂ ದುರಸ್ತಿ ನಡೆಯುತ್ತಿರುವುದರಿಂದ ವಿದ್ಯುತ್‌ ಸಮಸ್ಯೆ ಮುಂದುವರಿದಿದೆ. ಸಾರಕ್ಕಿ, ಅಟ್ಟೂರು, ಪುಟ್ಟೇನಹಳ್ಳಿ ಸುತ್ತಮುತ್ತ ವಿದ್ಯುತ್‌ ಪೂರೈಕೆ ವ್ಯತ್ಯಯಗೊಂಡಿದೆ.