ಮತ್ತೆ 17 ಮಂದಿ ಪೊಲೀಸರಿಗೆ ಕೊರೊನಾ ಸೋಂಕು: 3 ಠಾಣೆ ಸೀಲ್‌ಡೌನ್‌

ಬೆಂಗಳೂರು: ಎಚ್‌ಎಎಲ್‌ ಪೊಲೀಸ್‌ ಠಾಣೆಯ 12 ಸಿಬ್ಬಂದಿ ಸೇರಿ ಒಟ್ಟು 17 ಪೊಲೀಸ್‌ ಸಿಬ್ಬಂದಿಗೆ ಸೋಕು ತಗಲಿರುವುದು ಮಂಗಳವಾರ ದೃಢಪಟ್ಟಿದೆ. ಹೊಸದಾಗಿ ಮೂರು ಠಾಣೆಗಳನ್ನು ಸೀಲ್‌ಡೌನ್‌ ಮಾಡಲಾಗಿದೆ.

ಜೂ.27ರಂದು ಎಚ್‌ಎಎಲ್‌ ಠಾಣೆಯ ಓರ್ವ ಸಿಬ್ಬಂದಿಗೆ ಕೊರೊನಾ ಸೋಂಕು ತಗಲಿತ್ತು. ಅವರನ್ನು ಆಸ್ಪತ್ರೆಗೆ ದಾಖಲಿಸಿ ಠಾಣೆಯನ್ನು ಸೀಲ್‌ಡೌನ್‌ ಮಾಡಲಾಗಿತ್ತು. ಅದಾದ ಬಳಿಕ ಠಾಣೆಯ ಇತರ ಸಿಬ್ಬಂದಿಯನ್ನು ಟೆಸ್ಟ್‌ ಮಾಡಿಸಿದಾಗ ಮತ್ತೆ 12 ಜನರಿಗೆ ಸೋಂಕು ತಗಲಿದೆ. ಈವರೆಗೆ ವೈಟ್‌ಫೀಲ್ಡ್ ವಿಭಾಗದಲ್ಲಿ 27 ಪೊಲೀಸರಿಗೆ ಸೋಂಕು ತಗಲಿದ್ದು, ಐವರು ಗುಣಮುಖರಾಗಿದ್ದಾರೆ ಎಂದು ವೈಟ್‌ಫೀಲ್ಡ್ ವಿಭಾಗದ ಡಿಸಿಪಿ ಅನುಚೇತ್‌ ತಿಳಿಸಿದರು.

ವೈಯ್ಯಾಲಿ ಕಾವಲ್‌ ಠಾಣೆಯ ಕಾನ್ಸ್‌ಟೆಬಲ್‌ ಹಾಗೂ ಶಿವಾಜಿನಗರ ಠಾಣೆಯ ಹೆಡ್‌ ಕಾನ್ಸ್‌ಟೆಬಲ್‌ಗೆ ಸೋಂಕು ತಗಲಿರುವ ಕಾರಣ ಎರಡೂ ಠಾಣೆಗಳನ್ನು ಸೀಲ್‌ಡೌನ್‌ ಮಾಡಲಾಗಿದೆ. ಸೋಂಕಿತರ ಪ್ರಾಥಮಿಕ ಸಂಪರ್ಕಕ್ಕೆ ಬಂದಿದ್ದ 13 ಪೊಲೀಸರನ್ನು ಕ್ವಾರಂಟೈನ್‌ ಮಾಡಲಾಗಿದೆ ಎಂದು ಹಿರಿಯ ಪೊಲೀಸ್‌ ಅಧಿಕಾರಿಯೊಬ್ಬರು ತಿಳಿಸಿದರು.
ಪೊಲೀಸರಲ್ಲಿ ಹೆಚ್ಚುತ್ತಿರುವ ಕೊರೊನಾ: ತಪಾಸಣೆಗೆ ಸಮರ್ಪಕ ವ್ಯವಸ್ಥೆ ಮಾಡದ ಸರಕಾರ, ಐದಾರು ದಿನಗಳ ಬಳಿಕ ವರದಿ