ಬೆಂಗಳೂರು: ವಾರದಲ್ಲಿ ಸೋಂಕಿತ ಪ್ರಕರಣಗಳ ಸಂಖ್ಯೆ ಶೇ 250ರಷ್ಟು ಹೆಚ್ಚಳ

ಬೆಂಗಳೂರು: ಬಿಬಿಎಂಪಿ ವ್ಯಾಪ್ತಿಯಲ್ಲಿ ಕಳೆದ ಒಂದು ವಾರದಿಂದ ಸೋಂಕಿತ ಪ್ರಕರಣಗಳ ಸಂಖ್ಯೆಯಲ್ಲಿ ಶೇ.250ರಷ್ಟು ಹೆಚ್ಚಳವಾಗಿದೆ. ಇದು ಜಗತ್ತು ಮತ್ತು ದೇಶದ ಇತರೆ ಪ್ರಮುಖ ನಗರಗಳಲ್ಲಿ ಪತ್ತೆಯಾಗುತ್ತಿರುವ ಪ್ರಕರಣಗಳಿಗೆ ಸಮವಾಗಿದೆ ಎಂದು ಪಾಲಿಕೆಯ ಮುಖ್ಯ ಆಯುಕ್ತ ಗೌರವ್‌ ಗುಪ್ತ ತಿಳಿಸಿದ್ದಾರೆ.

''ಸೋಂಕಿತರಲ್ಲಿ ಆಸ್ಪತ್ರೆಗೆ ದಾಖಲಾಗುತ್ತಿರುವವರ ಸಂಖ್ಯೆ ಕಡಿಮೆಯಾಗುತ್ತಲೇ ಇದೆ. ಒಟ್ಟು ಸಕ್ರಿಯ ಪ್ರಕರಣಗಳಲ್ಲಿ ಕೇವಲ ಶೇ. 1.3 ರಷ್ಟು ಮಂದಿ ಮಾತ್ರ ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ಪಡೆದುಕೊಳ್ಳುತ್ತಿದ್ದಾರೆ. ಶೇ. 0.5ಕ್ಕಿಂತ ಕಡಿಮೆ ರೋಗಿಗಳು ಐಸಿಯು, ವೆಂಟಿಲೇಟರ್‌ ಹಾಸಿಗೆಗಳಲ್ಲಿದ್ದಾರೆ. ಸೋಂಕು ಬಾಧಿತ ಮಕ್ಕಳ ಸಂಖ್ಯೆ ಶೇ. 10ರಷ್ಟಿದೆ. ಕೋವಿಡ್‌ ಪರೀಕ್ಷಾ ಸಂಖ್ಯೆಯನ್ನು 60 ಸಾವಿರದಿಂದ 1.10 ಲಕ್ಷಕ್ಕೆ ಹೆಚ್ಚಿಸಲಾಗಿದೆ'' ಎಂದು ಹೇಳಿದರು.

ಬೆಂಗಳೂರಿನಲ್ಲಿ ಕೊರೊನಾ ಸೋಂಕಿತರ ಟ್ರಯಾಜ್‌ ಮಾಡದೆ ಹಾಸಿಗೆ ಕಾಯ್ದಿರಿಸುವಂತಿಲ್ಲ: ಬಿಬಿಎಂಪಿ ಆದೇಶ

''ಬೆಂಗಳೂರು ನಗರದಲ್ಲಿ ಒಟ್ಟು 627 ಸಕ್ರಿಯ ಕಂಟೈನ್ಮೆಂಟ್‌ ವಲಯಗಳಿವೆ. 385 ವಸತಿ ಸಮುಚ್ಚಯಗಳು, 214 ಮನೆಗಳು, 5 ಶಾಲಾ-ಕಾಲೇಜುಗಳು ಹಾಗೂ 23 ಹಾಸ್ಟೆಲ್‌, ಪಿಜಿಗಳನ್ನು ಕಂಟೈನ್ಮೆಂಟ್‌ ವಲಯಗಳೆಂದು ಗುರುತಿಸಲಾಗಿದೆ. ಸೋಂಕು ದೃಢಪಟ್ಟವರನ್ನು ವಿಧಾನಸಭಾ ಕ್ಷೇತ್ರದ ನಿಯಂತ್ರಣ ಕೊಠಡಿಗಳಲ್ಲಿನ ಸಿಬ್ಬಂದಿಯು 24 ಗಂಟೆಯೊಳಗೆ ಟೆಲಿ ಟ್ರಯಾಜಿಂಗ್‌ ಮಾಡುತ್ತಿದ್ದಾರೆ. ಅಗತ್ಯವಿರುವ ರೋಗಿಗಳ ಮನೆ ಬಾಗಿಲಿಗೆ ತೆರಳಿ ಟ್ರಯಾಜ್‌ ಮಾಡಲು 300ಕ್ಕೂ ಅಧಿಕ ಮೊಬೈಲ್‌ ಟ್ರಯಾಜ್‌ ಘಟಕಗಳನ್ನು ನಿಯೋಜಿಸಲಾಗಿದೆ. ನಿತ್ಯ 3 ಸಾವಿರ ಸೋಂಕಿತರನ್ನು ಭೌತಿಕ ಟ್ರಯಾಜ್‌ಗೆ ಒಳಪಡಿಸಲಾಗುತ್ತಿದೆ. ವೈದ್ಯಕೀಯ ತಪಾಸಣೆ ಬಯಸುವ ರೋಗಿಗಳಿಗೆ ವಾಕ್‌ ಇನ್‌ ಸೌಲಭ್ಯದೊಂದಿಗೆ ಭೌತಿಕ ಟ್ರಯಾಜ್‌ ಕೇಂದ್ರಗಳನ್ನು ಆರಂಭಿಸಲಾಗಿದೆ'' ಎಂದು ತಿಳಿಸಿದರು.

''ಕೊರೊನಾ ಸೋಂಕಿತರ ಚಿಕಿತ್ಸೆಗಾಗಿ 28067 ಹಾಸಿಗೆಗಳನ್ನು ಮೀಸಲಿಡಲಾಗಿದೆ. ಸರಕಾರಿ ಆಸ್ಪತ್ರೆಗಳಲ್ಲಿ 3237, ಸರಕಾರಿ ವೈದ್ಯಕೀಯ ಕಾಲೇಜು 2696, ಖಾಸಗಿ ಆಸ್ಪತ್ರೆ 13540 ಮತ್ತು ಖಾಸಗಿ ವೈದ್ಯಕೀಯ ಕಾಲೇಜುಗಳಲ್ಲಿ 8594 ಹಾಸಿಗೆಗಳನ್ನು ಗುರುತಿಸಲಾಗಿದೆ. ಇದರಲ್ಲಿ 6704 ಹಾಸಿಗೆಗಳು ಸಿಎಚ್‌ಬಿಎಂಎಸ್‌ ಅಡಿಯಲ್ಲಿ ಹಂಚಿಕೆಗೆ ಲಭ್ಯ ಇವೆ. ಇದುವರೆಗೆ 637 ಹಾಸಿಗೆಗಳನ್ನಷ್ಟೇ ಹಂಚಿಕೆ ಮಾಡಲಾಗಿದೆ. ಬೆಡ್‌ ಬ್ಲಾಕಿಂಗ್‌ ಅನ್ನು ವಿಕೇಂದ್ರೀಕರಿಸಲಾಗಿದ್ದು, ಎಲ್ಲ ಪ್ರಾಥಮಿಕ ಕೇಂದ್ರಗಳ ವ್ಯಾಪ್ತಿಯಲ್ಲಿ 27 ವೈದ್ಯರಿಗೆ ಲಾಗಿನ್‌ ವ್ಯವಸ್ಥೆ ಕಲ್ಪಿಸಲಾಗಿದೆ'' ಎಂದು ವಿವರಿಸಿದರು.

ಸಿದ್ದರಾಮಯ್ಯ ಅವರನ್ನು ಸೈಡ್‌ಲೈನ್ ಮಾಡಲು ಡಿಕೆಶಿ ಪಾದಯಾತ್ರೆ: ಅಶ್ವತ್ಥ ನಾರಾಯಣ ವ್ಯಂಗ್ಯ!

''ಹೋಮ್‌ ಐಸೋಲೇಷನ್‌ನಲ್ಲಿರುವ ರೋಗಿಗಳಿಗೆ ಟೆಲಿ ಕಾಲಿಂಗ್‌ ಮೂಲಕ ಹಾಗೂ ವಾರ್ಡ್‌ ಮಟ್ಟದಲ್ಲಿ ಪಾಲಿಕೆಯ ಆರೋಗ್ಯ ತಂಡಗಳು ಕ್ಷೇತ್ರಗಳಿಗೆ ಭೇಟಿ ನೀಡುವ ಮೂಲಕ ಮೇಲ್ವಿಚಾರಣೆ ಮಾಡುತ್ತಿವೆ. ಈ ರೋಗಿಗಳಿಗೆ ಇಲ್ಲಿಯವರೆಗೆ 35 ಸಾವಿರ ಔಷಧದ ಕಿಟ್‌ ವಿತರಿಸಲಾಗಿದೆ. ಇನ್ನೂ 90 ಸಾವಿರಕ್ಕಿಂತ ಹೆಚ್ಚು ಕಿಟ್‌ಗಳು ಲಭ್ಯ ಇವೆ. 911 ಸಾಮಾನ್ಯ ಮತ್ತು 576 ಆಮ್ಲಜನಕ ಹಾಸಿಗೆ ಸಾಮರ್ಥ್ಯದ 17 ಕೋವಿಡ್‌ ಆರೈಕೆ ಕೇಂದ್ರಗಳು ಸಿದ್ಧವಾಗಿವೆ'' ಎಂದು ಹೇಳಿದರು.