ನಮ್ಮ ಆರೋಗ್ಯಕ್ಕಾಗಿ ನೋವಿನಲ್ಲೂ ನಲಿವು ಕಾಣುವ ವೈದ್ಯಕೀಯ ಸಿಬ್ಬಂದಿ

ಬೆಂಗಳೂರು: ಒಮ್ಮೆ ಆಸ್ಪತ್ರೆ ಪ್ರವೇಶಿಸಿ ಪಿಪಿಇ ಕಿಟ್‌ ಧರಿಸಿದರೆ ಮುಂದಿನ ಎಂಟು ಗಂಟೆಗಳ ಕಾಲ ಅದನ್ನು ತೆಗೆಯುವಂತಿಲ್ಲ. ಒಂದು ನಿಮಿಷವೂ ಬಿಡುವಿಲ್ಲ. ಊಟಕ್ಕೆ, ಶೌಚಕ್ಕೂ ಅವಕಾಶವಿಲ್ಲ. ಅಷ್ಟೂ ಹೊತ್ತು ಅನುಭವಿಸುವುದೆಲ್ಲ ಯಮಯಾತನೆ. ಅಷ್ಟಾದರೂ ಅವರು ಎಲ್ಲ ನೋವನ್ನು ಮರೆತು ಕರ್ತವ್ಯ ಪ್ರಜ್ಞೆ ಮೆರೆಯುತ್ತಿದ್ದಾರೆ.

- ಇದು ಕೊರೊನಾ ವಿರುದ್ಧದ ಹೋರಾಟದ ಮುಂಚೂಣಿಯಲ್ಲಿರುವ ವೈದ್ಯಕೀಯ ಸಿಬ್ಬಂದಿಯ ಕತೆ. ನಾನಾ ಆಸ್ಪತ್ರೆಗಳಲ್ಲಿ ಕೆಲಸ ಮಾಡುತ್ತಿರುವ ಇವರು ನಿಜವಾಗಿಯೂ ಯೋಧರಂತೆ ದುಡಿಯುತ್ತಿದ್ದಾರೆ. ನಮ್ಮ ಆರೋಗ್ಯ ರಕ್ಷಣೆಗಾಗಿ ಬಹಳಷ್ಟು ತ್ಯಾಗ ಮಾಡುತ್ತಿದ್ದಾರೆ. ಲಾಕ್‌ಡೌನ್‌ ನಿಯಮಗಳನ್ನು ಮೀರಿ ಅಡ್ಡಾಡುವವರು, ಸೋಂಕು ಇದ್ದರೂ ತಿರುಗಾಡುತ್ತಾ ಬೇಜವಾಬ್ದಾರಿ ತೋರುವವರು, ಆರೋಗ್ಯ ಸಿಬ್ಬಂದಿ ಮೇಲೆ ಹಲ್ಲೆಮಾಡುವ ಸಮಾಜ ಇವರ ಕಷ್ಟವನ್ನು ಇವರ ತ್ಯಾಗವನ್ನು ಅರ್ಥ ಮಾಡಿಕೊಳ್ಳಬೇಕಾಗಿದೆ.

ಬೆಂಗಳೂರಿನ ಆಸ್ಪತ್ರೆಯೊಂದರಲ್ಲಿ ಕೆಲಸ ಮಾಡುತ್ತಿರುವ ನರ್ಸ್‌ ಒಬ್ಬರು ಟ್ರಾಮಾ ಕೇರ್‌ ಸೆಂಟರ್‌ನ ವಿಶೇಷ ಅಧಿಕಾರಿಗೆ ಬರೆದಿರುವ ಪತ್ರದಲ್ಲಿ ತೆರೆದುಕೊಂಡಿರುವ ಸಂಕಟಗಳು ನಿಜಕ್ಕೂ ವೈದ್ಯಕೀಯ ಸಿಬ್ಬಂದಿ ಸೇವೆಗೆ ಸೆಲ್ಯೂಟ್‌ ಹೊಡೆಯುವಂತೆ ಮಾಡುತ್ತಿವೆ.

ನೀವು ಖುಷಿಯಾಗಿರಲು ಇಲ್ಲಿದೆ 'ಲಾಕ್‌ಡೌನ್' ವಿನಾಯ್ತಿ..! ಪೊಲೀಸರೇ ಕೊಟ್ಟಿದ್ದಾರೆ ಪಟ್ಟಿ..!

‘‘ಕೆಲಸದ ಒತ್ತಡ ಹೆಚ್ಚಿರುವುದರಿಂದ ನಡುವೆ ಬಿಡುವೂ ಆಗುವುದಿಲ್ಲ. ಇದರಿಂದಾಗಿ ಉಸಿರಾಟದ ತೊಂದರೆ, ಮಾನಸಿಕ ಒತ್ತಡ ಹೆಚ್ಚಿ ಆಗಾಗ್ಗೆ ಭ್ರಮೆಗೊಳಗಾಗುತ್ತಿದ್ದೇವೆ. ಗ್ಯಾಸ್ಟ್ರಿಕ್‌, ವಾಕರಿಕೆ, ತೀವ್ರ ಆಯಾಸ, ತಲೆ ಸುತ್ತು ಮೊದಲಾದ ಸಮಸ್ಯೆಗಳೂ ಕಾಣಿಸಿಕೊಂಡಿವೆ. ಕಿಟ್‌ ಅನ್ನು ಆಗಾಗ್ಗೆ ತೆಗೆಯಲು ಸಾಧ್ಯವಾಗದಿರುವುದರಿಂದ ಹೆಚ್ಚು ಸಮಯ ಮೂತ್ರ ಕಟ್ಟಿಕೊಂಡು ಕಾರ್ಯನಿರ್ವಹಿಸಬೇಕಾಗುತ್ತಿದೆ. ದೇಹದಲ್ಲಿ ಪೌಷ್ಟಿಕಾಂಶ ಹೆಚ್ಚಿಸಿಕೊಳ್ಳಲು ಆಗಾಗ್ಗೆ ಆಹಾರ ಸೇವನೆಯೂ ಸಾಧ್ಯವಾಗುತ್ತಿಲ್ಲ,’’ ಎಂದಿದ್ದಾರೆ ಅವರು.

ಕೊರೊನಾ ಆಸ್ಪತ್ರೆ: ಘೋಷಣೆ ಸಾಲದು, ಸೌಲಭ್ಯ ನೀಡಿ - ವಿಕ್ಟೋರಿಯಾ ನರ್ಸ್‌ಗಳಿಂದ ಪತ್ರ

ವೈರಸ್‌ ಸೋಂಕಿನಿಂದ ರಕ್ಷಣೆ ಪಡೆಯಲು ನರ್ಸ್‌ಗಳು ಅಥವಾ ವೈದ್ಯಕೀಯ ಸಿಬ್ಬಂದಿ ಧರಿಸುವ ವೈಯಕ್ತಿಕ ರಕ್ಷಣಾ ಸಾಧನದ(ಪಿಪಿಇ) ಕಿಟ್‌ನಲ್ಲಿ ಕೈಗವಸುಗಳು, ನಿಲುವಂಗಿಗಳು (ಮೂರು ಪದರಗಳಿರುತ್ತವೆ), ಶೂ ಕವರ್‌, ಹೆಡ್‌ ಕವರ್‌, ಮುಖವಾಡ, ಕಣ್ಣು ಮತ್ತು ಮುಖ ರಕ್ಷಣೆಯ ಕವಚಗಳು ಮತ್ತು ಕನ್ನಡಕ ಇರುತ್ತವೆ. ಇವೆಲ್ಲವನ್ನೂ ಸಾಮಾನ್ಯ ವ್ಯಕ್ತಿ ಅರ್ಧ ಗಂಟೆ ಧರಿಸುವುದೂ ಕಷ್ಟ. ನಿರಂತರವಾಗಿ ಪಿಪಿಇ ಧರಿಸುವ ಎಷ್ಟೋ ನರ್ಸ್‌ಗಳು ಮತ್ತು ವೈದ್ಯರ ಮುಖದ ಚರ್ಮ ಕಿತ್ತು ಹೋಗುವ ಅಪಾಯಗಳೂ ಇವೆ. ಈ ಕಿಟ್‌ ಅನ್ನು 8 ಗಂಟೆ ಧರಿಸಬೇಕಾದ ಅನಿವಾರ್ಯತೆ ಹೊಂದಿರುವ ನರ್ಸ್‌ಗಳು, ತಮ್ಮ ಸಂಕಷ್ಟವನ್ನು ಪತ್ರದ ಮೂಲಕ ಹೊರ ಜಗತ್ತಿಗೆ ತೆರೆದಿಟ್ಟಿದ್ದಾರೆ. ಟ್ರಾಮಾ ಕೇರ್‌ಸೆಂಟರ್‌ನ ವಿಶೇಷ ಅಧಿಕಾರಿಗೆ ಪತ್ರ ಬರೆದಿದ್ದಾರೆ. ಕೊರೊನಾ ರೋಗಿಗಳ ಆರೈಕೆ ವೇಳೆ ತಾವು ಎದುರಿಸುತ್ತಿರುವ ಒತ್ತಡ, ಆರೋಗ್ಯ ಸಮಸ್ಯೆಗಳ ಕುರಿತು ಪತ್ರದಲ್ಲಿ ವಿವರಿಸಿದ್ದಾರೆ.

ಕೊರೊನಾ ಮಾಹಿತಿ ಸಂಗ್ರಹಕ್ಕೆ ತೆರಳಿದ್ದ ಆಶಾ ಕಾರ್ಯಕರ್ತೆಯರ ಮೇಲೆ ಬೆಂಗಳೂರಿನಲ್ಲಿ ಹಲ್ಲೆ!

ನರ್ಸ್, ವೈದ್ಯರಿಗೂ 2 ವಾರ ಕ್ವಾರಂಟೈನ್‌
ಕೊರೊನಾ ರೋಗಿಗಳು ದಾಖಲಾಗಿರುವ ಆಸ್ಪತ್ರೆಗಳಲ್ಲಿ ವೈದ್ಯರು ಹಾಗೂ ನರ್ಸ್‌ಗಳು ಎರಡು ವಾರಗಳ ಕಾಲ ಕಾರ್ಯನಿರ್ವಹಿಸುತ್ತಾರೆ. ನಂತರ ಅವರನ್ನು ಮನೆಗೆ ಕಳುಹಿಸಿ 14 ದಿನ ಕ್ವಾರಂಟೈನ್‌ಗೆ ಒಳಪಡಿಸಲಾಗುತ್ತದೆ. ಈ ವೇಳೆ ರೋಗ ಲಕ್ಷಣ ಕಾಣಿಸಿಕೊಂಡಿದೆಯೇ ಎಂದು ಪರೀಕ್ಷಿಸಲಾಗುತ್ತದೆ. ಯಾವುದೇ ಸಮಸ್ಯೆ ಇಲ್ಲದಿದ್ದರೆ ಮತ್ತೆ ಕರ್ತವ್ಯಕ್ಕೆ ಹಾಜರಾಗಬೇಕು. ಆದರೆ ಹೀಗೆ ಕೆಲಸ ಮಾಡುವುದಕ್ಕೆ ಕುಟುಂಬ ಸದಸ್ಯರು ವಿರೋಧ ವ್ಯಕ್ತಪಡಿಸುತ್ತಾರೆ. ಆಸ್ಪತ್ರೆಯಲ್ಲಿ ಕೆಲಸ ಮುಗಿದ ಬಳಿಕ ಸಿಬ್ಬಂದಿ ಮನೆಗೆ
ಹೋದರೂ ಮುನ್ನೆಚ್ಚರಿಕೆ ಕ್ರಮವಾಗಿ ಮನೆಯವರೊಂದಿಗೆ ಬೆರೆಯುವುದಿಲ್ಲ. ಊಟದ ತಟ್ಟೆ, ಲೋಟ, ಬಟ್ಟೆಗಳನ್ನು ಪ್ರತ್ಯೇಕ ಕೋಣೆಯಲ್ಲಿಟ್ಟುಕೊಂಡು ಜೀವಿಸಬೇಕಾಗುತ್ತದೆ.

ನರ್ಸ್‌ಗಳ ಮನವಿ ಏನು?
* ಕೆಲಸದ ಅವಧಿಯನ್ನು 8 ಗಂಟೆ ಬದಲು 6 ಗಂಟೆಗೆ ಇಳಿಸುವುದು.
* 2 ದಿನಕ್ಕೊಮ್ಮೆ ಅಥವಾ ವಾರದಲ್ಲಿ 3 ದಿನ ಮಾತ್ರ ಕಾರ್ಯನಿರ್ವಹಣೆ.
* ನರ್ಸ್‌, ವೈದ್ಯರಿಗೆ ಪ್ರತ್ಯೇಕ ವಸತಿ ಸೌಲಭ್ಯ
* ತುರ್ತು ಪರಿಸ್ಥಿತಿಗಾಗಿ ಹೆಚ್ಚುವರಿ ಸಿಬ್ಬಂದಿಯನ್ನು ಮೀಸಲಿಡುವುದು.
* ನರ್ಸ್‌ಗಳಿಗೆ ಆಪ್ತ ಸಮಾಲೋಚನೆ ಸೇವೆ.
* ಪಿಪಿಇ ಬಳಕೆ, ಸ್ವಚ್ಛತೆ ಬಗ್ಗೆ ಸಿಬ್ಬಂದಿಗೆ ತರಬೇತಿ.
* ನರ್ಸ್‌ಗಳ ಚಿಕಿತ್ಸೆಗೆ ತುರ್ತು ಮೆಡಿಕಲ್‌ ಕೇರ್‌
* ರೋಗ ನಿರೋಧಕ ಶಕ್ತಿ ಹೆಚ್ಚಿಸಲು ನೀರು, ಜ್ಯೂಸ್‌, ಆಹಾರ ಒದಗಿಸಿ