ಲಾಕ್‌ಡೌನ್‌ ಸಂಕಷ್ಟದ ವೇಳೆ ಆನ್‌ಲೈನ್‌ ವಂಚಕರಿಂದ ಬ್ಯಾಂಕ್‌ ಖಾತೆ ರಕ್ಷಣೆ ಹೇಗೆ? ಇಲ್ಲಿದೆ ವಿವರ

ಬೆಂಗಳೂರು: ಮದ್ಯ ವಿತರಿಸುತ್ತೇವೆ ಎಂದು ಮುಂಚಿತವಾಗಿ ಹಣ ಪಡೆದು ವಂಚಿಸಿದ ಹಲವು ಘಟನೆಗಳು ಕಣ್ಮುಂದೆ ಇರುವಂತೆಯೇ, ಪ್ರಧಾನಿ ನರೇಂದ್ರ ಮೋದಿ ಅವರು ನಿಮ್ಮ ಖಾತೆಗೆ 10 ಸಾವಿರ ರೂ. ಲಾಕ್‌ಡೌನ್‌ ಪರಿಹಾರ ಮೊತ್ತವನ್ನು ಜಮೆ ಮಾಡುತ್ತಿದ್ದಾರೆ ಎಂದು ನಂಬಿಸಿ ಬೆಂಗಳೂರಿನ ಪಟ್ಟೆಗಾರಪಾಳ್ಯದ ನಿವಾಸಿಯೊಬ್ಬರಿಂದ 1 ಲಕ್ಷ ರೂ. ವಂಚಿಸಿರುವ ಪ್ರಕರಣ ಬೆಳಕಿಗೆ ಬಂದಿದೆ.

ನಿಮ್ಮ ಮೊಬೈಲ್‌ಗೆ ಬಂದ ಸಂದೇಶದ ವಿವರ ನೀಡಬೇಕು, ಇಲ್ಲದಿದ್ದರೆ ನಿಮ್ಮ ಬ್ಯಾಂಕ್‌ ಖಾತೆಯನ್ನು ಅನುಪಯುಕ್ತ ಎಂದು ಪರಿಗಣಿಸಿ ಬ್ಲಾಕ್‌ ಮಾಡಲಾಗುತ್ತದೆ ಎಂದು ನಂಬಿಸಿ ದುಡ್ಡು ಕಿತ್ತುಕೊಂಡಿದ್ದಾರೆ. ಗಾರೆ ಕೆಲಸ ಮಾಡಿ ಕೂಡಿದ್ದ 1 ಲಕ್ಷ ರೂ. ಎರಡು ಮೆಸೇಜ್‌ಗಳಿಂದ ಎಗರಿ ಹೋಗಿದೆ.

ಸೈಬರ್‌ ವಂಚನೆ ತಪ್ಪಿಸಲು ಏನು ಮಾಡಬೇಕು?

• ಸಾಲ, ಎಟಿಎಂ, ಬ್ಯಾಂಕ್‌ ಖಾತೆ ಬಗ್ಗೆ ಮಾಹಿತಿ, ಒಟಿಪಿ ಶೇರ್‌ ಮಾಡಬೇಡಿ
• ಇಎಂಐ ಬಗ್ಗೆ ಅನುಮಾನ ಇದ್ದರೆ ಬ್ಯಾಂಕ್‌ಗೆ ತೆರಳಿ ವಿಚಾರಿಸಿ
• ಕೇಂದ್ರ ಹಾಗೂ ರಾಜ್ಯ ಸರಕಾರದ ಹಣ ಜಮೆ ಹೆಸರಲ್ಲಿ ಬರುವ ಕರೆಗೆ ಸ್ಪಂದಿಸಬೇಡಿ
• ಆನ್‌ಲೈನ್‌ ಖರೀದಿ, ಗೂಗಲ್‌ನಲ್ಲಿ ವಿವಿಧ ಸೇವೆಗಳ ಕುರಿತು ಸರ್ಚ್ ಮಾಡುವ ವೇಳೆ ಎಚ್ಚರವಹಿಸಿ
• ಅಪರಿಚಿತರು ಲಿಂಕ್‌, ಎಸ್‌ಎಂಎಸ್‌ ಕಳುಹಿಸಿ ಮಾಹಿತಿ ಕೇಳಿದರೆ ನೀಡಬೇಡಿ
• ಯಾವುದೇ ಕಾರಣಕ್ಕೂ ನಿಮ್ಮ ಇಮೇಲ್‌ ಅಥವಾ ಮೊಬೈಲ್‌ಗೆ ಬರುವ ಲಿಂಕ್‌ ಕ್ಲಿಕ್‌ ಮಾಡಬೇಡಿ.
• ಮದ್ಯ ಮಾರಾಟ ಸಂಪೂರ್ಣ ಬಂದ್‌ ಆಗಿರುವ ಕಾರಣ ಆನ್‌ಲೈನ್‌ ಮದ್ಯ ಖರೀದಿ ಪ್ರಯತ್ನ ಬೇಡ
• ಗೂಗಲ್‌ನಲ್ಲಿ ಸರ್ಚ್ ಮಾಡಿ ಸಿಕ್ಕ ಸಿಕ್ಕ ನಂಬರ್‌ಗಳಿಗೆ ಕರೆ ಮಾಡಿ ಮೋಸ ಹೋಗಬೇಡಿ

'ಪಿಎಂ ಮೋದಿಯಿಂದ 10 ಸಾವಿರ ರೂ. ಜಮೆ' ಎಂದು ನಂಬಿಸಿ 1 ಲಕ್ಷ ರೂ. ಎಗರಿಸಿದ ಖದೀಮರು!