ಖಾಸಗಿ ಆಸ್ಪತ್ರೆಗಳಲ್ಲಿ ಕೋವಿಡ್‌ ಲಸಿಕೆ ಕೇಳುವವರಿಲ್ಲ! ಅವಧಿ ಮುಗಿದರೆ ಆಸ್ಪತ್ರೆಗಳಿಗೆ ಭಾರೀ ನಷ್ಟದ ಆತಂಕ

ಬೆಂಗಳೂರು: ಖಾಸಗಿ ಆಸ್ಪತ್ರೆಗಳು ತಮ್ಮ ಸಂಗ್ರಹದಲ್ಲಿರುವ ಕೋವಿಡ್‌-19 ಲಸಿಕೆ ಡೋಸ್‌ಗಳನ್ನು ಖಾಲಿ ಮಾಡಲು ಹೆಣಗಾಡುತ್ತಿವೆ. ಇದರ ಫಲಿತಾಂಶವಾಗಿ ಹಲವು ಡೋಸ್‌ಗಳು ಮುಖ್ಯವಾಗಿ ಕೋವಿಶೀಲ್ಡ್‌ ಡೋಸ್‌ಗಳು ವ್ಯರ್ಥವಾಗುತ್ತಿದೆ.

ಬೆಂಗಳೂರಿನ ಖಾಸಗಿ ಆಸ್ಪತ್ರೆಗಳಲ್ಲಿ ಎರಡು ಲಕ್ಷ ಡೋಸ್‌ ಕೋವಿಡ್‌ ಶೀಲ್ಡ್‌ ಲಸಿಕೆ ಸಂಗ್ರಹವಿದೆ. ಶುಲ್ಕ ಪಾವತಿಸಿ ಲಸಿಕೆ ಪಡೆಯುವವರ ಸಂಖ್ಯೆ ತೀವ್ರವಾಗಿ ತಗ್ಗಿದೆ ಎಂದು ಖಾಸಗಿ ಆಸ್ಪತ್ರೆಗಳ ಆಡಳಿತ ಮಂಡಳಿಗಳು ತಿಳಿಸಿವೆ. ‘10 ಡೋಸ್‌ಗಳ ಬಾಟಲಿಯಿಂದ ಕೇವಲ ನಾಲ್ಕು ಅಥವಾ ಐದು ಡೋಸ್‌ ಲಸಿಕೆ ಮಾತ್ರ ನೀಡಲಾಗುತ್ತಿದೆ. ಉಳಿದ ಡೋಸ್‌ಗಳು ವ್ಯರ್ಥವಾಗುತ್ತಿವೆ. ಬಾಟಲಿಯನ್ನು ತೆರೆದ ನಂತರ ನಿಗದಿತ ಗಂಟೆಗಳ ಒಳಗೆ ಲಸಿಕೆ ಬಳಸಬೇಕು. ಇಲ್ಲದಿದ್ದರೆ ಅದು ವ್ಯರ್ಥ. ಲಸಿಕೆ ಪಡೆಯಲು ಬರುವವರ ಸಂಖ್ಯೆ ತಗ್ಗಿದೆ.
ಮಂಡ್ಯದಲ್ಲಿ 15 ದಿನಗಳಲ್ಲಿ ಮೂವರು ಕೋವಿಡ್‌ ಸೋಂಕಿತರ ಸಾವು: ಲಸಿಕೆ ಹಾಕಿಸಿಕೊಳ್ಳದಿರುವುದೇ ಕಾರಣ..?
ನಮ್ಮ ಸಂಗ್ರಹದಲ್ಲಿಒಟ್ಟು 1,000 ಬಾಟಲಿ ಲಸಿಕೆಗಳು ಇದ್ದು, ಈ ಪೈಕಿ 645 ಡೋಸ್‌ಗಳನ್ನು ನೀಡಿದ್ದೇವೆ. ಇದುವರೆಗೆ 62 ಡೋಸ್‌ ಕೋವಿಶೀಲ್ಡ್‌ ಲಸಿಕೆ ವ್ಯರ್ಥವಾಗಿದೆ. ಕೆಲವು ಡೋಸ್‌ಗಳನ್ನು ನಮ್ಮ ಸಿಬ್ಬಂದಿ ಮತ್ತು ಅವರ ಕುಟುಂಬದವರಿಗೆ ನೀಡಿದ್ದೇವೆ. ನಮ್ಮಲ್ಲಿ ಇರುವ ಲಸಿಕೆಯ ಅವಧಿ ಫೆಬ್ರವರಿ ವೇಳೆಗೆ ಮುಗಿಯಲಿದೆ. ಅದರ ಒಳಗೆ ಲಸಿಕೆ ಬಳಸಬೇಕಿದೆ. ಲಸಿಕೆ ವ್ಯರ್ಥವಾಗದಂತೆ ತಡೆಯುವುದೇ ಈಗಿನ ಸವಾಲು ಎಂದು ಖಾಸಗಿ ವೈದ್ಯಕೀಯ ಕಾಲೇಜು ಆಡಳಿತ ಮಂಡಳಿ ತಿಳಿಸಿದೆ. ಒಂದು ಡೋಸ್‌ ಲಸಿಕೆ ವ್ಯರ್ಥವಾದರೆ, ಆಸ್ಪತ್ರೆಗೆ 630 ರೂ. ನಷ್ಟವಾಗುತ್ತದೆ. ಲಸಿಕೆ ಶುಲ್ಕ ಮತ್ತು ಸೇವಾ ಶುಲ್ಕ 150 ರೂ. ಸೇರಿ ಒಂದು ಡೋಸ್‌ ಕೋವಿಶೀಲ್ಡ್‌ ಲಸಿಕೆಗೆ ಖಾಸಗಿ ಆಸ್ಪತ್ರೆಯಲ್ಲಿ780 ರೂ. ಪಡೆಯಲಾಗುತ್ತಿದೆ.

ಖರೀದಿಸುವಂತೆ ಸರಕಾರಕ್ಕೆ ಮನವಿ:
ಲಸಿಕೆ ಪಡೆಯುವವರ ಸಂಖ್ಯೆ ತೀವ್ರವಾಗಿ ಕುಸಿದಿದೆ. ಸಂಗ್ರಹದಲ್ಲಿ ಇದ್ದ ಲಸಿಕೆಯನ್ನು ನಮ್ಮ ಸಹೋದರ ಸಂಸ್ಥೆಯ ಖಾಸಗಿ ಆಸ್ಪತ್ರೆಗಳಿಗೆ ಮರು ಹಂಚಿಕೆ ಮಾಡಿದ್ದೇವೆ. ಲಸಿಕೆ ವ್ಯರ್ಥವಾಗುವ ಬದಲು ಖಾಸಗಿ ಆಸ್ಪತ್ರೆಗಳಿಂದ ರಾಜ್ಯ ಸರಕಾರ ಖರೀದಿಸಬೇಕು ಎಂದು ಖಾಸಗಿ ಆಸ್ಪತ್ರೆಯ ಆಡಳಿತ ಮಂಡಳಿ ಮನವಿ ಮಾಡಿದೆ.

ಶೇ.0.3ರಷ್ಟು ಕೋವಿಡ್‌ ಲಸಿಕೆ ವ್ಯರ್ಥ:
ಖಾಸಗಿ ಆಸ್ಪತ್ರೆಗಳಿಂದ ಲಸಿಕೆ ಖರೀದಿಸಲು ಸರಕಾರದಲ್ಲಿ ಯಾವುದೇ ಅವಕಾಶವಿಲ್ಲ. ಅದನ್ನು ಖಾಸಗಿ ಆಸ್ಪತ್ರೆಗಳೇ ವಿನಿಯೋಗಿಸಬೇಕು. ಶೇ.0.3ರಷ್ಟು ಕೋವಿಡ್‌ ಲಸಿಕೆ ವ್ಯರ್ಥವಾಗುತ್ತಿದೆ. ಈ ಪ್ರಮಾಣದ ವ್ಯರ್ಥವು ಸದ್ಯ ಮಿತಿಯನ್ನು ಮೀರಿಲ್ಲ ಎಂದು ರಾಷ್ಟ್ರೀಯ ಆರೋಗ್ಯ ಮಿಷನ್‌ನ ಕರ್ನಾಟಕ ಮಿಷನ್‌ ನಿರ್ದೇಶಕಿ ಡಾ. ಅರುಂಧತಿ ಚಂದ್ರಶೇಖರ್‌ ತಿಳಿಸಿದರು.
ನಮ್ಮ ಸಿಬ್ಬಂದಿ ಎರಡೂ ಡೋಸ್ ಕೊರೊನಾ ಲಸಿಕೆ ಪಡೆದಿದ್ದಾರೆ: ಮೈಸೂರಿನ ಮಳಿಗೆಗಳಲ್ಲಿ ಬೋರ್ಡ್..!
ಎರಡನೇ ಡೋಸ್‌ ಲಸಿಕೆ ಪಡೆಯದವರ ವಿವರ ಖಾಸಗಿ ಆಸ್ಪತ್ರೆಗಳ ಬಳಿ ಕೂಡ ಇವೆ. ಅಂಥವರಿಗೆ ಕರೆ ಮಾಡಿ ಎರಡನೇ ಡೋಸ್‌ ಲಸಿಕೆ ಪಡೆಯಲು ಮನವೊಲಿಸಬೇಕು. ಈ ಮೂಲಕ ಲಸಿಕೆ ವ್ಯರ್ಥವಾಗುವುದನ್ನು ತಪ್ಪಿಸಬೇಕು,'' ಎಂದು ಬಿಬಿಎಂಪಿ ವಿಶೇಷ ಆಯುಕ್ತ(ಆರೋಗ್ಯ) ಡಾ. ಕೆ.ವಿ.ತ್ರಿಲೋಕ ಚಂದ್ರ ಸಲಹೆ ನೀಡಿದರು. ಹೆಚ್ಚಿನ ಪ್ರಕರಣಗಳಲ್ಲಿ ನಮ್ಮ ಆಸ್ಪತ್ರೆಯಲ್ಲಿ ಮೊದಲ ಡೋಸ್‌ ಲಸಿಕೆ ಪಡೆದವರು, ಎರಡನೇ ಡೋಸ್‌ ಅನ್ನು ಮತ್ತೊಂದು ಆಸ್ಪತ್ರೆಯಲ್ಲಿ ಪಡೆದಿದ್ದಾರೆ. ಹೆಚ್ಚಿನವರು ಸರಕಾರಿ ಆಸ್ಪತ್ರೆಯಲ್ಲಿ ಪಡೆದಿದ್ದಾರೆ. ನಾವು ಅವರಿಗೆ ಕರೆ ಮಾಡಿದರೆ ಈಗಾಗಲೇ ಎರಡೂ ಡೋಸ್‌ಗಳನ್ನು ಪಡೆದಿದ್ದೇವೆ ಎಂದು ತಿಳಿಸುತ್ತಾರೆ ಎಂದು ಖಾಸಗಿ ಆಸ್ಪತ್ರೆಯ ಅಧಿಕಾರಿಯೊಬ್ಬರು ವಿವರಿಸಿದರು.

50,000 ಡೋಸ್‌ ಸಂಗ್ರಹನಮ್ಮ ಸಂಗ್ರಹದಲ್ಲಿ50,000 ಡೋಸ್‌ ಕೋವಿಶೀಲ್ಡ್‌ ಲಸಿಕೆ ಇದೆ. ಲಸಿಕೆ ವ್ಯರ್ಥವಾಗುವುದನ್ನು ತಡೆಯಲು ಮೊದಲೇ ಬುಕ್‌ ಮಾಡಿದವರಿಗೆ ಮಾತ್ರ ಲಸಿಕೆ ನೀಡಲಾಗುತ್ತದೆ. ಆಸ್ಪತ್ರೆಯಲ್ಲಿವಾಕ್‌ ಇನ್‌ ಬಂದವರಿಗೆ ಲಸಿಕೆ ನೀಡುತ್ತಿಲ್ಲ. ಕೆಲವೊಮ್ಮೆ ಚಿಕ್ಕ ಪ್ರಮಾಣದಲ್ಲಿಲಸಿಕೆ ವ್ಯರ್ಥವಾಗುತ್ತದೆ. ಆದರೆ ಲಸಿಕೆ ವ್ಯರ್ಥವಾಗುವುದರಿಂದ ರಾಷ್ಟ್ರಕ್ಕೆ ದೊಡ್ಡ ನಷ್ಟ,'' ಎಂದು ಸ್ಪರ್ಶ ಆಸ್ಪತ್ರೆಯ ಅಧ್ಯಕ್ಷ ಡಾ. ಶರಣ್‌ ಪಾಟೀಲ್‌ ಮಾಹಿತಿ ನೀಡಿದರು.