ಆಟೋಗಳ ಡಬ್ಬಲ್‌ ಮೀಟರ್‌ ದಂಧೆ ಮತ್ತೆ ಶುರು

ಬೆಂಗಳೂರು: ನಗರ ಪೊಲೀಸರು ಚುನಾವಣೆ, ಭದ್ರತೆ ಎಂದೆಲ್ಲ ಬ್ಯುಸಿಯಾಗಿರುವ ವೇಳೆಯಲ್ಲಿ, ಮೆಜೆಸ್ಟಿಕ್‌ ಸುತ್ತಮುತ್ತ ಆಟೊ ಚಾಲಕರು ಮೊದಲಿನಂತೆ ಡಬ್ಬಲ್‌ ಮೀಟರ್‌ ದರ ಪಡೆಯುವ ಚಾಳಿಗೆ ಬಿದ್ದಿದ್ದಾರೆ.

ಕೆಎಸ್‌ಆರ್‌ಟಿಸಿ ಬಸ್‌ಸ್ಟ್ಯಾಂಡ್‌, ಬಿಎಂಟಿಸಿ ಮತ್ತು ರೈಲು ನಿಲ್ದಾಣಗಳ ಜತೆಗೆ ಖಾಸಗಿ ಬಸ್‌ಗಳು ನಿಲುಗಡೆ ಮಾಡುವ ಸ್ಥಳಗಳಲ್ಲಿ ಬೆಳಗ್ಗೆ 6 ಗಂಟೆಯಿಂದಲೇ ಆಟೊ ಚಾಲಕರು ಡಬ್ಬಲ್‌ ಮೀಟರ್‌ ಸುಲಿಗೆ ನಡೆಸುತ್ತಿದ್ದರು. ಈ ಬಗ್ಗೆ ವ್ಯಾಪಕ ದೂರುಗಳು ಕೇಳಿ ಬಂದ ಹಿನ್ನೆಲೆಯಲ್ಲಿ ಸಂಚಾರ ವಿಭಾಗದ ಪೊಲೀಸರು ಮಫ್ತಿ ಕಾರ್ಯಾಚರಣೆ ನಡೆಸಿ ಸುಲಿಗೆಗೆ ಬ್ರೇಕ್‌ ಹಾಕಿದ್ದರು. ಜತೆಗೆ ನಗರದ ನಾನಾ ಭಾಗಗಳಲ್ಲಿ ವಿಶೇಷ ಕಾರ್ಯಾಚರಣೆ ನಡೆಸಿ ಪ್ರಯಾಣಿಕರ ನೆರವಿಗೆ ಧಾವಿಸಿದ್ದರು. ಆದರೆ, ಇದೀಗ ಆಟೊ ಚಾಲಕರು ಮತ್ತೆ ಹೆಚ್ಚು ದರವನ್ನು ಪಡೆಯುವ ಕಾರ್ಯಕ್ಕೆ ಇಳಿದಿದ್ದಾರೆ.

ಪೊಲೀಸ್‌, ಡೋಂಟ್‌ ಕೇರ್‌!

ಕೆಎಸ್‌ಆರ್‌ಟಿಸಿ ಬಸ್‌ ನಿಲ್ದಾಣದ ಎದುರಿಗೇ ಮುಂಗಡ ಪಾವತಿ ಆಟೊ ನಿಲ್ದಾಣವಿದೆ. ಭಾನುವಾರ ಅದಕ್ಕೆ ರಜೆ. ಮುಂಗಡ ಪಾವತಿ ನಿಲ್ದಾಣದಿಂದ ಹತ್ತೆಜ್ಜೆ ಮುಂದೆ, ನಿಲ್ಲುವ ಆಟೊ ಚಾಲಕರು ಕೇಳುವ ಮೀಟರ್‌ ರೇಟಿಗೆ ಮಿತಿಯೇ ಇಲ್ಲ. ರಾತ್ರಿ 10 ಗಂಟೆ ನಂತರ ಒಂದೂವರೆ ಪಟ್ಟು ಹಣ ಕೇಳುವುದು ಮಾಮೂಲು. ಆದರೆ ಹಗಲಲ್ಲೇ ಡಬ್ಬಲ್‌ ಮೀಟರ್‌ ಕೇಳುತ್ತಾರೆ. ''ನೀವು ಅನ್ಯಾಯ ಮಾಡುತ್ತಿದ್ದೀರಿ, ಪೊಲೀಸರಿಗೆ ಹೇಳುತ್ತೇವೆ,'' ಎಂದು ಚಾಲಕರಿಗೆ ಕೇಳಿದರೆ, ಅವರೇ ''ಅಲ್ಲೇ ನಿಂತಿದ್ದಾರೆ ನೋಡಿ ಸರ್‌, ಪೊಲೀಸ್‌. ಗಿರೀಶ್‌ ಅಂತ ಅವರ ಹೆಸರು. ಅವರಿಗೆ ಹೋಗಿ ಹೇಳಿ. ನಮ್ಮ ಆಟೊ ನಂಬರ್‌ ಬರೆದುಕೊಂಡು ಹೋಗಿ ಹೇಳಿ,'' ಎಂದು ದಬಾಯಿಸುತ್ತಾರೆ. ಈ ಬಗ್ಗೆ ಎದುರಿಗೇ ನಿಂತಿದ್ದ ಕರ್ತವ್ಯ ನಿರತ ಪೇದೆ ಬಳಿ ದೂರು ನೀಡಲು ಹೋದಾಗ ಅವರ ಹೆಸರು ಗಿರೀಶ್‌ ಎಂದಾಗಿತ್ತು. ಆಟೊ ಚಾಲಕರ ವರ್ತನೆಯನ್ನು ಅವರಲ್ಲಿ ಹೇಳಿದರೆ ''ಹೋಗಿ ಸ್ಟೇಷನ್‌ನಲ್ಲಿ ಕಂಪ್ಲೇಂಟ್‌ ಕೊಡಿ,'' ಎನ್ನುವ ಉಡಾಫೆ ಉತ್ತರ ನೀಡಿ ಮತ್ತೆ ಕತ್ತು ಬಗ್ಗಿಸಿ ಮೊಬೈಲ್‌ ನೋಡುತ್ತಾ ನಿಂತರು ಎಂದು ನೊಂದ ಹಿರಿಯ ನಾಗರಿಕರೊಬ್ಬರು ದೂರಿದ್ದಾರೆ.

ಈ ಘಟನೆ ನಡೆದಿದ್ದು ಭಾನುವಾರ. ಹಿರಿಯ ನಾಗರಿಕರ ದೂರಿನ ನಂತರ 'ವಿಜಯ ಕರ್ನಾಟಕ' ಸಂಬಂಧಪಟ್ಟ ಠಾಣೆಗೆ ಕರೆ ಮಾಡಿ ಗಿರೀಶ್‌ ಕೆ ಎನ್ನುವ ಪೇದೆ ಭಾನುವಾರ ಸಂಜೆ ಕೆಎಸ್‌ಆರ್‌ಟಿಸಿ ಬಸ್‌ ಸ್ಟ್ಯಾಂಡ್‌ನಲ್ಲಿ ಕರ್ತವ್ಯದಲ್ಲಿದ್ದರೇ? ಎಂದು ಪರೀಕ್ಷಿಸಿತ್ತು. ಆ ದಿನ ಕರ್ತವ್ಯದಲ್ಲಿದ್ದವರು ಅದೇ ಹೆಸರಿನ ಪೇದೆಯಾಗಿದ್ದರು.

ಸುಮಾರು ಹತ್ತು ಹನ್ನೆರಡು ಆಟೊ ಚಾಲಕರಿಗೆ ಕೇಳಿದರೆ, ಎಲ್ಲರೂ ಡಬ್ಬಲ್‌ ಮೀಟರ್‌ಗೇ ಬೇಡಿಕೆ ಇಟ್ಟರೆ, ಕೆಲವರು ದುರಾಸೆಗೆ ಬಿದ್ದು 120 ರೂ. ಚಾರ್ಜ್‌ ಆಗುವ ಜಾಗಕ್ಕೆ ಬರೋಬ್ಬರಿ 300 ರೂ. ಬಾಡಿಗೆ ಕೇಳಿದರು ಎಂದು ಆ ಹಿರಿಯ ನಾಗರಿಕರು ಅಳಲು ತೋಡಿಕೊಂಡಿದ್ದಾರೆ.

ಆ ನಂತರ ಪತ್ರಿಕೆ ಬಗ್ಗೆ 'ರಿಯಾಲಿಟಿ ಚೆಕ್‌' ನಡೆಸಿದಾಗಲೂ ಆಟೊ ಚಾಲಕರು ಹಗಲಲ್ಲೇ ಡಬ್ಬಲ್‌ ಮೀಟರ್‌ ಕೇಳುತ್ತಿರುವುದು ದೃಢಪಟ್ಟಿದೆ.