ಅಲ್ಲಲ್ಲಿ ತುಂತುರು ಮಳೆ ಸಾಧ್ಯತೆ

ಬೆಂಗಳೂರು: ಪಕ್ಕದ ರಾಜ್ಯಗಳಾದ ಆಂಧ್ರಪ್ರದೇಶ, ತಮಿಳುನಾಡು, ಕೇರಳದಲ್ಲಿ ಬಿಸಿಗಾಳಿ ಬೀಸಲು ಆರಂಭವಾದರೂ ನಗರಕ್ಕೆ ಬಿಸಿಗಾಳಿಯ ಆತಂಕವಿಲ್ಲ.

ಪ್ರತಿ ವರ್ಷ ಪಕ್ಕದ ರಾಜ್ಯದಲ್ಲಿ ಬಿಸಿಗಾಳಿ ಬಂದರೂ ಅದು ರಾಜ್ಯದೊಳಗೆ ಬರುವುದಿಲ್ಲ. ಉತ್ತರ ಕರ್ನಾಟಕದಲ್ಲಿ ಮಾತ್ರ ಆಂಧ್ರಪ್ರದೇಶದ ಬಿಸಿಗಾಳಿಯಿಂದ ತಾಪಮಾನ ಮೇಲಕ್ಕೇರುತ್ತದೆ. ದಕ್ಷಿಣ ಭಾಗದಲ್ಲಿ ತಮಿಳುನಾಡಿನಲ್ಲಿ ಬಿಸಿಗಾಳಿ ಇದ್ದರೂ ನಗರಕ್ಕೆ ಅದರಿಂದ ಯಾವುದೇ ಪರಿಣಾಮವಿಲ್ಲ. ನಗರದಲ್ಲಿ ಸಹಜವಾಗಿ ಬೇಸಿಗೆಯಲ್ಲಾಗುವಂತೆ ತಾಪಮಾನ 34 ಡಿಗ್ರಿ ಆಸುಪಾಸಿನಲ್ಲೇ ಇದೆ.

ಮಳೆ ಪರಿಣಾಮ: ಕೆಲ ದಿನಗಳಿಂದ ತಾಪಮಾನ 34 ಡಿಗ್ರಿಯಲ್ಲೇ ಮುಂದುವರಿದಿದೆ. ಮಾರ್ಚ್‌ ಮಧ್ಯಭಾಗದಲ್ಲಿ ಸ್ವಲ್ಪಮಟ್ಟಿಗೆ ಏರುವ ಸಾಧ್ಯತೆ ಇದೆ. ಸದ್ಯಕ್ಕೆ ತಾಪಮಾನ ಏರದೇ ಇರುವುದಕ್ಕೆ ತುಂತುರು ಮಳೆ ಕಾರಣವಾಗಿದೆ. ರಾಜ್ಯದಲ್ಲಿ ದಟ್ಟ ಮೋಡಗಳ ಸಾಲು ಸೃಷ್ಟಿಯಾಗಿದ್ದು, ಅಲ್ಲಲ್ಲಿ ಮಳೆ ಸುರಿಯುತ್ತಿದೆ. ಸೋಮವಾರ ರಾತ್ರಿ ನಗರದಲ್ಲಿ ಕೆಲ ಭಾಗಗಳಲ್ಲಿ ತುಂತುರು ಮಳೆಯಾಗಿದೆ. ಇದರಿಂದಾಗಿ ತಾಪಮಾನ ಮತ್ತೆ ಮೇಲಕ್ಕೇರಿಲ್ಲ.

ಗರಿಷ್ಠ ತಾಪಮಾನ(ಡಿಗ್ರಿ ಸೆಲ್ಸಿಯಸ್‌)

ನಗರದ ಕೇಂದ್ರಭಾಗ-34.3

ಎಚ್‌ಎಎಲ್‌-33.8

ಕೆಐಎಎಲ್‌-35.1