12,500 ಸವಾರರಿಗೆ ದಂಡ, 8 ಎಫ್‌ಐಆರ್‌
ಬೌನ್ಸ್ ಸ್ಕೂಟರ್‌ಗಳ ದುರುಪಯೋಗ, ಸಂಚಾರ ನಿಯಮ ಉಲ್ಲಂಘನೆ, ತಪ್ಪು ಮಾಹಿತಿ, ವಾಹನಗಳನ್ನು ಡ್ಯಾಮೇಜ್‌ ಮಾಡಿರುವುದೂ ಸೇರಿದಂತೆ ಇನ್ನಿತರ ಪ್ರಕರಣಗಳಲ್ಲಿಈವರೆಗೆ ಒಟ್ಟು 12,500 ಜನರಿಗೆ ದಂಡ ವಿಧಿಸಿ ಅವರನ್ನು ಮತ್ತೊಮ್ಮೆ ಬೌನ್ಸ್ ಬಳಕೆ ಮಾಡದಂತೆ ಮಾಡಲಾಗಿದೆ. ಅಲ್ಲದೆ, ಬೌನ್ಸ್ ಸ್ಕೂಟರ್‌ಗಳ ಕಳವು ಸಂಬಂಧ 8 ಎಫ್‌ಐಆರ್‌ ದಾಖಲಿಸಲಾಗಿದೆ. ಪ್ರತಿನಿತ್ಯ ಸುಮಾರು 20 ವಾಹನಗಳು ಹಾಳಾಗುತ್ತಿವೆ. ಅಲ್ಲದೆ, ಸುಮಾರು 20 ಸಂಚಾರ ನಿಯಮ ಉಲ್ಲಂಘನೆ ನೋಟಿಸ್‌ಗಳು ಬರುತ್ತಿವೆ. ಸಂಚಾರ ನಿಯಮ ಉಲ್ಲಂಘಿಸಿದ ಸವಾರರಿಂದಲೇ ದಂಡ ಕಟ್ಟಿಸಲಾಗುತ್ತದೆ ಎಂದು ಅನಿಲ್‌ ವಿವರಿಸಿದರು.
ಫ್ಲೈಓವರ್‌, ಅಂಡರ್‌ಪಾಸ್‌ ಮೇಲೆ ನಿಲ್ಲಿಸದಂತೆ ಕ್ರಮ
ಫ್ಲೈಓವರ್‌, ಅಂಡರ್‌ಪಾಸ್‌ನಲ್ಲಿ ಬೌನ್ಸ್ ಸ್ಕೂಟರ್ ನಿಲುಗಡೆ ಮಾಡಲಾಗುತ್ತದೆ. ಇಂಧನ ಖಾಲಿಯಾಗದೇ ಇದ್ದರೂ, ಯಾವುದೇ ಸಮಸ್ಯೆ ಇಲ್ಲದಿದ್ದರೂ ಕೆಲವರು ವಾಹನಗಳನ್ನು ನಿಷಿದ್ಧ ಸ್ಥಳದಲ್ಲಿ ಪಾರ್ಕಿಂಗ್‌ ಮಾಡುತ್ತಿದ್ದಾರೆ. ದುರುದ್ದೇಶದಿಂದ ಪಾರ್ಕಿಂಗ್‌ ಮಾಡುವವರೇ ಹೆಚ್ಚು. ಅಂಥವರನ್ನು ಕಪ್ಪು ಪಟ್ಟಿಗೆ ಸೇರಿಸಲಾಗುತ್ತಿದೆ.
ಸೆನ್ಸರ್‌, ಜಿಪಿಎಸ್‌ ಮೂಲಕ ಪತ್ತೆ
ಬೌನ್ಸ್ ಸ್ಕೂಟರ್‌ಗಳು ಸಂಪೂರ್ಣ ಸಾಫ್ಟ್‌ವೇರ್‌ ಮತ್ತು ತಂತ್ರಜ್ಞಾನ ಆಧಾರಿತವಾಗಿ ಸಂಚರಿಸುತ್ತವೆ. ಜಿಪಿಎಸ್‌ ಕತ್ತರಿಸಿ, ಸಂಪರ್ಕ ಡೈರೆಕ್ಟ್ ಮಾಡಿಕೊಂಡು ಕಳ್ಳತನ ಮಾಡಲು ಯತ್ನಿಸಿದರೆ ಕೂಡಲೇ ಸೆನ್ಸರ್‌ ಅಲರ್ಟ್‌ ಸಂದೇಶ ಕಳುಹಿಸುತ್ತದೆ. ಬುಕ್ಕಿಂಗ್‌ ಇಲ್ಲದೇ ಸ್ಕೂಟರ್ ಸಂಚರಿಸುತ್ತಿರುವ ಮಾಹಿತಿ ಆಧರಿಸಿ ಅವರನ್ನು ಫೀಲ್ಡ್‌ನಲ್ಲಿರುವ ನಮ್ಮ ತಂಡದವರು ಪತ್ತೆ ಮಾಡುತ್ತಾರೆ ಎಂದು ಬೌನ್ಸ್ ಸಿಒಒ ಅನಿಲ್‌ ವಿವರಿಸಿದರು.
ಬೌನ್ಸ್ ಬಳಕೆದಾರರ ಮಾಹಿತಿ
-35 ವರ್ಷದೊಳಗಿನವರು - ಶೇ.90ರಷ್ಟು ಮಂದಿ
-ಕೊನೆಯ ಹಂತದ ಸಂಪರ್ಕ ಉದ್ದೇಶಕ್ಕಾಗಿ - ಶೇ.45ರಷ್ಟು ಮಂದಿ
-ವಾರ್ಷಿಕ ಆದಾಯ 5 ಲಕ್ಷ ರೂ. ಒಳಗಿನವರು - ಶೇ.75ರಷ್ಟು ಮಂದಿ
-ದಿನನಿತ್ಯದ ಕೆಲಸದ ಉದ್ದೇಶಕ್ಕಾಗಿ - ಶೇ.63ರಷ್ಟು ಮಂದಿ
-ವೃತ್ತಿಪರರು, ಬಿಸಿನೆಸ್‌ ಮಾಡುವವರು- ಶೇ.75ರಷ್ಟು ಮಂ ದಿ
-ರೈಲು, ಬಸ್‌, ಐಟಿ ಕಚೇರಿ, ಮಾಲ್‌ ಸೇರಿ ಒಟ್ಟು 250 ಸ್ಥಳಗಳಲ್ಲಿ ಪಾರ್ಕಿಂಗ್‌
-ಒಂದು ಸ್ಕೂಟರ್ ದಿನಕ್ಕೆ ಹತ್ತಕ್ಕೂ ಹೆಚ್ಚು ಜನ ಬಳಸುತ್ತಿದ್ದಾರೆ.
ನೋ ಪಾರ್ಕಿಂಗ್‌ಗೆ ಜಿಯೋ ಫೆನ್ಸಿಂಗ್‌
''ಬೆಂಗಳೂರು ನಗರದ 700 ಚದರ ಮೀಟರ್‌ ವ್ಯಾಪ್ತಿಯಲ್ಲಿ ಬೌನ್ಸ್ ಕಾರ್ಯಾಚರಿಸುತ್ತಿದೆ. ನೋಪಾರ್ಕಿಂಗ್‌ ಸ್ಥಳಗಳು, ಫ್ಲೈಓವರ್‌, ಅಂಡರ್‌ಪಾಸ್‌ಗಳಲ್ಲಿ ವಾಹನ ನಿಲುಗಡೆ ಮಾಡದಂತೆ ಜಿಯೋ ಫೆನ್ಸಿಂಗ್‌ ಮಾಡಲಾಗುತ್ತದೆ. ನಿಷಿದ್ಧ ಸ್ಥಳದಲ್ಲಿ ಪಾರ್ಕಿಂಗ್‌ ಮಾಡಲು ಹೋದರೆ ಟ್ರಿಪ್‌ ಮುಕ್ತಾಯವಾಗುವುದಿಲ್ಲ. ಬೇರೆಡೆ ನಿಲುಗಡೆ ಮಾಡಲು ತಿಳಿಸಲಾಗುತ್ತದೆ. ನಿಯಮ ಉಲ್ಲಂಘಿಸಿದರೆ ದಂಡ ವಿಧಿಸಲಾಗುತ್ತದೆ. ಸಂಚಾರ ಪೊಲೀಸರು ವಾಹನ ಟೋಯಿಂಗ್‌ ಮಾಡಿದರೆ ಅದರ ಶುಲ್ಕವನ್ನು ಸವಾರರಿಂದಲೇ ಭರಿಸಲಾಗುತ್ತದೆ. ಪ್ರತಿಯೊಂದು ಬಳಕೆದಾರನ ಡಿಎಲ್‌ ಮಾಹಿತಿಯನ್ನು ಸರಕಾರದ ವೆಬ್‌ಸೈಟ್‌ ಮೂಲಕ ಪರಿಶೀಲನೆಗೆ ಒಳಪಡಿಸಿಯೇ ಬಳಕೆಗೆ ಒದಗಿಸಲಾಗುತ್ತದೆ'' ಎಂದು ಬೌನ್ಸ್ ಸಿಒಒ ಅನಿಲ್‌ ತಿಳಿಸಿದರು.