ಬೆಂಗಳೂರಿನ ರಸ್ತೆಗಿಳಿಯಲಿವೆ ಎಲೆಕ್ಟ್ರಿಕ್ ಬಸ್‌ಗಳು, ಏನಿದರ ವಿಶೇಷತೆ?

ಬೆಂಗಳೂರು: ರಾಜ್ಯ ರಾಜಧಾನಿ ಬೆಂಗಳೂರಿನ ರಸ್ತೆಯಲ್ಲಿ ಇನ್ಮುಂದೆ ಎಲೆಕ್ಟ್ರಿಕ್ ಬಸ್‌ಗಳನ್ನು ಸದ್ದು ಮಾಡಲಿವೆ. ಹೌದು ಇಂತಹದೊಂದು ಯೋಜನೆಗೆ ಸರ್ಕಾರ ಚಾಲನೆ ನೀಡಿದ್ದು ಅದರ ಪರೀಕ್ಷಾರ್ಥ ಪ್ರಯೋಗವೂ ನಡೆಯಲಿದೆ.

ಕೇಂದ್ರ ಸರ್ಕಾರದ ಭಾರೀ ಕೈಗಾರಿಕಾ ಇಲಾಖೆ ಮೂಲಕ ಓಪೆಕ್ಸ್ ಮಾದರಿಯಲ್ಲಿ ಎಲೆಕ್ಟ್ರಿಕ್ ಬಸ್‌ಗಳನ್ನು ನಿಯೋಜಿಸಲು ರಾಜ್ಯ ಸರ್ಕಾರಕ್ಕೆಆರ್ಥಿಕ ಪ್ರೋತ್ಸಾಹ ಒದಗಿಸಲಿದೆ. ಫೇಮ್-2 ಯೋಜನೆ ಅಡಿಯಲ್ಲಿ ಬೃಹತ್ ಕೈಗಾರಿಕೆ ಇಲಾಖೆ ಪ್ರತಿ ಬಸ್‌ಗೆ 55 ಲಕ್ಷ ಪ್ರೋತ್ಸಾಹ ಧನವನ್ನು ನೀಡಲಿದೆ.

ಬಿಎಂಟಿಸಿಗೆ ಎಲೆಕ್ಟ್ರಿಕ್‌ ಬಸ್‌ ಸೇರ್ಪಡೆ: ನಮ್ಮ ಬೆಂಗಳೂರು ಪ್ರತಿಷ್ಠಾನ ಸ್ವಾಗತ

ಕೇಂದ್ರ ಸರ್ಕಾರ 300 ಎಲೆಕ್ಟ್ರಿಕ್ ಬಸ್‌ಗಳಿಗೆ ಫೇಮ್ 2 ಯೋಜನೆಯಡಿ ಮಂಜೂರಾತಿ ನೀಡಿದ್ದು, ಕರ್ನಾಟಕ ಸರ್ಕಾರ 2020-21 ನೇ ಸಾಲಿನ ಆಯವ್ಯಯದಲ್ಲಿ ಫೇಮ್ - 2 ಅಡಿಯಲ್ಲಿ ಎಲೆಕ್ಟ್ರಿಕ್ ಬಸ್ಸಗಳನ್ನು ಜಿಸಿಸಿ ಆಧಾರದ ಮೇಲೆ 500 ಬಸ್ಸುಗಳ ಕಾರ್ಯಾಚರಣೆಗೆ 100 ಕೋಟಿ ಆರ್ಥಿಕ ಸಹಾಯ ನೀಡಲು ಅನುಮೋದನೆ ನೀಡಿದೆ.

ಹೇಗಿರಲಿದೆ ಎಲೆಕ್ಟ್ರಿಕ್ ಬಸ್‌ಗಳು?

ಪರಿಸರದ ದೃಷ್ಟಿಯಲ್ಲಿ ಎಲೆಕ್ಟ್ರಿಕ್‌ ಬಸ್‌ಗಳು ಪರಿಣಾಮಕಾರಿಯಾಗಿವೆ. ಈ ದೃಷ್ಟಿಯಿಂದಲೇ ಎಲೆಕ್ಟ್ರಿಕ್‌ ಬಸ್‌ಗಳ ಸಂಚಾರಕ್ಕೆ ಹೆಚ್ಚಿನ ಪ್ರೋತ್ಸಾಹ ನೀಡಲಾಗುತ್ತಿದೆ. ಬೆಂಗಳೂರಿನಲ್ಲಿ ಕಾರ್ಯಾಚರಣೆ ನಡೆಸಲಿರುವ ಹವಾ ನಿಯಂತ್ರಿತ ಎಲೆಕ್ಟ್ರಿಕ್ ಬಸ್ಸಿನ ಉದ್ದ 12 ಮೀಟರ್‌ ಇದ್ದು ಫ್ಲೋರ್ ಎತ್ತರ 400 ಮಿ.ಮೀ ಇರುತ್ತದೆ.

34 ಪ್ಲಸ್ 1 ಪ್ರಯಾಣಿಕರ ಆಸನ ವ್ಯವಸ್ಥೆಗಳನ್ನು ಈ ಬಸ್‌ ಹೊಂದಿದೆ. ಅಲ್ಲದೆ ಆಟೋಮ್ಯಾಟಿಕ್ ಗೇರ್ ವ್ಯವಸ್ಥೆ ಹೊಂದಿದ್ದು ಒಂದು ಬಾರಿ 200-300 ಕಿ.ಮೀ ಹವಾ ನಿಯಂತ್ರಣದೊಂದಿದೆ ಚಲಿಸುವ ಸಾಮರ್ಥ್ಯವನ್ನು ಈ ಬಸ್‌ಗಳು ಹೊಂದಿರುತ್ತವೆ. ಬಸ್‌ಗಳಲ್ಲಿ ಒಟ್ಟು 100-125 ರಷ್ಟು ಪ್ರಯಾಣಿಕರು ಸ್ಥಿರ ತೂಕದೊಂದಿದೆ ಪ್ರಯಾಣ ಮಾಡಬಹುದಾಗಿದೆ.