ಗಂಟೆಗೆ 120 ಕಿ.ಮೀ ಓಡುವ ಇ-ಕಾರು ಅಭಿವೃದ್ಧಿಪಡಿಸಿದ ಆರ್‌ವಿ ಕಾಲೇಜು ವಿದ್ಯಾರ್ಥಿಗಳು

ಬೆಂಗಳೂರು: ನಗರದ ಆರ್‌.ವಿ. ಕಾಲೇಜಿನ ವಿದ್ಯಾರ್ಥಿಗಳು ಗಂಟೆಗೆ 120 ಕಿ.ಮೀ ಓಡಬಲ್ಲ ಇ-ಕಾರು ಅಭಿವೃದ್ಧಿಪಡಿಸಿದ್ದಾರೆ. ಐದು ಸೆಕೆಂಡ್‌ನಲ್ಲಿ 75 ಮೀಟರ್‌ ಓಡುವ ಈ ಕಾರು ಒಂದು ಸೀಟ್‌ ಹೊಂದಿದ್ದು, ಜಯನಗರದಲ್ಲಿ ನಡೆಯುತ್ತಿರುವ ಮೂರು ದಿನಗಳ ಎಲೆಕ್ಟ್ರಿಕ್‌ ವೆಹಿಕಲ್ಸ್‌ ಎಕ್ಸ್‌ಪೋನಲ್ಲಿ ಆಕರ್ಷಣೆಯ ಕೇಂದ್ರವಾಗಿದೆ.

ಕಾಲೇಜಿನ ಟೀಂ ಚಿಮೆರಾ ಎಂಬ ಬ್ಯಾನರ್‌ನಡಿ ವಿದ್ಯಾರ್ಥಿಗಳು ಹಳೆಯ ಬಿಡಿಭಾಗಗಳನ್ನು ಜೋಡಿಸಿ ಕಾರನ್ನು ಅಭಿವೃದ್ಧಿಪಡಿಸಿದ್ದು, ಒಂದು ಬಾರಿ ಸಂಪೂರ್ಣ ಚಾರ್ಜ್‌ ಆದರೆ 40 ಕಿ.ಮೀ ದೂರವನ್ನು ಕ್ರಮಿಸುತ್ತದೆ, ಪೂರ್ಣ ಚಾರ್ಜ್‌ ಆಗಲು ನಾಲ್ಕು ಗಂಟೆ ತೆಗೆದುಕೊಳ್ಳುತ್ತದೆ.

ಕಾಲೇಜು ಆವರಣದಲ್ಲೇ ಈ ಕಾರು ವಿನ್ಯಾಸಗೊಳಿಸಲು ಒಂದು ವರ್ಷ ಹಿಡಿದಿದ್ದು, 12 ಲಕ್ಷ ರೂ. ವೆಚ್ಚವಾಗಿದೆ. ಚಾಲಕ ಸೇರಿ ಇದರ ತೂಕ 250 ಕೆ.ಜಿ. ಇದೆ. ಇದು ಅತ್ಯಾಧುನಿಕ ತಂತ್ರಜ್ಞಾನ ಹೊಂದಿದ್ದು, ಮಾಲಿನ್ಯ ಮುಕ್ತ ವಾಹನವಾಗಿದೆ ಎಂದು ಚಿಮೆರಾ ಟೀಂನ ಶ್ರೀಕೇಶ್‌. ಎಸ್‌ ಹೇಳಿದರು.

'ಭವಿಷ್ಯದ ಸಾರಿಗೆ' ಎಂದೇ ಹೇಳಲಾಗುತ್ತಿರುವ ವಿದ್ಯುತ್‌ ಚಾಲಿತ ವಾಹನಗಳ ಬಳಕೆಯನ್ನು ಜನಪ್ರಿಯಗೊಳಿಸುವ ಸಲುವಾಗಿ ಕೇಂದ್ರ ಸರಕಾರದ ಇಂಟರ್‌ನ್ಯಾಷನಲ್‌ ಸೆಂಟರ್‌ ಫಾರ್‌ ಆಟೋಮೋಟಿವ್‌ ಟೆಕ್ನಾಲಜಿ ಮತ್ತು ಅದಮ್ಯ ಚೇತನ ಸಂಸ್ಥೆ ಜಂಟಿಯಾಗಿ ಆಯೋಜಿಸಿದ್ದ 'ಭಾರತದ ಏಳನೇ ವಿದ್ಯುತ್‌ ಚಾಲಿತ ವಾಹನಗಳ ಮೇಳ' ಶುಕ್ರವಾರ ಆರಂಭವಾಯಿತು.

40 ಕಂಪನಿಗಳು ಭಾಗಿ

ದಕ್ಷಿಣ ಭಾರತದ ಅತಿದೊಡ್ಡ ಮೇಳವೆಂದು ಹೇಳಲಾಗುತ್ತಿರುವ ಈ ಮೇಳದಲ್ಲಿ ಸುಮಾರು 40ಕ್ಕೂ ಅಧಿಕ ವಿದ್ಯುತ್‌ ಚಾಲಿತ ವಾಹನಗಳ ತಯಾರಿಕಾ ಕಂಪನಿಗಳು ಭಾಗವಹಿಸಿದ್ದು,ಇ-ರಿಕ್ಷಾ, ಇ-ಮೋಟಾರು ವಾಹನ, ಇ-ಬೈಕ್‌, ಇ-ಸ್ಕೂಟರ್‌, ಇ-ಬೈಸಿಕಲ್‌ ಸೇರಿದಂತೆ ಹಲವು ಬಗೆಯ ವಾಹನಗಳನ್ನು ಪ್ರದರ್ಶನಕ್ಕಿಡಲಾಗಿದೆ. ಇ-ವಾಹನಗಳ ಮೇಳ ದಿಲ್ಲಿ ಮತ್ತು ಮುಂಬಯಿ ಸೇರಿದಂತೆ ಉತ್ತರ ಭಾರತದಲ್ಲಿ ನಡೆಸಲಾಗುತ್ತಿತ್ತು. ಕೇಂದ್ರ ಸಚಿವ ಅನಂತಕುಮಾರ್‌ ಅವರು ಬೆಂಗಳೂರಿನಲ್ಲಿ ನಡೆಸುವಂತೆ ಇಂಟರ್‌ನ್ಯಾಷನಲ್‌ ಸೆಂಟರ್‌ ಫಾರ್‌ ಆಟೋಮೋಟಿವ್‌ ಟೆಕ್ನಾಲಜಿಗೆ ಕೋರಿದ್ದರು. ಅದರಂತೆ ಈ ಮೇಳ ಆಯೋಜಿಸಲಾಗಿದೆ. ಮೇಳದಲ್ಲಿ ವಿದ್ಯುತ್‌ ಚಾಲಿತ ವಾಹನಗಳ ತಯಾರಿಕೆಯಲ್ಲಿ ಮುಂಚೂಣಿಯಲ್ಲಿರುವ ಇ-ಟ್ರಾನ್‌, ಸಾರಥಿ, ವೋಲ್ವೋ ಗ್ರೂಪ್‌ ಮತ್ತಿತರ ಕಂಪನಿಗಳು, ಇತ್ತೀಚೆಗೆ ಅಭಿವೃದ್ಧಿ ಮತ್ತು ವಿನ್ಯಾಸಗೊಳಿಸಿರುವ ಹೊಸ ಬಗೆಯ ಇನ್ನೂ ಮಾರುಕಟ್ಟೆಗೆ ಬಿಡುಗಡೆಯಾಗದ ವಾಹನಗಳನ್ನು ಪ್ರದರ್ಶನಕ್ಕೆ ಇಟ್ಟಿವೆ.