ದಕ್ಷಿಣ ಕೊರಿಯಾ ಕಂಪನಿಯ ಇಮೇಲ್‌ ಹ್ಯಾಕ್‌ ಮಾಡಿ 2.69 ಕೋಟಿ ರೂ. ವಂಚನೆ

ಬೆಂಗಳೂರು: ದಕ್ಷಿಣ ಕೊರಿಯಾ ಮೂಲದ ಬಹುರಾಷ್ಟ್ರೀಯ ಕಂಪನಿಯೊಂದರ ಸೋಗಿನಲ್ಲಿ ಬೆಂಗಳೂರಿನಲ್ಲಿರುವ ಬಹುರಾಷ್ಟ್ರೀಯ ಕಂಪನಿಯ ಜೊತೆ ಇ ಮೇಲ್‌ ಮೂಲಕ ಸಂವಹನ ನಡೆಸಿದ ಸೈಬರ್‌ ಖದೀಮರು, 2.69 ಕೋಟಿ ರೂ.ಯನ್ನು ತಮ್ಮ ಖಾತೆಗೆ ವರ್ಗಾವಣೆ ಮಾಡಿಕೊಂಡು ವಂಚಿಸಿದ್ದಾರೆ.

ಈ ಸಂಬಂಧ ಹಲಸೂರಿನಲ್ಲಿ ಕಚೇರಿ ಹೊಂದಿರುವ ಟಿಎಂಇಐಸಿ ಇಂಡಸ್ಟ್ರೀಯಲ್‌ ಸಿಸ್ಟಮ್ಸ್‌ ಇಂಡಿಯಾ ಪ್ರೈ.ಲಿನ ಹಣಕಾಸು ಅಧಿಕಾರಿ ರಮೇಶ್‌ ರಾಮಚಂದ್ರನ್‌ ಎಂಬುವರು ಸಿಐಡಿ ಸೈಬರ್‌ ಕ್ರೈಂ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ್ದಾರೆ.

ಎಲೆಕ್ಟ್ರಿಕಲ್‌ ಉಪಕರಣಗಳ ಉತ್ಪಾದಿಸುವ ಟಿಎಂಇಐಸಿ ಕಂಪನಿಯು, ದಕ್ಷಿಣ ಕೊರಿಯಾ ಮೂಲದ ಸನಿಲ್‌ ಎಲೆಕ್ಟ್ರಿಕ್‌ ಕಂಪನಿ ಜೊತೆ ಉಪಕರಣಗಳ ಖರೀದಿ ವ್ಯವಹಾರ ನಡೆಸುತ್ತಿದೆ. ನ.1ರಿಂದ ನ.29ರ ನಡುವೆ ಸನಿಲ್‌ ಎಲೆಕ್ಟ್ರಿಕ್‌ ಕಂಪನಿಯ ಹೆಸರಿನಲ್ಲಿ ಎರಡು ಇ ಮೇಲ್‌ ಐಡಿಗಳಿಂದ ಟಿಎಂಇಐಸಿಗೆ ಇ ಮೇಲ್‌ಗಳು ಬಂದಿದ್ದು, ತಾವು ಹಣಕಾಸು ವ್ಯವಹಾರ ನಡೆಸುವ ಬ್ಯಾಂಕ್‌ನ ಖಾತೆಯನ್ನು ಬದಲಿಸಲಾಗಿದೆ. ಈಗ ಖರೀದಿಸಲಾಗುತ್ತಿರುವ ಉಪಕರಣಗಳಿಗೆ ಹಳೆ ಖಾತೆ ಬದಲು ಹೊಸ ಖಾತೆಗೆ ಹಣ ಜಮಾ ಮಾಡಿ ಎಂದು ಸ್ವೀಡನ್‌ ಮೂಲದ ಬ್ಯಾಂಕ್‌ನ ವಿವರಗಳನ್ನು ನೀಡಿದ್ದರು.

ಅದರಂತೆ ಟಿಎಂಇಐಸಿ ಕಂಪನಿಯ ಖಾತೆಯಿಂದ ಹೊಸ ಬ್ಯಾಂಕ್‌ ಖಾತೆಗೆ 3,77,016 ಅಮೆರಿಕನ್‌ ಡಾಲರ್‌ (2.69 ಕೋಟಿ ರೂ.) ಜಮಾ ಮಾಡಲಾಗಿತ್ತು. ಕೆಲ ದಿನಗಳ ನಂತರ ಸನಿಲ್‌ ಎಲೆಕ್ಟ್ರಿಕ್‌ ಕಂಪನಿಯು ತನ್ನ ಬ್ಯಾಂಕ್‌ ಖಾತೆಯನ್ನು ಬದಲಿಸಿಲ್ಲ. ಆದರೆ, ಸೈಬರ್‌ ಖದೀಮರು ಆ ಕಂಪನಿ ನಡೆಸುವ ವ್ಯವಹಾರಗಳನ್ನು ಹ್ಯಾಕ್‌ ಮಾಡಿ, ನಕಲಿ ಇ ಮೇಲ್‌ ಐಡಿ ಮೂಲಕ ಟಿಎಂಇಐಸಿಯನ್ನು ಸಂಪರ್ಕಿಸಿ ವಂಚಿಸಿದ್ದಾರೆ ಎನ್ನುವುದು ಗೊತ್ತಾಗಿದೆ.