ಬೆಂಗಳೂರು ಏರ್‌ಶೋ: ವಿಮಾನ ಸಂಚಾರ ವ್ಯತ್ಯಯ ಸಾಧ್ಯತೆ

ಬೆಂಗಳೂರು: ಫೆ. 20ರಿಂದ 24ರವರೆಗೆ ನಡೆಯಲಿರುವ ಏರೋ ಇಂಡಿಯಾ ಏರ್‌ ಶೋ ಪ್ರಯುಕ್ತ ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಮೂಲಕ ಸಂಚರಿಸುವ 100ಕ್ಕೂ ಅಧಿಕ ವಿಮಾನಗಳ ಸಂಚಾರದಲ್ಲಿ ವ್ಯತ್ಯಯವಾಗಲಿದೆ.

ಏರ್‌ ಶೋ ನಡೆಯುವ ಸಂದರ್ಭದಲ್ಲಿ ಮತ್ತು ಅದಕ್ಕೆ ಪೂರಕವಾಗಿ ಏರ್‌ಸ್ಪೇಸ್ ಅಗತ್ಯವಾಗಿದ್ದು, ಕೆಲವೊಂದು ವಿಮಾನ ಸಂಚಾರ ರದ್ದಾಗಿದ್ದರೆ, ಮತ್ತೆ ಕೆಲವು ವಿಮಾನಗಳ ಸಂಚಾರ ಸಮಯದಲ್ಲಿ ಬದಲಾವಣೆಯಾಗುತ್ತದೆ.

ಏರ್‌ ಶೋದಲ್ಲಿ ಭಾಗವಹಿಸುವ ವಿಮಾನಗಳ ತಾಲೀಮಿಗಾಗಿ ಫೆ. 14ರಿಂದ 17ರವರೆಗೆ ಪ್ರತಿದಿನ ಮಧ್ಯಾಹ್ನ 1.30ರಿಂದ 4.30ರವರೆಗೆ ರನ್‌ವೇ ಮುಚ್ಚಲಾಗುತ್ತದೆ.

ಬಳಿಕ ಫೆ. 18, 19, 21, 22, 23 ಮತ್ತು 24 ಬೆಳಗ್ಗೆ 10ರಿಂದ ಮಧ್ಯಾಹ್ನವರೆಗೆ, ನಂತರ ಮಧ್ಯಾಹ್ನ 2ರಿಂದ ಸಂಜೆ 5ರವರೆಗೆ ರನ್‌ವೇ ಮುಚ್ಚಲಾಗುತ್ತದೆ.


ಫೆ. 20ರಂದು ಏರ್‌ ಶೋ ಉದ್ಘಾಟನೆಯ ಸಂದರ್ಭ ವಿಮಾನ ನಿಲ್ದಾಣ ಮುಚ್ಚಲಾಗುತ್ತದೆ. ವಿಮಾನಗಳ ಸಂಚಾರ ಬದಲಾವಣೆ ಕುರಿತು ಕಂಪನಿಗಳು ಈಗಾಗಲೇ ಪ್ರಯಾಣಿಕರಿಗೆ ಮಾಹಿತಿ ನೀಡಿವೆ. ಜತೆಗೆ ಬೆಂಗಳೂರು ವಿಮಾನ ನಿಲ್ದಾಣ ಭಾಗಶಃ ಮುಚ್ಚುವ ಕುರಿತು ಕೂಡ ಅಂತಾರಾಷ್ಟ್ರೀಯ ಕನ್ಸಲ್ಟೆನ್ಸಿ ಮೂಲಕ ಜಾಗತಿಕ ಬಳಕೆದಾರರಿಗೆ ಮಾಹಿತಿ ಒದಗಿಸಲಾಗಿದೆ.