ದಾಸರಹಳ್ಳಿ ಹೆದ್ದಾರಿ ಪಕ್ಕದಲ್ಲೇ ಕಸ ವಿಂಗಡಣೆ !

ದಾಸರಹಳ್ಳಿ: ಟಿ.ದಾಸರಹಳ್ಳಿಯಲ್ಲಿ ಬೆಂಗಳೂರು-ತುಮಕೂರು ಹೆದ್ದಾರಿಯ ಸರ್ವಿಸ್‌ ರಸ್ತೆ ಪಕ್ಕದಲ್ಲೇ ಬಿಬಿಎಂಪಿ ನೌಕರರು ಕಸ ವಿಂಗಡಣೆ ಮಾಡುತ್ತಿದ್ದು, ಆಸುಪಾಸಿನ ಪರಿಸರದಲ್ಲಿ ವಿಪರೀತ ದುರ್ವಾಸನೆ ಬೀರುತ್ತಿದೆ.

ಸುತ್ತಮುತ್ತಲ ಸ್ಥಳಗಳಿಂದ ಕಸ ತುಂಬಿಕೊಂಡು ಬರುವ ಆಟೋಗಳಲ್ಲಿನ ತ್ಯಾಜ್ಯವನ್ನು ರಸ್ತೆ ಬದಿ ಸುರಿದು, ವಿಂಗಡಿಸಿ ಲಾರಿಗಳಿಗೆ ತುಂಬುವ ಕೆಲಸ ಇಲ್ಲಿ ನಡೆಯುತ್ತದೆ. ಹೆದ್ದಾರಿಯಲ್ಲಿ ಪ್ರತಿದಿನ ಲಕ್ಷಾಂತರ ವಾಹನಗಳು ಸಂಚರಿಸುತ್ತವೆ. ಇವುಗಳಲ್ಲಿ ಸಾಗುವವರೆಲ್ಲರೂ ಮೂಗು ಮುಚ್ಚಿಕೊಂಡೇ ಸಾಗುವಂತಾಗಿದೆ. ಇದೀಗ ಮಳೆ ಬಂದು ತ್ಯಾಜ್ಯದ ನೀರು ರಸ್ತೆಗೂ ಹರಿದು ಬರುತ್ತಿದೆ. ಇದರಿಂದ ಸ್ಥಳೀಯ ನಿವಾಸಿಗಳಿಗೂ ಕಿರಿಕಿರಿ ಆಗುತ್ತಿದೆ.

ಕಸದ ರಾಶಿಯಿಂದ ಸೊಳ್ಳೆ, ನೊಣದಂತಹ ಕ್ರಿಮಿ ಕೀಟಗಳು ಹೆಚ್ಚಾಗಿವೆ. ಹೆದ್ದಾರಿ ಪಕ್ಕವೇ ಕಸ ವಿಂಗಡಣೆ ಮಾಡುತ್ತಿದ್ದರೂ ಬಿಬಿಎಂಪಿ ಹಾಗೂ ಚುನಾಯಿತ ಪ್ರತಿನಿಧಿಗಳು ಮೌನವಹಿಸಿದ್ದಾರೆ. ಸಂಬಂಧಪಟ್ಟವರು ಇನ್ನಾದರೂ ಕಸ ವಿಂಗಡಣೆಗೆ ಪರ್ಯಾಯ ಸ್ಥಳ ಕಂಡುಕೊಂಡು ಜನರಿಗೆ ಎದುರಾಗಿರುವ ಸಮಸ್ಯೆಗೆ ಪರಿಹಾರ ದೊರಕಿಸಬೇಕಿದೆ.