ಖಾರವಾದ ಹಸಿಮೆಣಸಿಕಾಯಿ

ಬೆಂಗಳೂರು: ಬಿಸಿಲಿನ ತಾಪ ಹೆಚ್ಚಾಗುವುದರ ಜತೆ ಜತೆಗೇ ತರಕಾರಿ, ಹೂವು ಮತ್ತಿತರ ಪದಾರ್ಥಗಳ ಬೆಲೆಯೂ ಏರಿಕೆಯಾಗಿದೆ.

ರಣ ಬಿಸಿಲಿನಿಂದಾಗಿ ಹಸಿಮೆಣಸಿಕಾಯಿ ಗಿಡಗಳಲ್ಲಿ ಹೂವು, ಪಿಂದೆ, ಕಾಯಿಗಳು ಉದುರುತ್ತಿವೆ. ಇದರ ಪರಿಣಾಮ ಹಾಪ್‌ಕಾಮ್ಸ್‌ನಲ್ಲಿ ಹಸಿಮೆಣಸಿಕಾಯಿ ಕೆ.ಜಿ.ಗೆ 73 ರೂ. ತಲುಪಿದೆ. ಚಿಲ್ಲರೆ ಮಾರಾಟಗಾರರು 100 ರೂ.ವರೆಗೆ ಮಾರುತ್ತಿದ್ದಾರೆ. ಇದರದೇ ಜಾತಿಯ ಬಜ್ಜಿ ಮೆಣಸಿನಕಾಯಿ ಬೆಳೆಗೂ ಇದೇ ಸ್ಥಿತಿ ಇರುವುದರಿಂದ ಇದರ ಬೆಲೆಯೂ ದುಬಾರಿಯಾಗಿದೆ.

ಗಿಡ ಮತ್ತು ಬಳ್ಳಿ ಜಾತಿಯ ನಾನಾ ತರಕಾರಿಗಳ ಬೆಲೆ ಏರಿಕೆಯಾಗಿದೆ. ಬೀನ್ಸ್‌ ಕೂಡ ವಾರದಿಂದೀಚೆಗೆ ಮತ್ತಷ್ಟು ಏರಿಕೆಯಾಗಿದ್ದು, ಹಾಪ್‌ಕಾಮ್ಸ್‌ನಲ್ಲಿ ಕೆ.ಜಿ.ಗೆ 60 ರೂ. ತಲುಪಿದ್ದು, ಚಿಲ್ಲರೆ ದರದಲ್ಲಿ 80 ರೂ.ವರೆಗೆ ಮಾರುತ್ತಿದ್ದಾರೆ. ಸ್ವಲ್ಪ ಎಳೆಯ ಹಾಗೂ ಗುಣಮಟ್ಟದ ಬೀನ್ಸ್‌ ಗೆ 90 ರೂ.ವರೆಗೆ ದರ ಇದೆ.

ಬಿಸಿಲ ಝಳ ಹೆಚ್ಚಾಗಿರುವುದರಿಂದ ತರಕಾರಿ ಬೆಳೆಗಳಿಗೆ ಸಾಕಷ್ಟು ನೀರು ಬೇಕಾಗುತ್ತದೆ. ಆದರೆ ಬೇಸಿಗೆಯಲ್ಲಿ ಬೋರ್‌ವೆಲ್‌ಗಳು ನೀರಿಲ್ಲದೆ ಬರಿದಾಗುತ್ತಿವೆ. ಬಾವಿಗಳು ಒಣಗಿವೆ. ಹೀಗಾಗಿ ಅಂತರ್ಜಲದ ಸಮಸ್ಯೆಯಿಂದ ತರಕಾರಿ ಬೆಳೆಗಳಿಗೆ ಸಾಕಾಗುವಷ್ಟು ನೀರಿಲ್ಲದೆ ಇಳುವರಿ ಕುಗ್ಗಿದೆ. ಕಲಾಸಿಪಾಳ್ಯ ಮಾರುಕಟ್ಟೆಗೆ ಸುಮಾರು 500 ಗಾಡಿಯಷ್ಟು ಹಣ್ಣು, ತರಕಾರಿ, ಸೊಪ್ಪುಗಳು ಬರುತ್ತಿದ್ದುದು ಇದೀಗ ಸುಮಾರು 300 ಗಾಡಿಗಳಿಗೆ ಇಳಿದಿದೆ. ಇದೀಗ ಶುಭ ಕಾರ್ಯಗಳ ಸೀಸನ್‌ ಆಗಿರುವುದರಿಂದ ಬೇಡಿಕೆ ಹೆಚ್ಚಾಗಿದೆ. ಹೀಗಾಗಿ ತರಕಾರಿ ಬೆಲೆಗಳು ಬಡ ಗ್ರಾಹಕರನ್ನು ತತ್ತರಿಸುವಂತೆ ಮಾಡಿವೆ ಎನ್ನುತ್ತಾರೆ ತರಕಾರಿ ಮಾರಾಟಗಾರ ಶಂಕರಪ್ಪ.

ಮೊಟ್ಟೆ ದರ ಇಳಿಕೆ:
10 ದಿನಗಳ ಹಿಂದೆ ಒಂದು ಮೊಟ್ಟೆಯ ದರ 5.40 ರೂ.ನಿಂದ 6 ರೂ.ವರೆಗೆ ದರವಿತ್ತು. ಇದೀಗ ಕೊಂಚ ಇಳಿಕೆಯಾಗಿದ್ದು, ಚಿಲ್ಲರೆ ದರದಲ್ಲಿ 5 ರೂ.ನಿಂದ 5.50ಗೆ ಇಳಿದಿದೆ. ಹಾಪ್‌ಕಾಮ್ಸ್‌ನಲ್ಲಿ 4.90 ರೂ. ಇದೆ. ಬೇಸಿಗೆಯಲ್ಲಿ ಮೊಟ್ಟೆಯನ್ನು ಹೆಚ್ಚು ದಿನ ಸಂರಕ್ಷಿಸಿಡಲಾಗದು. ಹೀಗಾಗಿ ಬೇಗÜ ಮಾರಾಟ ಮಾಡಬೇಕು. ಇಲ್ಲದಿದ್ದರೆ ಹಾಳಾಗುತ್ತವೆ. ಹಾಗಾಗಿ ಮೊಟ್ಟೆಗಳ ದರ ಕೊಂಚ ಇಳಿಕೆಯಾಗಿದೆ.

ಹಾಪ್‌ಕಾಮ್ಸ್‌ನಲ್ಲಿ ತರಕಾರಿ ದರ (ಕೆ.ಜಿ.ಗಳಲ್ಲಿ)
ಬೀನ್ಸ್‌ 60 ರೂ.
ಹಾಗಲಕಾಯಿ 64 ರೂ.
ಕ್ಯಾಪ್ಸಿಕಂ 60 ರೂ.
ಹೂಕೋಸು ಒಂದಕ್ಕೆ 38 ರೂ.
ಎಲೆಕೋಸು 32 ರೂ.
ಬಜ್ಜಿ ಮೆಣಸಿನಕಾಯಿ 60 ರೂ.
ಹಸಿ ಮೆಣಸಿನಕಾಯಿ 73 ರೂ.
ಕೊತ್ತಂಬರಿ ಸೊಪ್ಪು 55 ರೂ.
ದಂಟು ಸೊಪ್ಪು 52 ರೂ.
ಮೊಟ್ಟೆ 4.90 ರೂ.
ಮೂಲಂಗಿ 30 ರೂ.
ಟೊಮೇಟೊ 22 ರೂ.
ಏಲಕ್ಕಿ ಬಾಳೆಹಣ್ಣು 45 ರೂ.