ಮಧ್ಯರಾತ್ರಿ ಮಹಿಳಾ ಟೆಕ್ಕಿಗೆ ಪುಂಡರಿಂದ ಕಿರುಕುಳ

ಬೆಂಗಳೂರು: ಮಧ್ಯರಾತ್ರಿ 2 ಗಂಟೆ ಸುಮಾರಿಗೆ ಹೋಟೆಲ್‌ನಲ್ಲಿ ಊಟ ಮಾಡಿ ಮನೆಗೆ ಹೊರಟಿದ್ದ ಮಹಿಳಾ ಟೆಕ್ಕಿ ಮತ್ತು ಆಕೆಯ ಸ್ನೇಹಿತನಿಗೆ ನಾಲ್ಕೈದು ಮಂದಿ ಪುಂಡರ ಗ್ಯಾಂಗ್‌ ಕಿರುಕುಳ ನೀಡಿ ದೌರ್ಜನ್ಯ ಎಸಗಿರುವ ಘಟನೆ ತಡವಾಗಿ ಬೆಳಕಿಗೆ ಬಂದಿದೆ.

ಜೀವನ್‌ಬಿಮಾ ನಗರದಲ್ಲಿ ಘಟನೆ ನಡೆದಿದ್ದು ಅಪರಿಚಿತರ ಗ್ಯಾಂಗ್‌ ಒಂದೇ ರಾತ್ರಿಯಲ್ಲಿ ಎರಡು ಕಡೆ ತಮ್ಮ ಮೇಲೆ ಹಲ್ಲೆ ನಡೆಸಿ, ತನ್ನ ಗೆಳತಿಯ ಜತೆ ಅಸಭ್ಯವಾಗಿ ವರ್ತಿಸಿ ದೌರ್ಜನ್ಯ ಎಸಗಿದ್ದಾರೆ ಎಂದು ಸುನಿಲ್‌ ಹೊಸ್ಮನಿ ಎಂಬುವವರು ಜೀವನ್‌ಬಿಮಾ ನಗರ ಠಾಣೆಗೆ ದೂರು ನೀಡಿದ್ದಾರೆ.

ಮೇ 9 ರಂದು ಘಟನೆ ನಡೆದಿದ್ದು ತಡವಾಗಿ ಬೆಳಕಿಗೆ ಬಂದಿದೆ. ಸುನಿಲ್‌ ತನ್ನ ಗೆಳತಿಯ ಜತೆ ಇಂದಿರಾನಗರದ 80 ಅಡಿ ರಸ್ತೆಯಲ್ಲಿರುವ ಎಂಪೈರ್‌ ಹೋಟೆಲ್‌ಗೆ ಊಟಕ್ಕೆ ಹೋಗಿದ್ದರು. ಊಟ ಮುಗಿಸಿ ಹೊರಗೆ ಬರುವಾಗ ಮಧ್ಯರಾತ್ರಿ 2 ಗಂಟೆ ಆಗಿತ್ತು. ಆ ವೇಳೆಯಲ್ಲಿ ಮನೆಗೆ ತೆರಳುವಾಗ ಹೋಟೆಲ್‌ ಮುಂದೆ ನಿಂತಿದ್ದ ನಾಲ್ಕೈದು ಯುವಕರ ಗ್ಯಾಂಗ್‌ ಇಬ್ಬರ ಮೇಲೂ ಹಲ್ಲೆ ನಡೆಸಿ ದೌರ್ಜನ್ಯ ನಡೆಸಿತ್ತು. ಆ ನಂತರ ಇಬ್ಬರೂ ಅಲ್ಲಿಂದ ತಪ್ಪಿಸಿಕೊಂಡು ಮನೆ ಕಡೆ ಹೊರಟಾಗ ಮನೆ ಸಮೀಪವೂ ಮೂವರು ದುಷ್ಕರ್ಮಿಗಳು ಹಲ್ಲೆ ನಡೆಸಿದ್ದರು. ಎರಡೂ ಕಡೆ ಹಲ್ಲೆ ನಡೆಸಿದ್ದು ಒಂದೇ ಗ್ಯಾಂಗಾ ಅಥವಾ ಬೇರೆಯವರೇ ಎನ್ನುವ ಬಗ್ಗೆ ಗೊತ್ತಾಗಿಲ್ಲ. ಘಟನೆ ನಡೆಯುವಾಗಲೇ 'ನಮ್ಮ 100'ಕ್ಕೆ ಕರೆ ಬಂದಿತ್ತು. ಹೊಯ್ಸಳ ಸಿಬ್ಬಂದಿ ತಕ್ಷಣ ಸ್ಥಳಕ್ಕೆ ತೆರಳಿ ಅವರನ್ನು ರಕ್ಷಿಸಿದ್ದಾರೆ. ಹೊಯ್ಸಳ ವಾಹನ ಬರುತ್ತಿರುವುದನ್ನು ದೂರದಿಂದಲೇ ಗಮನಿಸಿದ ಕಿಡಿಗೇಡಿಗಳು ಸ್ಥಳದಿಂದ ಪರಾರಿ ಆಗಿದ್ದಾರೆ. ಆರೋಪಿಗಳ ಬಂಧನಕ್ಕೆ ಬಲೆ ಬೀಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಹೋಟೆಲ್‌ ಬಳಿ ದೌರ್ಜನ್ಯ ನಡೆಸಿದ ಗ್ಯಾಂಗ್‌ ಹಿಂದಿಯಲ್ಲಿ ಮಾತನಾಡುತ್ತಿತ್ತು. ಮನೆ ಬಳಿ ದಾಳಿ ನಡೆಸಿದ ಗ್ಯಾಂಗ್‌ ತಮಿಳಿನಲ್ಲಿ ಮಾತನಾಡುತ್ತಿತ್ತು ಎಂದು ಸುನಿಲ್‌ ನೀಡಿರುವ ದೂರಿನಲ್ಲಿ ವಿವರಿಸಿದ್ದಾರೆ. ಘಟನಾ ಸ್ಥಳದ ಸುತ್ತಮುತ್ತ ಅಳವಡಿಸಲಾಗಿದ್ದ ಸಿಸಿಟಿವಿ ದೃಶ್ಯಾವಳಿಗಳನ್ನು ಸಂಗ್ರಹಿಸಲಾಗಿದೆ. ಆರೋಪಿಗಳ ಬಗ್ಗೆ ಮಾಹಿತಿಯಿದ್ದು, ಸದ್ಯದಲ್ಲೇ ಬಂಧಿಸಲಾಗುವುದು ಎಂದು ಜೆ.ಬಿ.ನಗರ ಪೊಲೀಸರು ತಿಳಿಸಿದ್ದಾರೆ.