ಜೂನ್‌ 1 ವರೆಗೂ ಬಿರುಗಾಳಿ ಸಹಿತ ಮಳೆ ಸಾಧ್ಯತೆ

ಬೆಂಗಳೂರು: ಅರಬ್ಬೀ ಸಮುದ್ರದಲ್ಲಿನ ಮೇಲ್ಮೈ ಸುಳಿಗಾಳಿಯ ಪರಿಣಾಮದಿಂದ ನಗರದಲ್ಲಿ ಬಿರುಗಾಳಿ ಸಹಿತ ಭಾರಿ ಮಳೆ ಮುಂದುವರಿದಿದೆ. ಬುಧವಾರ ಒಂದೆರಡು ಗಂಟೆಗಳಲ್ಲೇ ಕೇಂದ್ರಭಾಗಗಳಲ್ಲಿ ಒಟ್ಟು 17 ಮಿ.ಮೀ. ಮಳೆಯಾಗಿದೆ.

ಮೇಲ್ಮೈ ಸುಳಿಗಾಳಿಯಿಂದಾಗಿ ನಗರದ ಹವಾಮಾನ ಬದಲಾಗಿ ಪ್ರತಿ ದಿನ ಸಂಜೆ ಮಳೆಯಾಗುತ್ತಿದೆ. ಬುಧವಾರ ಸಂಜೆಯಿಂದ ರಾತ್ರಿಯವರೆಗೂ ಬಿಟ್ಟು ಬಿಟ್ಟು ಮಳೆ ಸುರಿಯಿತು. ಜತೆಗೆ ಭಾರಿ ವೇಗದಲ್ಲಿ ಗಾಳಿಯೂ ಬೀಸಿತು. ಕೇಂದ್ರ ಭಾಗಗಳಲ್ಲಿ 17.6 ಮಿ.ಮೀ., ಕೆಐಎಎಲ್‌ ನಲ್ಲಿ 3.4 ಮಿ.ಮೀ. ಮಳೆಯಾಯಿತು.

ಮಳೆಯಿಂದಾಗಿ ತಾಪಮಾನ ಎರಡು ಡಿಗ್ರಿ ಸೆಲ್ಸಿಯಸ್‌‍ನಷ್ಟು ಇಳಿಮುಖವಾಗಿದೆ. ಕೇಂದ್ರಭಾಗಗಳಲ್ಲಿ 32.6 ಡಿಗ್ರಿ ಸೆ., ಕೆಐಎಎಲ್‌ ನಲ್ಲಿ 33.2 ಡಿಗ್ರಿ ಸೆ., ಎಚ್‌‍ಎಎಲ್‌ ನಲ್ಲಿ 32 ಡಿಗ್ರಿ ಸೆ. ತಾಪಮಾನ ದಾಖಲಾಗಿದೆ.

ಮುನ್ಸೂಚನೆ

ಜೂ.1 ರವರೆಗೆ ನಗರದಲ್ಲಿ ಬಿರುಗಾಳಿ ಸಹಿತ ಭಾರಿ ಮಳೆ ಬರುವ ಸಾಧ್ಯತೆ ಇದೆ. ಮಳೆ ಬರುವ ವೇಳೆ ಗಂಟೆಗೆ 40 ರಿಂದ 50 ಕಿ.ಮೀ. ಬೀಸಲಿದೆ ಎಂದು ಹವಾಮಾನ ಇಲಾಖೆ ಮುನ್ಸೂಚನೆ ನೀಡಿದೆ.