ಕಾಲದ ಹೊಡೆತಕ್ಕೆ ಸಿಲುಕದ 'ಕಾಲೆ ಭಾಯಿ ಕಾ ಅಖಾಡಾ'

ಬೆಂಗಳೂರು: ಆಧುನಿಕ ಜಗತ್ತಿನಲ್ಲಿ ಪ್ರತಿಯೊಂದು ಕ್ಷೇತ್ರಗಳಲ್ಲಿ ಸಾಕಷ್ಟು ಬದಲಾವಣೆಯಾಗುತ್ತಿದೆ. ಆದರೆ, ರಾಜಧಾನಿ ಬೆಂಗಳೂರಿನ ಶಿವಾಜಿನಗರದ ಕಿರಿದಾದ ಬೀದಿಯಲ್ಲಿರುವ 80 ವರ್ಷಗಳಷ್ಟು ಹಳೆಯ 'ಕಾಲೆ ಭಾಯಿ ಕಾ ಅಖಾಡಾ' ಎಂಬ ಗರಡಿ ಮನೆ ತನ್ನ ಮೂಲ ಸ್ವರೂಪವನ್ನೇ ಉಳಿಸಿಕೊಂಡು ಬಂದಿದೆ.

ದಿನಗಳು ಕಳೆದಂತೆ ರಾಜಧಾನಿ ಬೆಂಗಳೂರು ವ್ಯಾಪಕವಾಗಿ ಬೆಳೆಯುತ್ತಿದೆ. ವೇಗವಾಗಿ ಬೆಳೆಯುತ್ತಿರುವ ನಗರ ಎಂಬ ಖ್ಯಾತಿ ಪಡೆದುಕೊಂಡಿದ್ದು, ದೇಶದ ವಿವಿಧ ಭಾಗದ ಜನರು ಉದ್ದೋಗ ಅರಸಿ ವಲಸೆ ಬರುತ್ತಿದ್ದಾರೆ. ಇಷ್ಟೊಂದು ಬದಲಾಗಿರುವ ನಗರದಲ್ಲಿ 80 ವರ್ಷಗಳ ಇತಿಹಾಸ ಹೊಂದಿರುವ 'ಕಾಲೆ ಭಾಯಿ ಕಾ ಅಖಾಡಾ'ದಲ್ಲಿ ಯಾವುದೇ ಬದಲಾವಣೆಯಾಗಿಲ್ಲ. ಅದೇ ಹಳೆಯ ಕಟ್ಟಡ, ಸಂಸ್ಕೃತಿಯನ್ನು ಉಳಿಸಿಕೊಂಡು ಬಂದಿರುವುದು ವಿಶೇಷವಾಗಿದೆ.

ಈ ಅಖಾಡಾವನ್ನು ಸುಪ್ರಸಿದ್ಧ ಪೈಲ್ವಾನ್ ಕಾಲೆ ಭಾಯಿ ಅವರು 1937ರಲ್ಲಿ ಸ್ಥಾಪಿಸಿದ್ದರು. ಇದೀಗ ಅಖಾಡವನ್ನು ಪೈಲ್ವಾನ್ ಬಶೀರ್ ಅವರು ನಿರ್ವಹಿಸುತ್ತಿದ್ದಾರೆ. 'ನನಗೆ ನೆನಪಿರುವಂತೆ ಕಳೆದ 80 ವರ್ಷಗಳಿಂದ ಈ ಅಖಾಡ ತನ್ನ ಮೂಲ ಸ್ವರೂಪವನ್ನೇ ಉಳಿಸಿಕೊಂಡು ಬಂದಿದೆ' ಎಂದು ಪೈಲ್ವಾನ್ ಬಶೀರ್ ಹೇಳಿಕೊಂಡಿದ್ದಾರೆ.

ಇತಿಹಾಸದ ಹಿನ್ನೆಲೆ ಹೊಂದಿರುವ ಈ ಅಖಾಡದಲ್ಲಿ ಹಲವು ಬಗೆಯ ಪೈಲ್ವಾನ್‌ರನ್ನು ಕಾಣಬಹುದಾಗಿದೆ. ಈ ಅಖಾಡದಲ್ಲಿ ಬೆಳಗ್ಗೆ 5ರಿಂದ 11ರವರೆಗೆ ಮತ್ತು ಸಂಜೆ 7 ರಿಂದ 10ರವರೆಗೆ ಕುಸ್ತಿಪಟುಗಳಿಗೆ ತರಬೇತಿ ನೀಡಲಾಗುತ್ತಿದೆ.