ತಾತ್ಕಾಲಿಕ ಹೋರ್ಡಿಂಗ್‌ ಅಳವಡಿಕೆಗೆ ಷರತ್ತುಬದ್ಧ ಅನುಮತಿ

ಬೆಂಗಳೂರು : ನಗರದ ಯಲಹಂಕ ವಾಯುನೆಲೆಯಲ್ಲಿ ಇದೇ 20 ರಿಂದ ನಡೆಯಲಿರುವ 'ಏರೋ ಇಂಡಿಯಾ 2019'ವೈಮಾನಿಕ ಪ್ರದರ್ಶನದ ಹಿನ್ನೆಲೆಯಲ್ಲಿ ನಗರದ ಹಲವೆಡೆ ತಾತ್ಕಾಲಿಕ ಹೋರ್ಡಿಂಗ್ಸ್‌ ಅಳವಡಿಕೆಗೆ ಎಚ್‌ಎಎಲ್‌ಗೆ ಹೈಕೋರ್ಟ್‌ ಷರತ್ತುಬದ್ಧ ಅನುಮತಿ ನೀಡಿದೆ.

ಅನುಮತಿ ಕೋರಿ ಬಿಬಿಎಂಪಿ ಸಲ್ಲಿಸಿದ್ದ ಮಧ್ಯಾಂತರ ಅರ್ಜಿಯನ್ನು ಆಲಿಸಿದ ಹಂಗಾಮಿ ಸಿಜೆ ಎಲ್‌. ನಾರಾಯಣಸ್ವಾಮಿ ಮತ್ತು ನ್ಯಾ.ಸುಜಾತ ಅವರಿದ್ದ ವಿಭಾಗೀಯ ಪೀಠ ಏರೋ ಶೋ ಪ್ರಚಾರಕ್ಕಾಗಿ ನಗರದಲ್ಲಿ ಹೋರ್ಡಿಂಗ್ಸ್‌ ಅಳವಡಿಸಲು ಅನುಮತಿ ನೀಡಿತು.

ಬ್ರಿಗೇಡ್‌ ರಸ್ತೆ, ಯಲಹಂಕ ಕೋಗಿಲು ಜಂಕ್ಷ ನ್‌, ಯಲಹಂಕ ಎನ್‌ಇಎಸ್‌ ಬಸ್‌ ನಿಲ್ದಾಣ, ಏರ್‌ ಪೋರ್ಟ್‌ ಆಗಮನ ಮತ್ತು ನಿರ್ಗಮನ, ಲಾಲ್‌ ಬಾಗ್‌ ಜಂಕ್ಷ ನ್‌ಗಳಲ್ಲಿ ಜಾಹೀರಾತು ಅಳವಡಿಸಲು ನ್ಯಾಯಪೀಠ ತಾತ್ಕಾಲಿಕ ಅನುಮತಿಯನ್ನು ಮಂಜೂರು ಮಾಡಿತು.

ಬಿಬಿಎಂಪಿ ಪರ ವಕೀಲರಾದ ವಿ. ಶೀನಿಧಿ ''ಹೋರ್ಡಿಂಗ್ಸ್‌ ಅಳವಡಿಸಲು ಅನುಮತಿ ನೀಡುವಂತೆ ಎಚ್‌ಎಎಲ್‌ ಬಿಬಿಎಂಪಿಗೆ ಮನವಿ ನೀಡಿದೆ.ಹೋರ್ಡಿಂಗ್ಸ್‌ಗೆ ಶೇ.100 ರಷ್ಟು ಕಾಟನ್‌ ಬಳಕೆ ಮಾಡುತ್ತೇವೆ. ಫೆ.15 ರಿಂದ 25 ವರೆಗೂ ಹೋರ್ಡಿಂಗ್ಸ್‌ ಅಳವಡಿಸಿ, ಏರ್‌ ಶೋ ಮುಗಿದ ಕೂಡಲೇ ತೆರವುಗೊಳಿಸುತ್ತೇವೆಂದು ಸಂಸ್ಥೆ ಹೇಳಿದೆ'' ಎಂದು ನ್ಯಾಯಪೀಠಕ್ಕೆ ವಿವರಿಸಿದರು.