ರಾಮೇಶ್ವರದಲ್ಲಿ ಕನ್ನಡಕ್ಕೆ ಜೈ ಎಂದಿದ್ದ ಕುಲಾಲ್‌ಗೆ ಸನ್ಮಾನ

ಮಾಗಡಿ: ತಮಿಳುನಾಡಿನ ರಾಮೇಶ್ವರದಲ್ಲಿ ತಮಿಳರಿಂದ ಥಳಿತಕ್ಕೊಳಗಾದ ಸಂದರ್ಭದಲ್ಲೂ ಕನ್ನಡಕ್ಕೆ ಜೈಎಂದು ಘೋಷಣೆ ಕೂಗಿದ್ದ ಕುಂದಾಪುರದ ಮಂಜುನಾಥ ಕುಲಾಲ್ ಅವರನ್ನು ಮಾಗಡಿಯಲ್ಲಿ ಸನ್ಮಾನಿಸಲಾಯಿತು.

ಮಾಗಡಿಯ ಕೋಟೆ ಮೈದಾನದಲ್ಲಿ ನಡೆದ 61ನೇ ಕನ್ನಡ ರಾಜ್ಯೋತ್ಸವದ ವೇಳೆಶಾಸಕ ಎಚ್.ಸಿ.ಬಾಲಕೃಷ್ಣ ಹಾಗೂ ತಾಲೂಕು ಆಡಳಿತದ ವತಿಯಿಂದ ಕುಲಾಲ್‌ ಅವರನ್ನು ಗೌರವಿಸಲಾಗಿದೆ.

ಕುಂದಾಪುರದ ರಟ್ಟಾಡಿಯ ಕುಲಾಲ್‌ ಅವರು ಕಾವೇರಿ ಹೋರಾಟ ಸಂದರ್ಭದಲ್ಲಿ ಚಾಲಕರಾಗಿ ತಮಿಳುನಾಡಿನ ರಾಮೇಶ್ವರಕ್ಕೆ ಹೋಗಿದ್ದರು. ಅಲ್ಲಿ ತಮಿಳಿಗರು ಅವರನ್ನು ಹೊಡೆದು ಬಡಿದು ತಮಿಳುನಾಡಿಗೆ ಜೈ ಹೇಳು ಎಂದು ಬಲವಂತಪಡಿಸಿದ್ದರು. ಕಾವೇರಿ ತಮಿಳುನಾಡಿಗೆ ಸೇರಿದ್ದು ಎಂದು ಹೇಳುವಂತೆ ಒತ್ತಾಯಿಸಿದ್ದರು. ಗಂಭೀರ ಹಲ್ಲೆಗೆ ಒಳಗಾದರೂ ಸಹ ಕುಲಾಲ್‌ ಅವರು ಕನ್ನಡಕ್ಕೆ ಜೈ ಎಂದು ಹೇಳಿದ್ದರು.