ಚಟ ಹತ್ತಿಸಲು ಟೀ ಜತೆ ಉಚಿತ ಸಿಗರೇಟ್‌

ಬೆಂಗಳೂರು: ಬೆಂಗಳೂರಿನ ತಂಬಾಕು ಕಂಪನಿಗಳು ಯುವ ಪೀಳಿಗೆಯ ದಾರಿ ತಪ್ಪಿಸುವ ಪ್ರಯತ್ನ ಮಾಡುತ್ತಿದೆಯೇ? ಹೌದು ಅಂಥದ್ದೊಂದು ಆಘಾತಕಾರಿ ಅಂಶ ಬೆಳಕಿಗೆ ಬಂದಿದೆ.

ತಂಬಾಕು ಕಂಪನಿಗಳು ಕಾಲೇಜಿಗೆ ಹೋಗುವ ವಿದ್ಯಾರ್ಥಿಗಳಿಗೆ, ಯುವಕ ಹಾಗೂ ಯುವತಿಯರಿಗೆ ಟೀ ಜತೆ ಉಚಿತವಾಗಿ ಸಿಗರೇಟ್ ನೀಡಲಾಗುತ್ತಿದೆ ಎಂದು ಪೊಲೀಸ್ ಮೂಲಗಳು ತಿಳಿಸಿವೆ.

ಜಿಎಸ್‌ಟಿಯಿಂದಾಗಿ ತಂಬಾಕುಗಳು ಮತ್ತಷ್ಟು ತುಟ್ಟಿಯಾಗಿವೆ. ಆದ್ದರಿಂದ ಯುವಕರನ್ನು ಹೇಗಾದರೂ ಈ ಚಟಕ್ಕೆ ಬೀಳಿಸಲು ತಂಬಾಕು ಕಂಪನಿಗಳು ಇಂಥದ್ದೊಂದು ನೀಚ ಸ್ಟ್ರಾಟಜಿ ಕಂಡು ಕೊಂಡಿದೆ.

ಕ್ರೈಸ್ಟ್‌ ಕಾಲೇಜಿನ ಅಕ್ಕ-ಪಕ್ಕದ ಟೀ ಅಂಗಡಿಗಳಲ್ಲಿ ಟೀ ಜತೆ ಉಚಿತ ಸಿಗರೇಟ್‌ ಸಿಗುತ್ತದೆ ಎಂದು ಪೋಷಕರು ಮಡಿವಾಳ ಪೊಲೀಸ್‌ ಸ್ಟೇಷನ್‌ಗೆ ದೂರು ಸಲ್ಲಿಸಿದ್ದರು. ಇದರ ಅನ್ವಯ ಪೊಲೀಸರು ಕ್ರೈಸ್ಟ್‌ ಕಾಲೇಜಿನ ಅಕ್ಕ-ಪಕ್ಕದ ಅಂಗಡಿಗಳಲ್ಲಿ ರೈಡ್‌ ಮಾಡಿದಾಗ ಮಾರ್ಲ್‌ಬೋರೊ ಎಂಬ ಸಿಗರೇಟ್‌ ಕಂಪನಿ ಈ ರೀತಿಯ ಅಕ್ರಮದಲ್ಲಿ ತೊಡಗಿರುವುದು ಬೆಳಕಿಗೆ ಬಂದಿದೆ.

ಈ ಹಿಂದೆಯೂ ಸಿಗರೇಟ್ ಕಂಪನಿಗಳು ಕಾರು, ಬೈಕ್, ಮೊಬೈಲ್‌ ಈ ರೀತಿಯ ವಸ್ತುಗಳ ಆಕರ್ಷಕ ಉಡುಗೊರೆಯ ಆಮೀಷ ನೀಡಿ ತನ್ನ ಬ್ರ್ಯಾಂಡ್‌ ಪ್ರಮೋಷನ್‌ನಲ್ಲಿ ತೊಡಗಿತ್ತು.

ಭಾರತೀಯ ತಂಬಾಕು ನಿಯಂತ್ರಣ ಕಾಯ್ದೆಯು ಸಿಗರೇಟ್‌ ಕಂಪನಿಗಳು ಸಾರ್ವಜನಿಕ ಜಾಹೀರಾತು ನೀಡುವಂತಿಲ್ಲ ಎಂಬ ಆದೇಶವನ್ನು ಹೊರಡಿಸಿ ಸಿಗರೇಟ್‌ ಪ್ರಚಾರಕ್ಕೆ ತಡೆ ಒಡ್ಡಿತು.