ಬೆಂಗಳೂರಿನಲ್ಲಿದೆ 1300ಕ್ಕೂ ಹೆಚ್ಚು ಅನಧಿಕೃತ ಲ್ಯಾಬ್‌ಗಳು: ಅಕ್ರಮ ಲ್ಯಾಬ್‌ಗಳ ವಿರುದ್ಧ ಕ್ರಮ ಯಾವಾಗ?

ಬೆಂಗಳೂರು: ನಗರದಲ್ಲಿ ಲೈಸನ್ಸ್‌ ಇಲ್ಲದೆ, ನಿಗದಿತ ಕೋರ್ಸ್‌ ಮಾಡದಿರುವ ತಂತ್ರಜ್ಞರ ಹೆಸರಿನಲ್ಲಿ ಡಯಾಗ್ನೋಸ್ಟಿಕ್‌ ಲ್ಯಾಬ್‌ಗಳು ನಾಯಿಕೊಡೆಗಳಂತೆ ತಲೆ ಎತ್ತುತ್ತಿವೆ.

ಲ್ಯಾಬೊರೇಟರಿಗಳಲ್ಲಿ ಕಾರ್ಯ ನಿರ್ವಹಿಸಲು ಡಿಪ್ಲೊಮಾ ಇನ್‌ ಮೆಡಿಕಲ್‌ ಲ್ಯಾಬೊರೇಟರಿ ಟೆಕ್ನಾಲಜಿ (ಡಿಎಂಎಲ್‌ಟಿ) ಕೋರ್ಸ್‌ ವ್ಯಾಸಂಗ ಮಾಡಿರುವುದು ಅಗತ್ಯ. ಆದರೆ, ನಗರದಲ್ಲಿ ಕಾರ್ಯ ನಿರ್ವಹಿಸುತ್ತಿರುವ ಅನೇಕ ಲ್ಯಾಬೊರೇಟರಿಗಳಲ್ಲಿ ಡಿಪ್ಲೊಮಾ ಮಾಡದ ಹಲವು ಸಿಬ್ಬಂದಿ ಕಾರ‍್ಯನಿರ್ವಹಿಸುತ್ತಿದ್ದಾರೆ. ನಾನಾ ಬಗೆಯ ರಕ್ತ ಮತ್ತಿತರ ಪರೀಕ್ಷೆಗಳ ಹೆಸರಿನಲ್ಲಿ ರೋಗಿಗಳನ್ನು ವಂಚಿಸಿ ಹಣ ಲೂಟಿ ಮಾಡಲಾಗುತ್ತಿದೆ ಮತ್ತು ಸರಕಾರಕ್ಕೆ ಬರಬೇಕಾದ ಕೋಟ್ಯಂತರ ಆದಾಯವೂ ನಷ್ಟವಾಗುತ್ತಿದೆ.

ಕರ್ನಾಟಕ ರಾಜ್ಯ ಮೆಡಿಕಲ್‌ ಲ್ಯಾಬ್‌ ಟೆಕ್ನಾಲಜಿಸ್ಟ್‌ ಅಸೋಸಿಯೇಷನ್‌ನ ಪದಾಧಿಕಾರಿಗಳು ಹೇಳುವಂತೆ ಬೆಂಗಳೂರು ನಗರವೊಂದರಲ್ಲಿಯೇ 1300ಕ್ಕೂ ಅಧಿಕ ಅಕ್ರಮ ಲ್ಯಾಬ್‌ಗಳಿವೆ. ಅಧಿಕೃತ ಲೈಸನ್ಸ್‌ ಪಡೆದಿರುವ ಲ್ಯಾಬ್‌ಗಳು 800 ಮಾತ್ರ. ಅಕ್ರಮ ಲ್ಯಾಬ್‌ಗಳನ್ನು ಗುರುತಿಸಿ ಕ್ರಮ ಕೈಗೊಳ್ಳಬೇಕು ಎಂದು ಅಸೋಸಿಯೇಷನ್‌ ಪದಾಧಿಕಾರಿಗಳು ಇತ್ತೀಚೆಗೆ ಬೆಂಗಳೂರು ನಗರ ಜಿಲ್ಲಾ ಆರೋಗ್ಯಾಧಿಕಾರಿಗೆ ಮನವಿ ಸಲ್ಲಿಸಿದೆ.

ಹಲವರು ಒಂದು ಲ್ಯಾಬ್‌ಗೆ ಲೈಸನ್ಸ್‌ ಪಡೆದು ಅದೇ ಹೆಸರಿನಲ್ಲಿ ಹತ್ತಾರು ಲ್ಯಾಬ್‌ ನಡೆಸುತ್ತಿದ್ದಾರೆ. ಅವುಗಳಲ್ಲಿ ಪ್ರತಿಷ್ಠಿತ ಲ್ಯಾಬ್‌ಗಳು ಕೂಡ ಇವೆ ಎಂದು ಸಂಘದ ಪದಾಧಿಕಾರಿಗಳು ಆರೋಪಿಸಿದ್ದಾರೆ. ಅಲ್ಲದೆ, ಇದರಿಂದ ರೋಗಿಗಳಿಗೆ ತೊಂದರೆಯಾಗುತ್ತಿದೆ ಮತ್ತು ನಿಜವಾಗಿ ಲ್ಯಾಬ್‌ ಟೆಕ್ನಾಲಜಿಸ್ಟ್‌ ಕೋರ್ಸ್‌ ಮುಗಿಸಿರುವವರಿಗೆ ಉದ್ಯೋಗ ಸಿಗುತ್ತಿಲ್ಲ. ಇಷ್ಟಾದರೂ ಆರೋಗ್ಯ ಇಲಾಖೆ ಯಾವುದೇ ಕ್ರಮ ಕೈಗೊಳ್ಳುತ್ತಿಲ್ಲ ಎಂದು ಸಂಘ ಆರೋಪಿಸಿದೆ.

ಲ್ಯಾಬ್‌ಗೆ ಲೈಸನ್ಸ್‌ ಕಡ್ಡಾಯ:

ಕರ್ನಾಟಕ ಖಾಸಗಿ ವೈದ್ಯಕೀಯ ಸಂಸ್ಥೆಗಳು (ಕೆಪಿಎಂಇ) ನಿಯಮದ ಪ್ರಕಾರ, ಮೊದಲಿಗೆ ಯಾವ ವ್ಯಕ್ತಿ ಲೈಸನ್ಸ್‌ ಪಡೆಯಲು ಅರ್ಜಿ ಸಲ್ಲಿಸಿರುತ್ತಾರೋ ಅವರು ಡಿಪ್ಲೊಮಾ ಇನ್‌ ಮೆಡಿಕಲ್‌ ಲ್ಯಾಬೊರೇಟರಿ ಟೆಕ್ನಾಲಜಿ (ಡಿಎಂಎಲ್‌ಟಿ) ಕೋರ್ಸ್‌ ಪೂರ್ಣಗೊಳಿಸಿರಬೇಕು. ಆನಂತರ ಅವರು ಮೊರ್ಡಿ ಎಕೋದಿಂದ ಲ್ಯಾಬ್‌ ತ್ಯಾಜ್ಯ ವಿಲೇವಾರಿಗೆ ಅನುಮತಿ ಪಡೆದುಕೊಳ್ಳಬೇಕು. ನಂತರ ಕರ್ನಾಟಕ ರಾಜ್ಯ ಮಾಲಿನ್ಯ ನಿಯಂತ್ರಣ ಮಂಡಳಿಯಿಂದ ಪ್ರಮಾಣಪತ್ರ ಪಡೆದುಕೊಳ್ಳಬೇಕು ಮತ್ತು ಆರೋಗ್ಯ ಇಲಾಖೆಯಿಂದ ಕೆಪಿಎಂಇ ಕಾಯಿದೆ ಅಡಿ ಲೈಸೆನ್ಸ್‌ ಪಡೆದುಕೊಳ್ಳಬೇಕು. ಲ್ಯಾಬ್‌ನ ಒಳಚರಂಡಿ ವ್ಯವಸ್ಥೆ ಸೂಕ್ತವಾಗಿ ರೂಪಿಸಿರಬೇಕು. ತಂತ್ರಜ್ಞರು ಡಿಎಂಎಲ್‌ಟಿ ಕೋರ್ಸ್‌ ಮಾಡಿರುವುದು ಮತ್ತಿತರ ಮಾನದಂಡಗಳನ್ನು ಪೂರೈಸಬೇಕು.

ಆದರೆ, ಇತ್ತೀಚಿನ ದಿನಗಳಲ್ಲಿ ಲೈಸನ್ಸ್‌ ಪಡೆಯದೆ ಹಲವರು ಲ್ಯಾಬ್‌ ನಡೆಸುತ್ತಿದ್ದಾರೆ. ಅಲ್ಲದೆ, ಕೋರ್ಸ್‌ ಮಾಡಿರದಿದ್ದರೂ ಸಹ ಪಾರ್ಕ್ ಮತ್ತಿತರ ಜಾಗಗಳಲ್ಲಿ ಯಂತ್ರಗಳನ್ನಿಟ್ಟುಕೊಂಡು ರಕ್ತ ಪರೀಕ್ಷೆಗಳನ್ನು ಮಾಡುತ್ತಿದ್ದಾರೆ. ಆದಕ್ಕೆ ಆರೋಗ್ಯ ಇಲಾಖೆ ಯಾವುದೇ ಕಡಿವಾಣ ಹಾಕುತ್ತಿಲ್ಲ ಎಂಬುದು ಸಂಘದ ಆರೋಪವಾಗಿದೆ.