ಸ್ಮಾರ್ಟ್ ಕಾರ್ಡ್ ರಿಚಾರ್ಜ್ನಿಂದ ಏರಿದ ಆದಾಯ
ಕಾರ್ತಿಕ್ ಯು.ಎಚ್.ಬೆಂಗಳೂರು
ನಿಷೇಧಗೊಂಡ ನೋಟುಗಳನ್ನು 'ನಮ್ಮ ಮೆಟ್ರೊ' ಸ್ಮಾರ್ಟ್ ಕಾರ್ಡ್ಗೆ ರಿಚಾರ್ಜ್ ಮಾಡುತ್ತಿರುವುದರಿಂದ ಬಿಎಂಆರ್ಸಿಎಲ್ನ ನಿತ್ಯದ ಆದಾಯ 5 ಲಕ್ಷ ರೂ.ಗೆ ಏರಿಕೆಯಾಗಿದೆ.
500 ಹಾಗೂ 1,000 ನೋಟುಗಳನ್ನು ನಿಗಮ ಸ್ವೀಕರಿಸುತ್ತಿದ್ದರೂ, ಇದಕ್ಕೆ ಚಿಲ್ಲರೆ ನೀಡದೆ ಪೂರ್ಣ ಮೊತ್ತವನ್ನು ಸ್ಮಾರ್ಟ್ ಕಾರ್ಡ್ಗೆ ರಿಚಾರ್ಜ್ ಮಾಡಲಾಗುತ್ತಿದೆ. ಈ ನೋಟುಗಳಿಗೆ ಚಿಲ್ಲರೆ ನೀಡುವುದು ಕಷ್ಟವಾಗಿರುವುದರಿಂದ ಹಾಗೂ 100 ಮುಖಬೆಲೆಯ ನೋಟುಗಳ ಕೊರತೆಯಿರುವುದರಿಂದ ಸ್ಮಾರ್ಟ್ ಕಾರ್ಡ್ಗೆ ಪೂರ್ಣ ರಿಚಾರ್ಜ್ ಮಾಡುವಂತೆ ಸಿಬ್ಬಂದಿಗೆ ಸೂಚಿಸಲಾಗಿದೆ. ನೋಟು ಚಲಾಯಿಸಲೇಬೇಕಾದ ಅನಿವಾರ್ಯಕ್ಕೆ ಸಿಲುಕಿರುವ ಜನರು ರೈಲಿನಲ್ಲಿ ಚಲಿಸಲು ಪೂರ್ಣ ರಿಚಾರ್ಜ್ ಮಾಡಿಕೊಳ್ಳುತ್ತಿದ್ದಾರೆ. ಇದರಿಂದ ಕಳೆದ ಒಂದು ವಾರದಿಂದ ನಿತ್ಯದ ಆದಾಯ 30 ಲಕ್ಷ ರೂ. ನಿಂದ 35 ಲಕ್ಷ ರೂ.ಗೆ ಏರಿಕೆಯಾಗಿದೆ.
ಮೆಟ್ರೊ ರೈಲಿನಲ್ಲಿ ನಿತ್ಯ 1 ಲಕ್ಷದಿಂದ 1.50 ಲಕ್ಷ ಪ್ರಯಾಣಿಕರು ಸಂಚರಿಸುತ್ತಾರೆ. ಕೆಲವು ಬಾರಿ ಈ ಸಂಖ್ಯೆ 1.90 ಲಕ್ಷಕ್ಕೂ ಏರಿಕೆಯಾಗುತ್ತದೆ. ಇವರಲ್ಲಿ ಸುಮಾರು 60,000 ಪ್ರಯಾಣಿಕರು ಸ್ಮಾರ್ಟ್ ಕಾರ್ಡ್ ಹೊಂದಿದ್ದಾರೆ.
ಡಿ.24 ರವರೆಗೆ ನಿಷೇಧಿಸಿದ ನೋಟುಗಳನ್ನು ಮೆಟ್ರೊದಲ್ಲಿ ಸ್ವೀಕರಿಸಲಾಗುತ್ತಿದೆ. ಕೇಂದ್ರ ಸರಕಾರ ಮತ್ತೆ ಸೂಚನೆ ನೀಡಿದರೆ, ನೋಟು ಸ್ವೀಕಾರದ ಕೊನೆಯ ದಿನವನ್ನು ಮತ್ತಷ್ಟು ಮುಂದೂಡಲಾಗುತ್ತದೆ. ಇದರಿಂದ ಆದಾಯ ಮತ್ತಷ್ಟು ಹೆಚ್ಚುವ ಸಾಧ್ಯತೆಯೂ ಇದೆ ಎಂದು ಮೆಟ್ರೊ ಅಧಿಕಾರಿಗಳು ಅಭಿಪ್ರಾಯಪಟ್ಟಿದ್ದಾರೆ.
ಮೆಟ್ರೊ ಮಾರ್ಗದ ವಿಸ್ತರಣೆ ಹಾಗೂ ಹೊಸ ಮಾರ್ಗದ ವಾಣಿಜ್ಯ ಸಂಚಾರ ಏಪ್ರಿಲ್ನಲ್ಲಿ ಆರಂಭವಾಗಲಿರುವುದರಿಂದ 4 ಲಕ್ಷ ಹೊಸ ಸ್ಮಾರ್ಟ್ ಕಾರ್ಡ್ಗಳನ್ನು ಬಿಡುಗಡೆ ಮಾಡಲು ಸಿದ್ಧತೆ ನಡೆಸಲಾಗಿದೆ.
ಕ್ರಮೇಣ ಇಳಿಕೆ
ಸ್ಮಾರ್ಟ್ ಕಾರ್ಡ್ಗೆ ಒಮ್ಮೆ 1,000 ರೂ. ರಿಚಾರ್ಜ್ ಮಾಡಿದರೆ ಕನಿಷ್ಠ ಒಂದೂವರೆ ತಿಂಗಳು 20-30 ಕಿ.ಮೀ. ಪ್ರಯಾಣ ಮಾಡಬಹುದು. ಸ್ಮಾರ್ಟ್ ಕಾರ್ಡ್ಗಳ ರಿಚಾರ್ಜ್ ಮುಗಿದ ಬಳಿಕ ಆದಾಯ ಯಥಾಸ್ಥಿತಿಗೆ ಮರಳಲಿದೆ ಎಂದು ಮೆಟ್ರೊ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ನಗದು ರಹಿತ ಸೇವೆಗೆ ಸಿದ್ಧತೆ
ನೋಟು ನಿಷೇಧದಿಂದ ಪಾಠ ಕಲಿತಿರುವ ಬಿಎಂಆರ್ಸಿಎಲ್, ಡೆಬಿಟ್ ಹಾಗೂ ಕ್ರೆಡಿಟ್ ಕಾರ್ಡ್ನಿಂದ ಟಿಕೆಟ್ಗೆ ಹಣ ಪಾವತಿಸುವ ನಗದು ರಹಿತ ವ್ಯವಸ್ಥೆ ಅಳವಡಿಕೆಗೆ ಸಿದ್ಧತೆ ನಡೆಸಿದೆ.
ಎಲ್ಲ ರೀತಿಯ ಆಧುನಿಕ ಸೌಲಭ್ಯ ಹೊಂದಿರುವ ಮೆಟ್ರೊ, ಡೆಬಿಟ್ ಹಾಗೂ ಕ್ರೆಡಿಟ್ ಕಾರ್ಡ್ ಪಡೆಯಲು ವ್ಯವಸ್ಥೆ ರೂಪಿಸಿರಲಿಲ್ಲ. ನೋಟು ನಿಷೇಧದ ದಿನದಿಂದ ಸ್ಮಾರ್ಟ್ ಕಾರ್ಡ್ಗೆ 500, 1,000 ರೂ.ಗೆ ಚಿಲ್ಲರೆ ನೀಡದೆ, ಪೂರ್ಣ ರಿಚಾರ್ಜ್ ಮಾಡುತ್ತಿರುವುದಕ್ಕೆ ಪ್ರಯಾಣಿಕರು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ. ಹೀಗಾಗಿ ಮುಂದೆ ಇಂತಹ ಸಮಸ್ಯೆಯಾಗದಿರಲು ನಗದು ರಹಿತ ಸೇವೆ ನೀಡಲು ಸಿದ್ಧತೆ ಮಾಡಿಕೊಳ್ಳಲಾಗುತ್ತಿದೆ.