​ಕಟ್ಟಡ, ಗಾರ್ಮೆಂಟ್‌ ಮಹಿಳಾ ಉದ್ಯೋಗಿಗಳಿಗೆ ಇಂದಿರಾ ಬಸ್‌ಪಾಸ್‌

ಬೆಂಗಳೂರು: ಕಟ್ಟಡ ಕಾಮಗಾರಿ ಮತ್ತು ಗಾರ್ಮೆಂಟ್‌ಗಳಲ್ಲಿ ದುಡಿಯುತ್ತಿರುವ ಮಹಿಳಾ ಕಾರ್ಮಿಕರಿಗೆ ಇಂದಿರಾ ಪಾಸ್ ನೀಡುವ ಯೋಜನೆ ಜಾರಿಗೆ ತರಲಾಗುವುದು ಎಂದು ಎಚ್.ಎಂ.ರೇವಣ್ಣ ಹೇಳಿದ್ದಾರೆ.

ಗಾರ್ಮೆಂಟ್ಸ್‌ನ ಎರಡು ಲಕ್ಷ ಮಹಿಳಾ ನೌಕರರು ಹಾಗೂ ಕಟ್ಟಡ ಕಾಮಗಾರಿಯ ಎಂಟು ಲಕ್ಷ ಮಹಿಳಾ ಕಾರ್ಮಿಕರಿಗೆ ಇಂದಿರಾ ಪಾಸ್ ನೀಡುತ್ತೇವೆ.ಇಂದಿರಾ ಸಾರಿಗೆ ಜಾರಿ ಬಳಿಕ ಇಂದಿರಾ ಪಾಸ್ ಯೋಜನೆ ಜಾರಿ ಗೊಳಿಸುವುದಾಗಿ ರೇವಣ್ಣ ತಿಳಿಸಿದ್ದಾರೆ.

ವಿಕಾಸಸೌಧದಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ನಮ್ಮ ಬೆಂಗಳೂರು ಉಳಿವಿಗಾಗಿ ಪ್ರತಿ ತಿಂಗಳು ಒಂದು ದಿನ ವಿರಳ ಸಂಚಾರ ದಿನ ಅಭಿಯಾನ ನಡೆಸಲು ನಿರ್ಧರಿಸಲಾಗಿದೆ.

ಸಾರಿಗೆ ಇಲಾಖೆ ವತಿಯಿಂದ ಪ್ರತಿ ತಿಂಗಳ ಎರಡನೇ ಭಾನುವಾರ ವಿರಳ ಸಂಚಾರ ದಿನ ಅಭಿಯಾನ ನಡೆಯಲಿದೆ. ಎರಡನೇ ಭಾನುವಾರ ಸ್ವಂತ ವಾಹನ ಬಳಸದೆ ಸಮೂಹ ಸಾರಿಗೆ ಬಳಸಲು ಸಾರ್ವಜನಿಕರಿಗೆ ಮನವಿ ಮಾಡಲಾಗುವುದು. ಬಿಎಂಟಿಸಿ, ಹಳದಿ ಬಾಡಿಗೆ ವಾಹನ, ಆಟೊಗಳಿಗೆ ನಿರ್ಬಂಧವಿಲ್ಲ. ಫೆಬ್ರವರಿ ಎರಡನೇ ಭಾನುವಾರ ವಿರಳ ಸಂಚಾರ ಅಭಿಯಾನಕ್ಕೆ ಚಾಲನೆ ನೀಡಲಾಗುವುದು. ಲೆಸ್ ಟ್ರಾಫಿಕ್ ಡೇ ಅಭಿಯಾನ ಕುರಿತು ವ್ಯಾಪಕ ಪ್ರಚಾರ ನೀಡಲು ನಿರ್ಧರಿಸಲಾಗಿದೆ ಎಂದು ಸಚಿವರು ಹೇಳಿದರು.