ಅಮೆರಿಕದಿಂದ ಖಾಸಗಿ ವಿಮಾನದಲ್ಲಿ ಉದ್ಯೋಗಿಗಳನ್ನು ಕರೆತಂದ ಇನ್ಫೋಸಿಸ್‌

ಬೆಂಗಳೂರು: ಇನ್ನೂರಕ್ಕೂ ಹೆಚ್ಚು ಇನ್ಫೋಸಿಸ್‌ ಉದ್ಯೋಗಿಗಳು ಮತ್ತು ಅವರ ಕುಟುಂಬದವರನ್ನು ಅಮೆರಿಕದ ಸ್ಯಾನ್‌ಫ್ರ್ಯಾನ್ಸಿಸ್ಕೋದಿಂದ ಚಾರ್ಟರ್ಡ್‌ ವಿಮಾನದಲ್ಲಿ ಇನ್ಫೋಸಿಸ್‌ ಕಂಪನಿ ಸೋಮವಾರ ಬೆಳಗ್ಗೆ ಕರೆಸಿಕೊಂಡಿದೆ.

ಈ ಮೊದಲು 'ವಂದೇ ಭಾರತ್‌ ಮಿಷನ್‌' ವಿಮಾನದ ಮೂಲಕ ಉದ್ಯೋಗಿಗಳನ್ನು ಕರೆಸಿಕೊಳ್ಳುತ್ತಿದ್ದ ಇನ್ಫೋಸಿಸ್‌, ಮೊದಲ ಬಾರಿಗೆ ಚಾರ್ಟರ್ಡ್‌ ವಿಮಾನ ಬಳಸಿದೆ. ಈ ವಿಚಾರವನ್ನು ಇನ್ಫೋಸಿಸ್‌ ಅಧಿಕಾರಿಗಳು ಖಚಿತಪಡಿಸಿದ್ದು, ಹೆಚ್ಚಿನ ಮಾಹಿತಿ ಹಂಚಿಕೊಂಡಿಲ್ಲ.

''ಒಂದೇ ನಗರದಲ್ಲಿ ದೊಡ್ಡ ಸಂಖ್ಯೆಯಲ್ಲಿ ಉದ್ಯೋಗಿಗಳಿದ್ದರು. ಹೀಗಾಗಿ, ಚಾರ್ಟರ್ಡ್‌ ವಿಮಾನದಲ್ಲಿ ಬರುವ ಯೋಜನೆ ಹಾಕಿಕೊಳ್ಳಲಾಯಿತು. ಸಂಬಂಧಪಟ್ಟ ಪ್ರಾಧಿಕಾರಿಗಳ ಅನುಮತಿ ಪಡೆದು ವ್ಯವಸ್ಥೆ ಮಾಡಿಕೊಳ್ಳಲಾಯಿತು. ಶನಿವಾರ ರಾತ್ರಿ ಅಲ್ಲಿಂದ ಹೊರಟ ವಿಮಾನ ಸೋಮವಾರ ಬೆಳಗ್ಗೆ ಬೆಂಗಳೂರು ತಲುಪಿದೆ'' ಎಂದು ಬೆಂಗಳೂರಿಗೆ ಮರಳಿದ ಇನ್ಫೋಸಿಸ್‌ ಉದ್ಯೋಗಿಯೊಬ್ಬರು ಹೇಳಿದರು.