ಬೌರಿಂಗ್‌ ಲಾಕರ್‌ ಪ್ರಕರಣ: ಇಡಿಗೆ ವರದಿ ಒಪ್ಪಿಸಿದ ಐಟಿ

ಬೆಂಗಳೂರು: ಬೌರಿಂಗ್‌ ಕ್ಲಬ್‌ನ ಲಾಕರ್‌ನಲ್ಲಿ ಪತ್ತೆಯಾಗಿದ್ದ ಬಹುಕೋಟಿ ನಗದು ಹಣ, ಡಾಲರ್‌ ಮತ್ತು ವಜ್ರಾಭರಣಗಳ ಮೂಲದ ಬಗ್ಗೆ ತನಿಖೆ ಪೂರ್ಣಗೊಳಿಸಿರುವ ಆದಾಯ ಇಲಾಖೆ ಅಧಿಕಾರಿಗಳು ವರದಿಯನ್ನು ಜಾರಿ ನಿರ್ದೇಶನಾಲಯಕ್ಕೆ ವರ್ಗಾಯಿಸಿದ್ದಾರೆ ಎಂದು ತಿಳಿದು ಬಂದಿದೆ.

ಉದ್ಯಮಿ ಅವಿನಾಶ್‌ ಅಮರ್‌ಲಾಲ್‌ ಕುಕ್ರೇಜಾ ಅವರಿಗೆ ಸೇರಿದ ಲಾಕರನ್ನು ಜು.20 ರಂದು ಕ್ಲಬ್‌ ಆಡಳಿತ ಮಂಡಳಿ ತೆರವುಗೊಳಿಸಿತ್ತು. ಈ ಸಂದರ್ಭದಲ್ಲಿ ವಿದೇಶಿ ಡಾಲರ್‌, ಬಹುಕೋಟಿ ರೂಪಾಯಿ ಸೇರಿದಂತೆ ಕೋಟಿಗಟ್ಟಲೆ ಮೌಲ್ಯದ ವಜ್ರಾಭರಣಗಳು ಪತ್ತೆಯಾಗಿದ್ದವು. ಕ್ಲಬ್‌ನ ಅಧ್ಯಕ್ಷ ಶ್ರೀಕಾಂತ್‌ ಅವರು ನೀಡಿದ ದೂರಿನ ಮೇರೆಗೆ ಆದಾಯ ಇಲಾಖೆ ಅಧಿಕಾರಿಗಳು ಮತ್ತು ಪೊಲೀಸ್‌ ಇಲಾಖೆ ಅಧಿಕಾರಿಗಳು ಜು.20 ರಂದೇ ಕ್ಲಬ್‌ಗೆ ಧಾವಿಸಿ, ಲಾಕರ್‌ನಲ್ಲಿದ್ದ ದಾಖಲೆ ಪತ್ರಗಳ ಸಮೇತ ನಗದು, ಆಭರಣ ವಶಕ್ಕೆ ಪಡೆದಿದ್ದರು.

ಬೆಂಗಳೂರು ವಲಯದ ಇಡಿ ಅಧಿಕಾರಿಗಳು ಸದ್ಯದಲ್ಲೇ ಎಫ್‌ಐಆರ್‌ ದಾಖಲಿಸಿ ತನಿಖೆ ಆರಂಭಿಸುವ ಸಾಧ್ಯತೆಗಳೂ ಇವೆ ಎನ್ನಲಾಗಿದೆ.