ಕ್ಯಾಸಿನೋ ಡ್ರಗ್ಸ್ ಅಡ್ಡಾಗಳಲ್ಲ! ಪತ್ನಿ ಜೊತೆ ಮಲೇಷ್ಯಾಗೆ ಹೋಗಿದ್ದಾಗ ನೋಡಿದ್ದೇನೆ ಎಂದ ಎಚ್‌ಡಿಕೆ

ಬೆಂಗಳೂರು: ಕ್ಯಾಸಿನೋಗಳು ಡ್ರಗ್ಸ್ ಅಡ್ಡಾಗಳಲ್ಲ, ಕೆಲವು ವರ್ಷಗಳ ಹಿಂದೆ ಪತ್ನಿ ಜೊತೆ ಮಲೇಷ್ಯಾಗೆ ಹೋಗಿದ್ದಾಗ ಅದನ್ನು ನೋಡಿದ್ದೇನೆ ಎಂದು ಮಾಜಿ ಸಿಎಂ ಎಚ್‌ಡಿ ಕುಮಾರಸ್ವಾಮಿ ಹೇಳಿದ್ದಾರೆ.

ಬೆಂಗಳೂರಿನಲ್ಲಿ ಭಾನುವಾರ ಮಾತನಾಡಿದ ಅವರು, ಡ್ರಗ್ಸ್ ಮಾಫಿಯಾದ ಚರ್ಚೆ ಹಾಗೂ ಕೊಲಂಬೋ ಪ್ರವಾಸದ ಬಗ್ಗೆ ಸ್ಪಷ್ಟನೆ ನೀಡಿದರು. 1983 ರಲ್ಲಿ ಕ್ಯಾಸಿನೋ ನೋಡಿದ್ದೇನೆ, ಪತ್ನಿ ಜೊತೆಗೆ ಮಲೇಷ್ಯಾ ಪ್ರವಾಸಕ್ಕೆ ತೆರಳಿದ್ದಾಗ ನೋಡಿದ್ದೇನೆ. ಆದರೆ ಅಲ್ಲಿ ಡ್ರಗ್ಸ್ ಇರುವುದು ಕಂಡುಬಂದಿಲ್ಲ ಎಂದಿದ್ದಾರೆ. ಈ ಕಾರಣಕ್ಕಾಗಿ ಕ್ಯಾಸಿನೋವನ್ನು ಡ್ರಗ್ಸ್ ಅಡ್ಡಗಳೆಂದು ಬಿಂಬಿಸುವುದು ಸರಿಯಲ್ಲ ಎಂದರು.

ಇನ್ನು ಡ್ರಗ್ಸ್ ಮಾಫಿಯಾದ ಬಗ್ಗೆ ಪ್ರತಿಕ್ರಿಯೆ ನೀಡಿದ ಅವರು, ಬೆಂಗಳೂರಿನ ನೈಟ್‌ ಬಾರ್‌, ಪಾರ್ಟಿಗಳಲ್ಲಿ ಡ್ರಗ್ಸ್ ಇದೆ. ಬೆಂಗಳೂರಿನ ಮಲ್ಯ ರೋಡ್‌ನಲ್ಲಿ ರಾತ್ರಿ 12 ಗಂಟೆಗೆ ಹೋದ್ರೆ ಇಂಡಿಯಾದಲ್ಲಿ ಇದ್ದೇವಾ ಎಂಬುವುದು ಗೊತ್ತಾಗುತ್ತಿಲ್ಲ. ಐಪಿಎಲ್‌, ವಿದೇಶದಲ್ಲಿ ನಡೆಯುವ ಅವಾರ್ಡ್‌ ಕಾರ್ಯಕ್ರಮಗಳು ಆರಂಭವಾದ ಬಳಿಕ ಈ ವಾತಾವರಣ ನಿರ್ಮಾಣವಾಗಿದೆ ಎಂದರು.

ಡ್ರಗ್ಸ್ ಮಾಫಿಯಾ: ಚುರುಕು ಪಡೆದುಕೊಂಡ ಎನ್‌ಸಿಬಿ, ಸಿಸಿಬಿ ತನಿಖೆ

ಇನ್ನು ಮಾಜಿ ಸಚಿವ ಜಮೀರ್‌ ಅಹಮ್ಮದ್ ಖಾನ್‌ ಅವರು ನೀಡಿದ ಕೊಲಂಬೋ ಪ್ರವಾಸದ ಕುರಿತಾಗಿ ಪ್ರತಿಕ್ರಿಯೆ ನೀಡಿದ ಕುಮಾರಸ್ವಾಮಿ, 2014 ರಲ್ಲಿ ಪಕ್ಷದ ಸಮಸ್ಯೆ ಇದ್ದಾಗ ಚರ್ಚೆ ಮಾಡಲು ಕೊಲಂಬೋ ಹೋಗಿದ್ದೇನೆ. ನಮ್ಮ ದೇಶಕ್ಕೆ ಹೋಲಿಕೆ ಮಾಡಿದರೆ ಅಲ್ಲಿ ಕಡಿಮೆಗೆ ಖರ್ಚಿನಲ್ಲಿ ವರ್ಕ್‌ ಔಟ್ ಆಗುತ್ತದೆ.

ಸದ್ಯ ಡ್ರಗ್ಸ್ ಸಂಬಂಧಪಟ್ಟ ಹಾಗೆ ತನಿಖೆ ನಡೆಯುತ್ತಿದೆ. ತನಿಖೆಯ ದಾರಿ ತಪ್ಪಬಾರದು. ಇಂತಹ ಸಂದರ್ಭದಲ್ಲಿ ಹಳೇ ಸ್ನೇಹಿತರು ಯಾತಕ್ಕೆ ಈ ಸುದ್ದಿ ಕೆದಕಿದ್ದಾರೆ ಗೊತ್ತಿಲ್ಲ. ಕೊಲಂಬೋಗೆ ಅವರು ಕರೆದುಕೊಂಡು ಹೋಗಬೇಕಾ? ನಮಗೆ ಹೋಗಲು ಗೊತ್ತಾಗುದಿಲ್ವಾ ಎಂದು ಜಮೀರ್ ಅವರನ್ನು ತರಾಟೆಗೆ ತೆಗೆದುಕೊಂಡರು.