ಯಲಹಂಕದಲ್ಲಿ ರಾಜ್ಯದ ಮೊದಲ ಜೈವಿಕ ಇಂಧನ ಬಂಕ್‌ ಆರಂಭ

ಯಲಹಂಕ: ರಾಜ್ಯದ ಮೊದಲ ಜೈವಿಕ ಇಂಧನ ಬಂಕ್‌ಗೆ ಅಂತರರಾಷ್ಟ್ರೀಯ ವಿಮಾನನಿಲ್ದಾಣ ಸಮೀಪದ ಬೇಗೂರು ಗ್ರಾಮದಲ್ಲಿಗುರುವಾರ ಚಾಲನೆ ಸಿಕ್ಕಿದೆ. ಲಿಮಿಟ್‌ಲೆಸ್‌ ಎನರ್ಜಿ ಎಂಬ ಸಂಸ್ಥೆ ಈ ಬಂಕ್‌ಅನ್ನು ಆರಂಭಿಸಿದೆ. ಸಂಸ್ಥೆಯ ಕಾರ್ಯನಿರ್ವಾಹಕ ಅಧಿಕಾರಿ ಅಂಕಿತ್‌ ರಾಮ ಬಾಬು ಮಾತನಾಡಿ, ''ತಾಳೆಎಣ್ಣೆ, ತ್ಯಾಜ್ಯದ ಎಣ್ಣೆ, ಗೊಬ್ಬರ, ಒಣಗಿದ ತರಗೆಲೆ ಮತ್ತಿತರ ತ್ಯಾಜ್ಯವಸ್ತುಗಳನ್ನು ಬಳಸಿ ಜೈವಿಕ ಇಂಧನವನ್ನು ಉತ್ಪಾದಿಸಲಾಗುತ್ತದೆ. 2020ರ ಅಂತ್ಯಕ್ಕೆ ಬೆಂಗಳೂರು ನಗರದಲ್ಲಿಇಂತಹ ಇನ್ನೂ 20 ಘಟಕಗಳನ್ನು ಆರಂಭಿಸುವ ಗುರಿ ಹೊಂದಲಾಗಿದೆ.,'' ಎಂದರು.

'' ಶೇ.12ರಷ್ಟು ಜಿಎಸ್‌ಟಿ ತೆರಿಗೆ ವಿನಾಯಿತಿ ದೊರೆತಿರುವುದರಿಂದ ಗ್ರಾಹಕರಿಗೆ ಕಡಿಮೆ ದರದಲ್ಲಿಕೊಡಲು ಸಾಧ್ಯವಾಗುತ್ತಿದೆ. ಜೈವಿಕ ಇಂಧನ ದರ ಸಾಮಾನ್ಯ ಡೀಸೆಲ್‌ ದರಕ್ಕಿಂತ 1 ರೂ. ಕಡಿಮೆ ಇದೆ. ಪರಿಸರ ಸ್ನೇಹಿಯಾಗಿರುವ ಈ ಇಂಧನ ಬಳಸುವುದರಿಂದ ವಾಹನದ ಎಂಜಿನ್‌ ಉತ್ತಮ ರೀತಿಯಲ್ಲಿಕಾರ್ಯನಿರ್ವಹಿಸುವುದರ ಜೊತೆಗೆ ದೀರ್ಘಕಾಲ ಬಾಳಿಕೆ ಬರುತ್ತದೆ. ಜೊತೆಗೆ ರೈತರಿಗೂ ಇದರಿಂದ ನೆರವಾಗಲಿದೆ,'' ಎಂದರು.

ಘಟಕದ ವ್ಯವಸ್ಥಾಪಕ ನಿರ್ದೇಶಕ ರಾಮ್‌ಬಾಬು ಬಂಕ್‌ ಅನ್ನು ಉದ್ಘಾಟಿಸಿದರು. ಕರವೇ ಬೆಂಗಳೂರು ನಗರಜಿಲ್ಲಾಘಟಕದ ಅಧ್ಯಕ್ಷ ಸುರೇಶ್‌ ಮತ್ತಿತರರು ಉಪಸ್ಥಿತರಿದ್ದರು.