Kempegowda Jayanti: ವಿಧಾನಸೌಧದಲ್ಲಿ ಕೆಂಪೇಗೌಡ ಪ್ರತಿಮೆ ನಿರ್ಮಾಣ: ಸಿಎಂ ಬೊಮ್ಮಾಯಿ ಭರವಸೆ

ಬೆಂಗಳೂರು: ಮುಂದಿನ ವರ್ಷದ ಕೆಂಪೇಗೌಡ ಜಯಂತಿಗೂ ಮೊದಲು ವಿಧಾನಸೌಧದಲ್ಲಿ ಕೆಂಪೇಗೌಡರ ಪ್ರತಿಮೆ ನಿರ್ಮಾಣ ಮಾಡಲಾಗುವುದು ಎಂದು ಸಿಎಂ ಬಸವರಾಜ ಬೊಮ್ಮಾಯಿ ಭರವಸೆ ನೀಡಿದರು. ವಿಧಾನಸೌಧದ ಬ್ಯಾಂಕ್ವೆಟ್ ಹಾಲ್ ನಲ್ಲಿ ಸೋಮವಾರ ನಡೆದ ಕೆಂಪೇಗೌಡರ 513 ನೇ ಜಯಂತಿ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ವಿಧಾನಸೌಧದಲ್ಲಿ ಕೆಂಪೇಗೌಡ ಪ್ರತಿಮೆ ಬೇಡಿಕೆ ಸೂಕ್ತವಾಗಿದೆ. ಬೆಂಗಳೂರನ್ನು ಕಟ್ಟಿದವರ ಪ್ರತಿಮೆ ನನ್ನ ಪ್ರಕಾರ ಈಗಾಗಲೇ ನಿರ್ಮಾಣ ಆಗಬೇಕಿತ್ತು, ಆದರೆ ಆಗಿಲ್ಲ. ಇವತ್ತು ಸರಿಪಡಿಸಿ ಆ ಕೆಲಸವನ್ನು ಪೂರ್ಣಗೊಳಿಸಲಾಗುವುದು ಎಂದರು.

ಎಸ್.ಎಂ.ಕೃಷ್ಣ, ನಾರಾಯಣಮೂರ್ತಿ, ಪಡುಕೋಣೆಗೆ ಚೊಚ್ಚಲ 'ಕೆಂಪೇಗೌಡ ಅಂತರಾಷ್ಟ್ರೀಯ ಪ್ರಶಸ್ತಿ'
ಮುಂದಿನ ಕೆಂಪೇಗೌಡ ಜಯಂತಿಗೂ ಮೊದಲು ವಿಧಾನಸೌಧದಲ್ಲಿ ಪ್ರತಿಮೆ ನಿರ್ಮಾಣ ಮಾಡಲಾಗುವುದು ಎಂದು ಭರವಸೆ ನೀಡಿದರು‌.

ವಿಧಾನಸೌಧದಲ್ಲಿ ಕೆಂಪೇಗೌಡ ಪ್ರತಿಮೆ ಸ್ಥಾಪಿಸುವ ಕುರಿತಾಗಿ 2001ರಲ್ಲಿ ಬಿಬಿಎಂಪಿಯಲ್ಲಿ ನಿರ್ಣಯ ಆಗಿತ್ತು. 12 ಲಕ್ಷ ಮೀಸಲಿಡಲಾಗಿತ್ತು. ಆದರೆ ಪ್ರತಿಮೆ ನಿರ್ಮಾಣ ಆಗಿರಲಿಲ್ಲ ಎಂದರು.

ಕೆಂಪೇಗೌಡ ಕಟ್ಟಿರುವ ನಾಡನ್ನು ಯಾವ ರೀತಿಯಲ್ಲಿ ಮುಂದುವರಿಸಿದ್ದೇವೆ ಎಂಬ ಆತ್ಮಾವಲೋಕನ ಮಾಡುವ ದಿನ ಇದಾಗಿದೆ ಎಂದ ಸಿಎಂ ಬೊಮ್ಮಾಯಿ ಅವರು, ಕೆಂಪೇಗೌಡರು ಪ್ರಜಾಪ್ರಭುತ್ವ ರೀತಿಯಲ್ಲಿ ಆಡಳಿತ ನೀಡಿದರು ಎಂಬುದಕ್ಕೆ ಹಲವು ಕುರುಹುಗಳಿವೆ ಎಂದರು‌.


ಕೆಂಪೇಗೌಡ ಬೆಂಗಳೂರು ನಗರ ಮಾತ್ರ ಕಟ್ಟಿಲ್ಲ, ಅವರ ವ್ಯಾಪ್ತಿಯಲ್ಲಿದ್ದ ಪ್ರದೇಶಗಳಲ್ಲಿ ಕೆರೆ ಕಟ್ಟಡಗಳನ್ನು ಕಟ್ಟಿದ್ದಾರೆ‌. ಸಣ್ಣ ಸಣ್ಣ ಗ್ರಾಮ ಕಟ್ಟಿದ್ದಾರೆ. ಹಲವಾರು ಸಮುದಾಯಗಳಿಗೆ ಅವಕಾಶ ನೀಡಿದ್ದಾರೆ. ವ್ಯಾಪಾರ ವ್ಯವಹಾರ ಮಾಡಿದ್ದಾರೆ. ಇದು ದೂರ ದೃಷ್ಟಿ ಇರುವ ಆಡಳಿತಗಾರರ ಚಿಂತನೆಯಾಗಿದೆ ಎಂದರು.

ಬೆಂಗಳೂರಿನಲ್ಲಿ ಜನರಿಗಿಂತ ವಾಹನಗಳ ಸಂಖ್ಯೆ ಹೆಚ್ಚಾಗಿದೆ. ಪ್ರತಿ ದಿನ‌ ಐದು ಸಾವಿರ ವಾಹನಗಳು ಹೊಸತಾಗಿ ರಸ್ತೆಗಿಳಿಯುತ್ತಿವೆ. ಬೆಂಗಳೂರು ದಿನನಿತ್ಯ ಬೆಳೆಯುತ್ತಿದ್ದು, ಸಮಸ್ಯೆ ಗುರುತಿಸಿ ಅದಕ್ಕೆ ಪರಿಹಾರ ಕಲ್ಪಿಸಬೇಕಾಗಿದೆ ಎಂದರು.

ಬೆಂಗಳೂರು ವಿಮಾನ ನಿಲ್ದಾಣದಲ್ಲಿ ಕೆಂಪೇಗೌಡರ ಪ್ರತಿಮೆ, ದಿಲ್ಲಿಯಿಂದ ಬಂದ 4,000 ಕೆಜಿ ತೂಕದ ಖಡ್ಗ
ಕಾರ್ಯಕ್ರಮದಲ್ಲಿ ಆದಿ ಚುಂಚನಗಿರಿ ನಿರ್ಮಲಾನಂದ‌ ಶ್ರೀ ಮಾತನಾಡಿ, ಕೆಂಪೇಗೌಡರು ಸರ್ವ ಜನಾಂಗದ ಶಾಂತಿಯ ತೋಟದಂತೆ. ಎಲ್ಲರನ್ನೂ ಸರ್ವ ಸಮಾನರಾಗಿ‌ ನೋಡಿದವರು. ಕೇವಲ ಒಂದು ಜಾತಿಯಿಂದ ಸಮಾಜ ಕಟ್ಟಲು ಸಾಧ್ಯವಿಲ್ಲ ಎಂದರು.

ಬೆಂಗಳೂರಿನಲ್ಲಿ‌ ಜನಸಂಖ್ಯೆ ಹೆಚ್ಚಳಕ್ಕೆ ಆತಂಕ ವ್ಯಕ್ತಪಡಿಸಿದ ಶ್ರೀಗಳು, ಮುಂದಿನ ಇಪ್ಪತ್ತು ಮೂವತ್ತು ವರ್ಷಗಳಲ್ಲಿ ಮೂರರಿಂದ‌ ನಾಲ್ಕು ಕೋಟಿಯಷ್ಟು‌ ಜನಸಂಖ್ಯೆ ಏರಲಿದೆ. ಈ‌ ಹಿಂದೆ ‌ಬೆಂಗಳೂರಿನ‌ ಲ್ಯಾಂಡ್ ಲಾರ್ಡ್ಸ್ ಗಳು ಇಂದು ಸ್ಲಂಗಳಲ್ಲಿ‌ ವಾಸವಿದ್ದಾರೆ ಎಂದರು.

ಕೆಂಪೇಗೌಡರ ದಿನಾಚರಣೆಗೆ ಕೇವಲ ಸಮುದಾಯದ ‌ಶ್ರೀಗಳ ಆಹ್ವಾನ ಅಷ್ಟೇ‌‌ ಬೇಡ, ಸರ್ಕಾರದ‌ ಈ ರೀತಿಯ ಕಾರ್ಯಕ್ರಮಗಳಿಗೆ ಎಲ್ಲಾ ಸಮುದಾಯದ ಸ್ವಾಮೀಜಿಗಳನ್ನು ಆಹ್ವಾನಿಸುವಂತೆ ಸರ್ಕಾರಕ್ಕೆ‌ ಆದಿ ಚುಂಚನಗಿರಿ ನಿರ್ಮಲಾನಂದ‌ ಶ್ರೀ ಸಲಹೆ‌ ನೀಡಿದರು.