ಪೊಲೀಸರನ್ನ ಬೆಂಬಿಡದೆ ಕಾಡುತ್ತಿದೆ ಕೊರೊನಾ, ಕೆಂಗೇರಿ ಪೊಲೀಸ್‌ ಠಾಣೆ ಸೀಲ್‌ಡೌನ್‌!

ಬೆಂಗಳೂರು: ವಿಶ್ವದಾದ್ಯಂತ ರೌದ್ರ ನರ್ತನ ತೋರುತ್ತಿರುವ ಕೊರೊನಾ ವೈರಸ್‌ ಇದೀಗ ಕೊರೊನಾ ವರಿಯರ್ಸ್‌ಗಳನ್ನೇ ಟಾರ್ಗೆಟ್‌ ಮಾಡಿದಂತಿದೆ. ಬೆಂಗಳೂರಿನ ಹಲವು ಪೊಲೀಸರಿಗೆ ಸರದಿಯಂತೆ ಕೊರೊನಾ ಸೋಂಕು ಹರಡುತ್ತಿದೆ. ಇದು ರಾಜ್ಯ ಪೊಲೀಸ್‌ ಇಲಾಖೆಯನ್ನ ಮಾತ್ರವಲ್ಲದೇ ಸರ್ಕಾರವನ್ನು ಆತಂಕಕ್ಕೆ ದೂಡಿದೆ.

ಇದೀಗ ಕೆಂಗೇರಿ ಠಾಣೆಯ ಮುಖ್ಯ ಪೇದೆಯೊಬ್ಬರಿಗೆ ಕೊರೊನಾ ದೃಢಪಟ್ಟಿರುವುದಾಗಿ ತಿಳಿದುಬಂದಿದೆ. ಈ ಹಿನ್ನೆಲೆ ಕೆಂಗೇರಿ ಪೊಲೀಸ್‌ ಠಾಣೆಯನ್ನ ಸೀಲ್‌ಡೌನ್‌ ಮಾಡಲಾಗಿದೆ. ಇನ್ನು ಸರಗಳ್ಳತನ ಆರೋಪಿಯೊಬ್ಬನಿಗೆ ಕೊರೊನಾ ಪಾಸಿಟಿವ್ ಹಿನ್ನೆಲೆಯಲ್ಲಿ ತಿಲಕನಗರ ಪೊಲೀಸ್ ಠಾಣೆಯನ್ನ ಸೀಲ್‌ಡೌನ್‌‌ ಮಾಡಲಾಗಿದೆ ಎಂದು ತಿಳಿದುಬಂದಿದೆ. ಇನ್ನು ಆರೋಪಿಯ ಪ್ರಾಥಮಿಕ ಸಂಪರ್ಕಕ್ಕೆ ಬಂದ ಪೊಲೀಸರಿಗೂ ಕ್ವಾರಂಟೈನ್‌ ಮಾಡಲು ಹಿರಿಯ ಅಧಿಕಾರಿಗಳು ಸೂಚನೆ ನೀಡಿದ್ದಾರೆ.

ಇದಲ್ಲದೇ ಸಿಸಿಬಿಯ ಇಬ್ಬರು ಪೊಲೀಸರಿಗೆ ಕೊರೊನಾ ಶಂಕೆ ವ್ಯಕ್ತವಾಗಿದೆ. ಜನರನ್ನ ಕೊರೊನಾ ಸೋಂಕಿನಿಂದ ರಕ್ಷಿಸುತ್ತಿದ್ದ ವಾರಿಯರ್ಸ್‌ಗಳಿಗೆ ಇದೀಗ ಸೋಂಕು ವ್ಯಾಪಕವಾಗಿ ಹರಡುತ್ತಿದೆ. ಈಗಾಗಲೇ ಬೆಂಗಳೂರಿನಲ್ಲಿ ಮೂವರು ಪೊಲೀಸರು ಕೊರೊನಾ ಸೋಂಕಿಗೆ ಬಲಿಯಾಗಿದ್ದಾರೆ. ಇನ್ನು ಕಲಾಸಿಪಾಳ್ಯ ಹಾಗೂ ವಿವಿ ಪುರಂ ಪೊಲೀಸ್‌ ಠಾಣೆಯನ್ನ ಈಗಾಗಲೇ ಸೀಲ್‌ಡೌನ್‌ ಮಾಡಲಾಗಿದೆ.

2008ರಲ್ಲಿ ಗಾಂಧಿ ಪರಿವಾರಕ್ಕೆ ಚೀನಾ ಸರ್ಕಾರದ ಆತಿಥ್ಯ? ಬಿಜೆಪಿ ವಾದ ನಿಜವೇ..?

ಪೊಲೀಸರು ಹೊರಗಿನವರೊಂದಿಗೆ ಸಂಪರ್ಕ ಸಾಧಿಸುವುದರಿಂದ ಕೊರೊನಾ ಸೋಂಕು ಖಾಕಿಗಳಿಗೆ ಹರಡುತ್ತಿದೆ. ಈಗಾಗಲೇ ರಾಜ್ಯದ 17 ಪೊಲೀಸ್ ಠಾಣೆಯ 125ಕ್ಕೂ ಹೆಚ್ಚು ಪೊಲೀಸರಿಗೆ ಕೊರೋನಾ ಸೋಂಕು ತಗುಲಿತ್ತು. ನಗರದಲ್ಲಿ ಪೊಲೀಸರಿಗೆ ಕೊರೋನಾ ಸೋಂಕಿನ ಭೀತಿ ಹೆಚ್ಚಾಗಿರುವ ಹಿನ್ನೆಲೆ ಬೆಂಗಳೂರು ನಗರ ಪೊಲೀಸ್ ಕಮೀಷನರ್ ಭಾಸ್ಕರ್ ರಾವ್ 13 ಹೊಸ ರೂಲ್ಸನ್ನ ಜಾರಿಗೊಳಿಸಿದ್ದರು.