ಆ್ಯಪ್ನಗರ

ಅಂತಾರಾಷ್ಟ್ರೀಯ ಟ್ರಾನ್ಸಿಟ್‌ ಹಬ್‌ ಆಗಲಿದೆ ಕೆಐಎ

ಬೆಂಗಳೂರಿನ ಐಟಿ ಕ್ಷೇತ್ರ, ವೈದ್ಯಕೀಯ ವಲಯ, ಪ್ರವಾಸೋದ್ಯಮ ಬೆಳವಣಿಗೆ ಹಾಗೂ ಐಟಿ ಉದ್ಯೋಗಿಗಳು, ಉದ್ಯಮಿಗಳು ಹಾಗೂ ಪ್ರವಾಸಿಗರ ಪ್ರಯಾಣಕ್ಕೆ ಲಂಡನ್‌ ಸೇರಿದಂತೆ ವಿದೇಶಗಳ ಪ್ರಮುಖ ನಗರಗಳಿಗೆ ನೇರ ವಿಮಾನ ಸಂಪರ್ಕದಿಂದ ಆರ್ಥಿಕವಾಗಿ ಸಾಕಷ್ಟು ಅನುಕೂಲವಾಗಲಿದೆ.

Vijaya Karnataka 14 Nov 2018, 9:51 am
ಬೆಂಗಳೂರು: ದೇಶದ ಮೂರನೇ ಅತಿ ಹೆಚ್ಚು ಪ್ರಯಾಣಿಕ ದಟ್ಟಣೆಯ ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣವನ್ನು (ಕೆಐಎ) ಅಂತಾರಾಷ್ಟ್ರೀಯ ಟ್ರಾನ್ಸಿಟ್‌ ಏರ್‌ಪೋರ್ಟ್‌ ಆಗಿ ಅಭಿವೃದ್ಧಿಪಡಿಸುವ ಯೋಜನೆಗಳಿಗೆ ಮತ್ತಷ್ಟು ಬಲ ಸಿಗುತ್ತಿದ್ದು, ಅಂತಾರಾಷ್ಟ್ರೀಯ ಮಾರ್ಗದಲ್ಲಿ ಕೆಐಎನಿಂದ ಮತ್ತಷ್ಟು ವಿಮಾನಗಳ ಹಾರಾಟ ಆರಂಭವಾಗುತ್ತಿವೆ.
Vijaya Karnataka Web KIA


ಲಂಡನ್‌ ಮತ್ತು ಕೆಐಎ ನಡುವೆ ಏರ್‌ಇಂಡಿಯಾ (ನ.16,17) ನೇರ ವಿಮಾನ ಸಂಪರ್ಕ ಆರಂಭಿಸುತ್ತಿದೆ. ಇದರ ಜೊತೆಗೆ ದೇಶದ ಅತಿದೊಡ್ಡ ಖಾಸಗಿ ಏರ್‌ಲೈನ್‌ ಕಂಪನಿ ಇಂಡಿಗೋ, ಮಲೇಶಿಯಾದ ಕೌಲಾಲಂಪುರ ಹಾಗೂ ಮಾಲ್ಡೀವ್ಸ್‌ನ ಮಾಲೆಗೆ ಕೆಐಎನಿಂದ ನ.15ರಿಂದ ವಾರಕ್ಕೆರಡು ಬಾರಿ ವಿಮಾನ ಹಾರಾಟ ಆರಂಭಿಸುತ್ತಿದೆ. ಡಿ.11ರಿಂದ ಹಾಂಕಾಂಗ್‌ಗೂ ನೇರ ವಿಮಾನ ಆರಂಭಿಸುತ್ತಿದೆ. ಇದೇ ವೇಳೆ ಮತ್ತೊಂದು ದೇಶಿಯ ಖಾಸಗಿ ಏರ್‌ಲೈನ್‌ ಗೋ ಏರ್‌ ಕೂಡಾ ಕೂಡಾ ಮಾಲ್ಡೀವ್ಸ್‌ನ ಮಾಲೆ ಮತ್ತು ಥೈಲ್ಯಾಂಡ್‌ನ ಪುಕೇಟ್‌ಗೆ ಡಿ.9ರಿಂದ ವಿಮಾನ ಹಾರಾಟ ಆರಂಭಿಸುತ್ತಿದೆ.

ಬೆಂಗಳೂರಿನ ಐಟಿ ಕ್ಷೇತ್ರ, ವೈದ್ಯಕೀಯ ವಲಯ, ಪ್ರವಾಸೋದ್ಯಮ ಬೆಳವಣಿಗೆ ಹಾಗೂ ಐಟಿ ಉದ್ಯೋಗಿಗಳು, ಉದ್ಯಮಿಗಳು ಹಾಗೂ ಪ್ರವಾಸಿಗರ ಪ್ರಯಾಣಕ್ಕೆ ಲಂಡನ್‌ ಸೇರಿದಂತೆ ವಿದೇಶಗಳ ಪ್ರಮುಖ ನಗರಗಳಿಗೆ ನೇರ ವಿಮಾನ ಸಂಪರ್ಕದಿಂದ ಆರ್ಥಿಕವಾಗಿ ಸಾಕಷ್ಟು ಅನುಕೂಲವಾಗಲಿದೆ.

ಟ್ರಾನ್ಸಿಟ್‌ ಏರ್‌ಪೋರ್ಟ್‌ನ ಅನುಕೂಲಗಳು: ಭಾರತದಿಂದ ಲಂಡನ್‌ ಸೇರಿದಂತೆ ಯುರೋಪ್‌ನ ಪ್ರಮುಖ ನಗರಗಳಿಗೆ ತೆರಳಬೇಕಿರುವ ಪ್ರಯಾಣಿಕರು ದುಬೈ ಸೇರಿದಂತೆ ಇನ್ನಿತರ ಗಲ್ಪ್‌ ನಗರಗಳಿಗೆ ತೆರಳಿ ಅಲ್ಲಿಂದ ವಿದೇಶಿ ಏರ್‌ಲೈನ್ಸ್‌ ವಿಮಾನಗಳಲ್ಲಿ ಪ್ರಯಾಣಿಸಬೇಕು. ಈ ಮೂಲಕ ವಿದೇಶಿ ವಿಮಾನ ನಿಲ್ದಾಣಗಳು ಟ್ರಾನ್ಸಿಟ್‌ ಹಬ್‌ ಆಗಿ ಬೆಳೆಯಲು ಮತ್ತು ವಿದೇಶಿ ಏರ್‌ಲೈನ್ಸ್‌ಗಳ ಬೆಳವಣಿಗೆಗೆ ಅನುವು ಮಾಡಿಕೊಟ್ಟಂತಾಗುತ್ತದೆ. ಮತ್ತೊಂದೆಡೆ ಬೆಂಗಳೂರು ಸೇರಿದಂತೆ ದೇಶದ ಪ್ರಮುಖ ವಿಮಾನ ನಿಲ್ದಾಣಗಳು ಸ್ಥಳಾವಕಾಶ ಹಾಗೂ ಆರ್ಥಿಕವಾಗಿ ಅಭಿವೃದ್ಧಿ ಹೊಂದುವ ಅವಕಾಶಗಳನ್ನು ಹೊಂದಿದ್ದರೂ ಅದನ್ನು ವಿದೇಶಕ್ಕೆ ಬಿಟ್ಟು ಕೊಡುವಂತಾಗಿದೆ. ಹೀಗಾಗಿ, ದೇಶದಲ್ಲಿರುವ ನೂರಾರು ಏರ್‌ಪೋರ್ಟ್‌ಗಳಿಂದ ದೂರದ ಮಹಾನಗರಗಳಿಗೆ ಪ್ರಯಾಣ ಬೆಳೆಸಲು ನಮ್ಮ ದೇಶದಲ್ಲೇ ಇರುವ ಪ್ರಮುಖ ವಿಮಾನ ನಿಲ್ದಾಣಗಳಲ್ಲಿ ಟ್ರಾನ್ಸಿಟ್‌ ನಿಲ್ದಾಣಗಳಾಗಿ ಬೆಳೆಸುವುದಕ್ಕೆ ಭಾರತೀಯ ವಿಮಾನಯಾನ ಪ್ರಾಧಿಕಾರ ಉತ್ತೇಜನ ನೀಡುತ್ತಿದೆ. ಈ ವಿಷಯದಲ್ಲಿ ಕೆಐಎ ಮುಂಚೂಣಿಯಲ್ಲಿದೆ ಎಂದು ಅಧಿಕಾರಿಯೊಬ್ಬರು ತಿಳಿಸಿದರು.

ಲಂಡನ್‌-ಬೆಂಗಳೂರು ನೇರ ವಿಮಾನ: ಲಂಡನ್‌-ಬೆಂಗಳೂರು ನಡುವೆ ಹಾರಾಟಕ್ಕೆ ಏರ್‌ ಇಂಡಿಯಾ, 256 ಸೀಟ್‌ಗಳ ಬೋಯಿಂಗ್‌ ಡ್ರೀಮ್‌ಲೈನರ್‌ ವಿಮಾನವನ್ನು ಬಳಕೆ ಮಾಡುತ್ತಿದೆ.

ಬ್ರಿಟೀಷ್‌ ಏರ್‌ವೇಸ್‌ ಈಗಾಗಲೇ ಲಂಡನ್‌-ಬೆಂಗಳೂರು ನಡುವೆ ನೇರ ವಿಮಾನ ಸಂಪರ್ಕ ಕಲ್ಪಿಸಿದೆ. ಆದರೆ, ಈ ಮಾರ್ಗದಲ್ಲಿ ಬೆಂಗಳೂರಿನಿಂದ ಪ್ರಯಾಣಿಕರ ಬೇಡಿಕೆ ಹೆಚ್ಚಿರುವ ಹಿನ್ನೆಲೆಯಲ್ಲಿ ಏರ್‌ ಇಂಡಿಯಾ ಈ ನಿರ್ಧಾರ ಕೈಗೊಂಡಿದೆ. ನ.16ರಿಂದ ಲಂಡನ್‌ನಿಂದ ಬೆಂಗಳೂರು ಹಾಗೂ ನ.17ರಿಂದ ಬೆಂಗಳೂರಿನಿಂದ ಲಂಡನ್‌ಗೆ ವಾರಕ್ಕೆ ಮೂರು ಬಾರಿ ವಿಮಾನ ಹಾರಾಟ ಆರಂಭವಾಗಲಿದೆ. ಪ್ರಯಾಣದ ಅವಧಿ 9 ತಾಸು 30 ನಿಮಿಷ ಆಗಿರಲಿದೆ.

ಮುಂದಿನ ಲೇಖನ

Vijay Karnataka News App: ನಿಮ್ಮ ಸುತ್ತಮುತ್ತಲು ನಡೆಯುವ ವಿದ್ಯಮಾನಗಳನ್ನುಹಂಚಿಕೊಳ್ಳಲು ಬಯಸುತ್ತೀರಾ? ಹಾಗಿದ್ದಲ್ಲಿ ವಿಜಯ ಕರ್ನಾಟಕ ಆ್ಯಪ್‌ಡೌನ್‌ಲೋಡ್‌ ಮಾಡಿಕೊಳ್ಳಿ ಹಾಗೂ ರಿಪೋರ್ಟ್‌ ಕಳಿಸಿ
ಲೇಟೆಸ್ಟ್‌ ನ್ಯೂಸ್‌ ಅಪ್‌ಡೇಟ್‌ಗಳನ್ನು ಪಡೆಯಿರಿ, Vijay Karnataka ಫೇಸ್‌ಬುಕ್‌ಪೇಜ್‌ ಲೈಕ್‌ ಮಾಡಿರಿ