ನೀರಿನ ಟ್ಯಾಂಕರ್‌ಗಳಿಗೆ ಉದ್ದಿಮೆ ಪರವಾನಗಿ ಕಡ್ಡಾಯ

ಬೆಂಗಳೂರು: ಖಾಸಗಿ ಟ್ಯಾಂಕರ್‌ಗಳ ಮೂಲಕ ನೀರು ಪೂರೈಸುವವರು ಉದ್ದಿಮೆ ಪರವಾನಗಿ ಪಡೆಯುವುದನ್ನು ಕಡ್ಡಾಯಗೊಳಿಸಲಾಗುವುದು ಎಂದು ಬಿಬಿಎಂಪಿ ತೆರಿಗೆ ಮತ್ತು ಆರ್ಥಿಕ ಸ್ಥಾಯಿ ಸಮಿತಿ ಅಧ್ಯಕ್ಷ ಎಂ.ಕೆ.ಗುಣಶೇಖರ್‌ ತಿಳಿಸಿದ್ದಾರೆ.

ಬೇಸಿಗೆಯಲ್ಲಿಟ್ಯಾಂಕರ್‌ಗಳ ಹಾವಳಿ ಜಾಸ್ತಿಯಾಗಲಿದೆ. ಹೀಗಾಗಿ ಪಾಲಿಕೆಯಿಂದ ಉದ್ದಿಮೆ ಪರವಾನಗಿ ಪಡೆಯುವುದನ್ನು ಕಡ್ಡಾಯಗೊಳಿಸಲು ಚಿಂತಿಸಲಾಗಿದೆ. ಪರವಾನಗಿ ಪಡೆಯುವ ಮಾಲೀಕರು ನಿಯಮಗಳನ್ನು ಪಾಲಿಸಬೇಕಾಗುತ್ತದೆ. ನಗರದಲ್ಲಿ 3 ಸಾವಿರ ನೀರಿನ ಟ್ಯಾಂಕರ್‌ಗಳಿವೆ. ನೀರು ಪೂರೈಸುವ ಟ್ಯಾಂಕ್‌ಗಳಿಗೆ ಸ್ಟೀಲ್‌ಕೋಟಿಂಗ್‌ಮಾಡಿರಬೇಕು. ಐಎಸ್‌ಐ ದೃಢೀಕರಣ ಹೊಂದಿರಬೇಕು. ಆಹಾರ ಇಲಾಖೆಯಿಂದ ನೀರಿನ ಮೂಲ ಮತ್ತು ದರ ನಿಗದಿಯ ಪ್ರಮಾಣಪತ್ರ ಪಡೆದುಕೊಳ್ಳಬೇಕು. ಆನಂತರವೇ ಪರವಾನಗಿ ನೀಡಲಾಗುವುದು ಎಂದು ಹೇಳಿದರು.

ಉದ್ದಿಮೆ ಪರವಾನಗಿ ನೀಡಲ್ಲ.ವಸತಿ ಪ್ರದೇಶಗಳಲ್ಲಿವಾಣಿಜ್ಯ ಮಳಿಗೆಗಳನ್ನು ತೆರೆಯಲು ಪರವಾನಗಿ ನೀಡುವುದಿಲ್ಲ. ಒಂದೊಮ್ಮೆ ಪರವಾನಗಿ ಪಡೆದಿದ್ದರೆ, ನವೀಕರಿಸಿಕೊಡುವುದಿಲ್ಲ. ಬೆಸ್ಕಾಂನವರು ವಸತಿ ಪ್ರದೇಶಗಳಲ್ಲಿರುವ 5 ಲಕ್ಷ ಉದ್ದಿಮೆಗಳಿಗೆ ವಿದ್ಯುತ್‌ಸಂಪರ್ಕ ನೀಡಿದೆ. ಆದರೆ, ಪಾಲಿಕೆಯು ಕೇವಲ 55 ಸಾವಿರ ಉದ್ದಿಮೆಗಳಿಗೆ ಪರವಾನಗಿ ನೀಡಿದೆ ಎಂದರು. ಕಂದಾಯ ಇಲಾಖೆ ಜಂಟಿ ಆಯುಕ್ತ ವೆಂಕಟಾಚಲಪತಿ ಉಪಸ್ಥಿತರಿದ್ದರು.