ಫುಟ್ಬಾಲ್‌, ಹೆಲ್ಮೆಟ್‌ಗಳಿಂದ ಬ್ಲಾಕ್ ಆಗುತ್ತಿವೆ ಬೆಂಗಳೂರಿನ ಮ್ಯಾನ್‌ಹೋಲ್‌ಗಳು

ಬೆಂಗಳೂರು: ದಕ್ಷಿಣ ಬೆಂಗಳೂರಿನ ಉತ್ತರಹಳ್ಳಿಯಲ್ಲಿ ಚರಂಡಿ ಕಟ್ಟಿಕೊಂಡು ಮ್ಯಾನ್‌ಹೋಲ್‌ನ ಮೇಲಿನಿಂದ ರಸ್ತೆಯುದ್ದಕ್ಕೂ ಒಳಚರಂಡಿ ನೀರು ಹರಿದಿದೆ. ಇದರಿಂದ ಸುಬ್ರಮಣ್ಯಪುರ ಪೊಲೀಸ್ ಠಾಣೆ ಪಕ್ಕದ ರಸ್ತೆ ಗಬ್ಬು ನಾರುತ್ತಿತ್ತು ಎಂದು ಜನರು ದೂರಿದ್ದಾರೆ. ಆದರೆ, ಇದಕ್ಕೆ ಕಾರಣ ಮಾತ್ರ ವಿಲಕ್ಷಣವಾದುದು.

ಚರಂಡಿ ನೀರು ರಸ್ತೆಯುದ್ದಕ್ಕೂ ಹರಿದು ಹೋಗುತ್ತಿದೆ ಎಂದು ನಿವಾಸಿಗಳ ದೂರಿಗೆ ಸ್ಪಂದಿಸಿದ ಬಿಡಬ್ಲ್ಯುಎಸ್‌ಎಸ್‌ಬಿ ಕೊಳಕನ್ನು ತೆಗೆಯಲು 4 ಹೆಚ್ಚಿನ ಸಾಮರ್ಥ್ಯದ ಜೆಟ್ಟಿಂಗ್ ಯಂತ್ರಗಳನ್ನು ಬಳಸಿದ್ದು, ರಾತ್ರಿಯವರೆಗೂ ಗಲೀಜು ನೀರು ಮನೆಗಳಿಗೆ ನುಗ್ಗದಂತೆ ಎಚ್ಚರ ವಹಿಸಿದ್ದಾರೆ. ಈ ವೇಳೆ, ಮ್ಯಾನ್‌ಹೋಲ್‌ ಒಳಗೆ ಫುಟ್ಬಾಲ್‌ಗಳು, ಹೆಲ್ಮೆಟ್‌ಗಳು, ಬಟ್ಟೆಗಳು, ಗೃಹಬಳಕೆ ವಸ್ತುಗಳು ಸೇರಿದಂತೆ ಇತರೆ ವಸ್ತುಗಳು ಸಹ ಪತ್ತೆಯಾಗಿವೆ. ಮ್ಯಾನ್‌ಹೋಲ್‌ನ ಮುಚ್ಚಳಗಳನ್ನು ತೆರೆದು ಬಳಸದ ಗೃಹಬಳಕೆ ವಸ್ತುಗಳನ್ನು ನಿವಾಸಿಗಳು ಬಿಸಾಡುತ್ತಿದ್ದಾರೆ. ಇದರಿಂದ ಡ್ರೈನೇಜ್ ಕಟ್ಟಿಕೊಂಡಿದೆ ಎಂದು ಬಿಡಬ್ಲ್ಯುಎಸ್‌ಎಸ್‌ಬಿ ಅಧಿಕಾರಿಗಳು ಆರೋಪಿಸಿದ್ದಾರೆ.

ಇನ್ನು, ಬೇರೆ ಒಳಚರಂಡಿಯ ಸ್ಲ್ಯಾಬ್‌ಗಳನ್ನು ತೆರೆದು ರಸ್ತೆ ಮೇಲೆ ಹರಿದಿದ್ದ ಚರಂಡಿ ನೀರನ್ನು ಬೇರೆ ಕಡೆಗೆ ವರ್ಗಾವಣೆ ಮಾಡಬೇಕಾಯ್ತು ಎಂದು ಉತ್ತರಹಳ್ಳಿಯ ಎಇಇ ದಿವ್ಯಶ್ರೀ ಮಾಹಿತಿ ನೀಡಿದ್ದಾರೆ. ಅಲ್ಲದೆ, ಗಾಜಿನ ಚೂರುಗಳು, ಹೆಲ್ಮೆಟ್‌ಗಳು ಹಾಗೂ ಬಟ್ಟೆಗಳು ಮ್ಯಾನ್‌ಹೋಲ್‌ನಲ್ಲಿ ಪತ್ತೆಯಾಗುವುದು ಸಾಮಾನ್ಯವಾಗಿದೆ. ಕೆಲವು ಏರಿಯಾಗಳಲ್ಲಿ ಬೆಡ್‌ಶೀಟ್‌ಗಳನ್ನು ಸಹ ತೆಗೆದಿದ್ದೇವೆ. ಅವರ ಮನೆಯಿಂದ ವಸ್ತುಗಳನ್ನು ಬಿಸಾಡಲು ದೊಡ್ಡ ದೊಡ್ಡ ವಸ್ತುಗಳನ್ನು ಮ್ಯಾನ್‌ಹೋಲ್‌ನೊಳಗೆ ಹಾಕಿರುತ್ತಾರೆ. ಆದರೆ, ಇದರಿಂದ ಜನರಿಗೆ ತೊಂದರೆಯಾಗುತ್ತದೆ ಎಂದು ಅವರು ಅರ್ಥ ಮಾಡಿಕೊಳ್ಳಬೇಕು. ಉತ್ತರಹಳ್ಳಿಯಲ್ಲಿ ನಾವು ಕ್ಲೀನ್ ಮಾಡುವಾಗ ಮನೆಗಳಿಗೆ ನೀರು ಒಳಹೋಗದಂತೆ ತಡೆಯಲು ಗೋಣಿಚೀಲಗಳನ್ನು ಇಟ್ಟಿದ್ದೆವು ಎಂದು ದಿವ್ಯಶ್ರೀ ಹೇಳಿದ್ದಾರೆ.

ಮ್ಯಾನ್‌ಹೋಲ್‌ನ ಮುಚ್ಚಳಗಳನ್ನು ಸುಲಭವಾಗಿ ತೆಗೆಯಬಹುದಾಗಿದೆ. ಹೀಗಾಗಿ, ರಾತ್ರಿ ವೇಳೆಯಲ್ಲಿ ಶೇ. 90ರಷ್ಟು ಜನರು ಮ್ಯಾನ್‌ಹೋಲ್‌ನೊಳಗೆ ವಸ್ತುಗಳನ್ನು ಡಂಪ್ ಮಾಡುತ್ತಾರೆ. ಇದನ್ನು ನೋಡಿದ ಇತರರು ಸಹ ಇದೇ ರೀತಿ ಮಾಡಬಹುದು. ಈ ರೀತಿ ಕೆಲಸಕ್ಕೆ ಬಾರದ ವಸ್ತುಗಳನ್ನು ಮ್ಯಾನ್‌ಹೋಲ್‌ ಒಳಗೆ ಬಿಸಾಡುವುದು ಅಪರಾಧ ಎಂದು ಬಿಡಬ್ಲ್ಯುಎಸ್‌ಎಸ್‌ಬಿ ಅಧಿಕಾರಿಯೊಬ್ಬರು ಹೇಳಿದ್ದಾರೆ. ಜತೆಗೆ ಥರ್ಮಕೋಲ್, ಟೈರ್‌ಗಳು, ಹ್ಯಾಂಡ್‌ಬ್ಯಾಗ್‌ಗಳು, ಸ್ಯಾನಿಟರಿ ನ್ಯಾಪ್ಕಿನ್‌, ಪ್ಲಾಸ್ಟಿಕ್‌ ಕವರ್‌ಗಳು ಹಾಗೂ ಜೈವಿಕವಲ್ಲದ ತ್ಯಾಜ್ಯಗಳನ್ನು ಸಹ ಡ್ರೈನೇಜ್‌ಗೆ ಬಿಸಾಡುವುದು ಸಾಮಾನ್ಯವಾಗಿದೆಯಂತೆ.