ವಾಟ್ಸ್‌ಆ್ಯಪ್‌ ಗ್ರೂಪ್‌ನಲ್ಲಿ ಗುಡ್‌ಮಾರ್ನಿಂಗ್‌, ಗುಡ್‌ನೈಟ್‌ ಗಲಾಟೆ

ಬೆಂಗಳೂರು : ವಾಟ್ಸ್‌ಆ್ಯಪ್‌ ಗ್ರೂಪಿನಲ್ಲಿ ಬರುತ್ತಿದ್ದ ಗುಡ್‌ ನೈಟ್‌, ಗುಡ್‌ ಮಾರ್ನಿಂಗ್‌ ಮೆಸೇಜ್‌ಗಳ ಕಾರಣಕ್ಕೆ ಗ್ರೂಪ್‌ ಅಡ್ಮಿನ್‌ ಆಗಿದ್ದ ಮಹಿಳೆಗೆ ಅನುಚಿತ ಮೆಸೇಜ್‌ಗಳನ್ನು ಕಳುಹಿಸಿದ ವ್ಯಕ್ತಿಯೊಬ್ಬ ಇದೀಗ ಪೇಚಿಗೆ ಸಿಲುಕಿದ್ದಾರೆ. ಸದ್ಯ ಪ್ರಕರಣ ಪೊಲೀಸ್‌ ಠಾಣೆ ಮೆಟ್ಟಿಲೇರಿದ್ದು ಎಫ್‌ಐಆರ್‌ ದಾಖಲಾಗುತ್ತಿದ್ದಂತೆ, ಆತ ಪೊಲೀಸರ ಕೈಗೆ ಸಿಗದೆ ತಪ್ಪಿಸಿಕೊಂಡಿದ್ದಾನೆ.

ನಾಗಸಂದ್ರ ನಿವಾಸಿ ಹಾಗೂ ಸಾಮಾಜಿಕ ಕಾರ್ಯಕರ್ತೆಯೊಬ್ಬರು ಸ್ಥಳೀಯ ಜನರ ಜತೆ ಸಂಪರ್ಕದಲ್ಲಿರುವ ಉದ್ದೇಶದಿಂದ ವಾಟ್ಸ್‌ ಆ್ಯಪ್‌ ಗ್ರೂಪ್‌ ಮಾಡಿದ್ದರು. ಇದೇ ಗ್ರೂಪಿನ ಸದಸ್ಯರಾಗಿರುವ ರಣಧೀರ ನಾಯಕ ಎಂಬುವವರು ತನ್ನ ವಿರುದ್ಧ ಅನುಚಿತ ಆಡಿಯೋವನ್ನು ಗ್ರೂಪಿನಲ್ಲಿ ಹಾಕಿರುವುದಲ್ಲದೆ, ಜೀವ ಬೆದರಿಕೆಯೊಡ್ಡಿದ್ದಾರೆ ಎಂದು ಆರೋಪಿಸಿ ಗ್ರೂಪಿನ ಅಡ್ಮಿನ್‌ ಆಗಿರುವ 38 ವರ್ಷದ ಮಹಿಳೆ ಪೀಣ್ಯ ಠಾಣೆಗೆ ದೂರು ನೀಡಿದ್ದರು.

ಕಿರಿಕ್‌ ಶುರುವಾಗಿದ್ದೇಕೆ ?

ಸಿನಿಮಾ ಕಲಾವಿದ ಎಂದು ಪರಿಚಯಿಸಿಕೊಂಡು ಮಹಿಳೆಯ ಮೊಬೈಲ್‌ಗೆ ಸಂದೇಶ ಕಳುಹಿಸಿದ್ದ ನಾಯಕ್‌, ತನ್ನನ್ನು ಗ್ರೂಪಿಗೆ ಸೇರಿಸಿಕೊಳ್ಳುವಂತೆ ಮನವಿ ಮಾಡಿಕೊಂಡಿದ್ದರು. ಅದರಂತೆ ಮಹಿಳೆ ಅವರನ್ನು ಗ್ರೂಪಿಗೆ ಸೇರಿಸಿದ್ದರು. ಗ್ರೂಪಿಗೆ ಸೇರಿದ ಕೆಲ ದಿನಗಳಲ್ಲಿಯೇ ಅದರಲ್ಲಿ ಬರುತ್ತಿದ್ದ ಗುಡ್‌ ನೈಟ್‌, ಗುಡ್‌ ಮಾರ್ನಿಂಗ್‌ ಸೇರಿದಂತೆ ಶುಭಾಶಯ ಮೆಸೇಜ್‌ಗಳಿಂದಾಗಿ ನಾಯಕ್‌ ಸಿಟ್ಟಾಗಿದ್ದರು. ಬಳಿಕ ಅಡ್ಮಿನ್‌, ಗ್ರೂಪಿನಲ್ಲಿ ಶಿಸ್ತು ಕಾಪಾಡುತ್ತಿಲ್ಲ ಎಂದು ಅಸಹನೆ ಕೂಡ ವ್ಯಕ್ತಪಡಿಸಿದ್ದರು. ಅನುಚಿತವಾದ ಮಾತುಗಳನ್ನು ಆಡಿದ ಕಾರಣದಿಂದ ಮಹಿಳೆ, ಭಾಷೆ ಸರಿಯಾಗಿ ಬಳಸುವಂತೆ ಎಚ್ಚರಿಸಿದ್ದರು. ಬಳಿಕ ಇದೇ ವಿಷಯಕ್ಕೆ ಇಬ್ಬರ ನಡುವೆ ಜಗಳ ನಡೆದಿದೆ. ಬಳಿಕ ನಾಯಕ್‌ ಅವರು ಬೆದರಿಕೆಯೊಡ್ಡುವ ಆಡಿಯೋವನ್ನು ಗ್ರೂಪಿನಲ್ಲಿ ಹಾಕಿದ್ದಾರೆ ಎಂದು ಮಹಿಳೆ ದೂರಿನಲ್ಲಿ ವಿವರಿಸಿದ್ದಾರೆ.

ಬೆದರಿಕೆಯೊಡ್ಡುವ ಆಡಿಯೋ ಬಂದ ಬಳಿಕ ಮಹಿಳೆ ಹೊಯ್ಸಳ ಪೊಲೀಸರಿಗೆ ಕರೆ ಮಾಡಿ ದೂರು ಹೇಳಿಕೊಂಡಿದ್ದರು. ಹೊಯ್ಸಳ ವಾಹನ ನಾಯಕ್‌ ಅವರನ್ನು ಹುಡುಕಿಕೊಂಡು ಹೋದರೂ ಅವರು ಪತ್ತೆ ಆಗಲಿಲ್ಲ. ಈ ಕಾರಣದಿಂದ ಮಹಿಳೆ ಪೀಣ್ಯ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ.

ಘ್ಕಿ