ಬಿಎಂಡಬ್ಲ್ಯೂನಲ್ಲಿ ಬಂದು LED ಟಿವಿ ಕದ್ದೊಯ್ದರು!

ಬೆಂಗಳೂರು: ಐಷಾರಾಮಿ ಬಿಎಂಡಬ್ಲ್ಯೂ ಕಾರಿನಲ್ಲಿ ಹೋಟೆಲ್‌ಗೆ ಬಂದ ಇಬ್ಬರು ಐನಾತಿ ಕಳ್ಳರು, ಅಲ್ಲಿಂದ ಮರಳುವಾಗ 32 ಇಂಚಿನ ಎಲ್‌ಇಡಿ ಟಿವಿ ಕದ್ದೊಯ್ದಿರುವ ಘಟನೆ ಪೂರ್ವ ಬೆಂಗಳೂರಿನಲ್ಲಿ ನಡೆದಿದೆ.

ಘಟನೆ ವಿವರ: ಜೂನ್ 10ರ ಮಂಜಾನೆ 10 ಗಂಟೆ ಸಂದರ್ಭದಲ್ಲಿ ತೆಲಂಗಾಣ ನೋಂದಣಿ ಸಂಖ್ಯೆ (TS 11 EK 0555) ಹೊಂದಿದ್ದ ಬಿಎಂಡಬ್ಲ್ಯೂ ಕಾರೊಂದು ಅಸ್ಟ್ರಾ ಹೋಟೆಲ್ ( ತಿಪ್ಪಸಂದ್ರ ಬಳಿ ಇರುವ ಗೀತಾಂಜಲಿ ಲೇಔಟ್‌ ನಲ್ಲಿರುವ) ಮುಂದೆ ಬಂದು ನಿಂತಿತು. ಅದರಿಂದಿಳಿದ ಇಬ್ಬರು ವ್ಯಕ್ತಿಗಳು, ಆಧಾರ ಕಾರ್ಡ್ ದಾಖಲೆ ನೀಡಿ ರೂಮ್ ನಂಬರ್ 302Cಗೆ ಚೆಕ್ ಇನ್ ಆದರು.

ಎರಡು ದಿನಗಳ ಕಾಲ ಹೋಟೆಲ್‌ನಲ್ಲೇ ತಂಗಿದ್ದ ಅವರು, ಶುಕ್ರವಾರ ಯಾವುದೇ ಮಾಹಿತಿ ನೀಡದೆ ಹೋಟೆಲ್‌ನಿಂದ ಪರಾರಿಯಾಗಿದ್ದರು. ಅವರಿಬ್ಬರು ಕಾಣದಿರುವುದನ್ನು ಗಮನಿಸಿದ ಹೋಟೆಲ್ ಸಿಬ್ಬಂದಿ, ಬೇರೊಂದು ಕೀ ಬಳಸಿ ರೂಮ್ ಲಾಕ್ ತೆರೆದಿದ್ದಾರೆ. ಆದರೆ ಅವರಿಬ್ಬರು ಅದಾಗಲೇ ಕಾಲ್ಕಿತ್ತಿರುವುದು ಬೆಳಕಿಗೆ ಬಂದಿದೆ. ಅಷ್ಟೇ ಅಲ್ಲ ರೂಮ್‌ನಲ್ಲಿದ್ದ 32 ಇಂಚಿನ ಎಲ್‌ಇಡಿ ಟಿವಿ ನಾಪತ್ತೆಯಾಗಿದ್ದನ್ನು ಕಂಡು ಸಿಬ್ಬಂದಿ ಹೌಹಾರಿದ್ದಾರೆ.

ತಕ್ಷಣ ಸಿಬ್ಬಂದಿ ಸಿಸಿ ಕ್ಯಾಮರಾ ಪರಿಶೀಲಿಸಿದ್ದು ರೂಮ್‌ನಲ್ಲಿ ತಂಗಿದ್ದ ಇಬ್ಬರು ಅಲ್ಲಿಂದ ಟಿವಿ ಸಮೇತ ಪರಾರಿಯಾಗುತ್ತಿರುವುದು ಬಯಲಾಗಿದೆ. ಪ್ರಕರಣ ದಾಖಲಿಸಿಕೊಂಡಿರುವ ಜೀವನ್‌ ಭೀಮಾ ನಗರ ಪೊಲೀಸರು, ಐನಾತಿ ಕಳ್ಳರ ಪತ್ತೆಗೆ ಬಲೆ ಬೀಸಿದ್ದಾರೆ.

ಆರೋಪಿಗಳು ನೀಡಿದ್ದ ಗುರುತಿನ ಚೀಟಿ ಮತ್ತು ಅವರು ಬಂದಿದ್ದ ಕಾರಿನ ನೋಂದಣಿ ಸಂಖ್ಯೆ ನಕಲಿಯಾಗಿರಬಹುದೆಂದು ಪೊಲೀಸರು ಶಂಕಿಸಿದ್ದಾರೆ.

ತೆಲಂಗಾಣ ಆರ್‌ಟಿಒ ಅಧಿಕಾರಿಗಳ ಸಹಾಯದಿಂದ ಕಾರಿನ ನಿಜವಾದ ಮಾಲೀಕನನ್ನು ಗುರುತಿಸಿ ಆರೋಪಿಗಳನ್ನು ಪತ್ತೆ ಹಚ್ಚುವ ಪ್ರಯತ್ನ ನಡೆದಿದೆ, ಎಂದು ಪೊಲೀಸ್ ಅಧಿಕಾರಿಗಳು ತಿಳಿಸಿದ್ದಾರೆ.