ಮತ್ತೆ ಕೆಟ್ಟು ನಿಂತ ಆರು ಬೋಗಿ ಮೆಟ್ರೊ

ಬೆಂಗಳೂರು: ಆರು ಬೋಗಿ ಮೆಟ್ರೊ ರೈಲಿನಲ್ಲಿ ಮತ್ತೆ ತಾಂತ್ರಿಕ ಸಮಸ್ಯೆ ಕಾಣಿಸಿಕೊಂಡಿದ್ದು, ಭಾನುವಾರ ಸಂಜೆಯೇ ಸಮಸ್ಯೆಯನ್ನು ಸರಿಪಡಿಸಲಾಯಿತು. ಆದರೂ ಸೋಮವಾರ ಬೆಳಗ್ಗೆ ಒಂದು ಗಂಟೆ ತಡವಾಗಿ ಆರು ಬೋಗಿ ರೈಲು ಕಾರ್ಯಾಚರಣೆ ಆರಂಭಿಸಿತು.

ಜು.9 ರಂದು ಆರು ಬೋಗಿ ರೈಲು ಕೆಟ್ಟು ನಿಂತಿದ್ದರಿಂದ ರಿಪೇರಿಗಾಗಿ ಡಿಪೊದಲ್ಲೇ ಇಡಲಾಗಿತ್ತು. ಬೆಳಗ್ಗೆ ಹಾಗೂ ಸಂಜೆ ಕಾರ್ಯಾಚರಣೆ ನಡೆಸಬೇಕಿದ್ದ ರೈಲು ಕೆಟ್ಟು ಹೋಗಿದ್ದರಿಂದ ಪ್ರಯಾಣಿಕರು ದಟ್ಟಣೆಯಲ್ಲೇ ಪ್ರಯಾಣಿಸಿದ್ದರು. ಜು.15 ರಂದು ಸಂಜೆ ರೈಲಿನ ಪರೀಕ್ಷೆ ನಡೆಸಿದಾಗ ಮತ್ತೆ ತಾಂತ್ರಿಕ ಸಮಸ್ಯೆ ಕಾಣಿಸಿಕೊಂಡಿತು. ಶನಿವಾರ ಹಾಗೂ ಭಾನುವಾರದಂದು ಆರು ಬೋಗಿ ರೈಲಿನ ಕಾರ್ಯಾಚರಣೆ ನಡೆಯುವುದಿಲ್ಲ. ಹೀಗಾಗಿ ಪ್ರಯಾಣಿಕರಿಗೆ ಸಮಸ್ಯೆಯಾಗಲಿಲ್ಲ. ಬೈಯ್ಯಪ್ಪನಹಳ್ಳಿ ಡಿಪೊದಲ್ಲಿರುವ ರೈಲು ಸೋಮವಾರದಿಂದ (ಜು.16) ಕಾರ್ಯಾಚರಿಸುವುದು ಅನುಮಾನ ಎಂದು ಅಧಿಕಾರಿಗಳು ತಿಳಿಸಿದ್ದರು. ಆದರೆ ಡಿಪೊದ ಸಿಬ್ಬಂದಿ ತಾಂತ್ರಿಕ ಸಮಸ್ಯೆಯನ್ನು ಕಂಡುಹಿಡಿದು ಸರಿಪಡಿಸುವಲ್ಲಿ ಯಶಸ್ವಿಯಾಗಿದ್ದಾರೆ.

ಆರು ಬೋಗಿ ರೈಲು ಸೋಮವಾರದಿಂದ ಶುಕ್ರವಾರದವರೆಗೆ ಬೆಳಗ್ಗೆ 8 ಗಂಟೆಯಿಂದ ಕಾರ್ಯಾಚರಣೆ ಆರಂಭಿಸುತ್ತದೆ. ಸಂಚಾರ ಆರಂಭವಾದಾಗಿನಿಂದಲೂ ಇದೇ ವೇಳಾಪಟ್ಟಿಯನ್ನು ಅನುಸರಿಸಲಾಗುತ್ತಿದೆ. ಆದರೆ, ಈ ಸೋಮವಾರ ಬೆಳಗ್ಗೆ 10 ಗಂಟೆಗೆ ರೈಲು ಕಾರ್ಯಾಚರಣೆ ಆರಂಭಿಸಿತು. ಮೂರು ಬೋಗಿ ರೈಲು ಸೇವೆ ಮಾತ್ರ ಲಭ್ಯವಿದ್ದ ಕಾರಣ ಬೆಳಗ್ಗೆ 8 ರಿಂದ 10 ಗಂಟೆವರೆಗೆ ಪ್ರಯಾಣಿಕರು ದಟ್ಟಣೆಯಲ್ಲೇ ಪ್ರಯಾಣಿಸಬೇಕಾಯಿತು. ವೈಟ್‌ಫೀಲ್ಡ್‌ ಕೈಗಾರಿಕಾ ಪ್ರದೇಶದಲ್ಲಿ ಕೆಲಸ ಮಾಡುವವರು ಬೆಳಗ್ಗೆ ಇದೇ ಸಮಯದಲ್ಲಿ ಕಚೇರಿಗೆ ಹೋಗಲು ಮೆಟ್ರೊ ಬಳಸುತ್ತಾರೆ. ಈ ಅವಧಿಯಲ್ಲಿ ಆರು ಬೋಗಿ ಮೆಟ್ರೊ ಇಲ್ಲದಿದ್ದರಿಂದ ಹಿಂದಿನಂತೆಯೇ ದಟ್ಟಣೆಯಲ್ಲೇ ಪ್ರಯಾಣಿಸಿ ಕಷ್ಟ ಅನುಭವಿಸಬೇಕಾಯಿತು.