ಮೆಟ್ರೊಗೆ ಆರೇ ತಿಂಗಳಲ್ಲಿ 206 ಕೋಟಿ ರೂ. ಆದಾಯ

ಬೆಂಗಳೂರು : 'ನಮ್ಮ ಮೆಟ್ರೊ'ದಲ್ಲಿ ಪ್ರಯಾಣಿಸುವವರ ಸಂಖ್ಯೆ ಹೆಚ್ಚುತ್ತಿದ್ದು, ರೈಲು ಕಾರ್ಯಾಚರಣೆಯಿಂದ ಆರೇ ತಿಂಗಳಲ್ಲಿ 206 ಕೋಟಿ ರೂ. ಆದಾಯ ಹರಿದುಬಂದಿದೆ.

2018ರ ಏಪ್ರಿಲ್‌ ಆರಂಭದಿಂದ ಸೆಪ್ಟೆಂಬರ್‌ವರೆಗೆ ರೈಲು ಕಾರ್ಯಾಚರಣೆಯಿಂದ ಬಂದ ಆದಾಯವನ್ನು ಲೆಕ್ಕಾಚಾರ ಮಾಡಿ ಬಿಎಂಆರ್‌ಸಿಎಲ್‌ ಪ್ರಾಥಮಿಕ ವರದಿ (ಅನ್‌ ಆಡಿಟೆಡ್‌) ರೂಪಿಸಿದೆ. ಈ ಆರು ತಿಂಗಳ ಅವಧಿಯಲ್ಲಿ ನಿಗಮಕ್ಕೆ ಟಿಕೆಟ್‌ನಿಂದಲೇ 206.91 ಕೋಟಿ ರೂ. ಆದಾಯ ಬಂದಿದೆ ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ. ಇತರೆ ಆದಾಯ ಸೇರಿ ಒಟ್ಟು 214.76 ಕೋಟಿ ರೂ. ಆದಾಯ ಸಂಗ್ರಹವಾಗಿದೆ. 2018-19 ನೇ ಸಾಲಿನ ಆರ್ಥಿಕ ವರದಿ ರೂಪಿಸುವ ಮುನ್ನ ಮೊದಲ ಆರು ತಿಂಗಳ ವರದಿಯನ್ನು ರೂಪಿಸಲಾಗುತ್ತದೆ. ಈ ಪ್ರಾಥಮಿಕ ವರದಿಯಲ್ಲಿ ಮೆಟ್ರೊ ಜನಪ್ರಿಯ ಸಾರಿಗೆಯಾಗಿರುವುದು ಆದಾಯದ ಪ್ರಮಾಣದಿಂದ ಕಂಡುಬಂದಿದೆ.

ಇತ್ತೀಚೆಗೆ ಬಿಎಂಆರ್‌ಸಿಎಲ್‌ ಬಿಡುಗಡೆ ಮಾಡಿದ 2017-18 ನೇ ಸಾಲಿನ ವರದಿಯಲ್ಲಿ ರೈಲು ಕಾರ್ಯಾಚರಣೆಯಿಂದ ಒಂದು ವರ್ಷದಲ್ಲಿ 281 ಕೋಟಿ ರೂ. ಆದಾಯ ಬಂದಿರುವುದನ್ನು ಉಲ್ಲೇಖಿಸಲಾಗಿದೆ. ಇದಕ್ಕೆ ಹೋಲಿಸಿದರೆ ಆರು ತಿಂಗಳಲ್ಲಿ ಬಂದ ಆದಾಯ ದಾಖಲೆಯ ಪ್ರಮಾಣದ್ದು ಎಂದೆನಿಸುತ್ತದೆ. ಆದರೆ ಇದು ಇನ್ನೂ ಪ್ರಾಥಮಿಕ ವರದಿಯಾಗಿರುವುದರಿಂದ ಅಂತಿಮ ವರದಿ ಬಂದ ಮೇಲಷ್ಟೆ ಕಾರ್ಯಾಚರಣೆಯಿಂದ ಬಂದ ಆದಾಯದ ಬಗ್ಗೆ ನಿಖರ ಮಾಹಿತಿ ದೊರೆಯಲಿದೆ.

ಆರು ಬೋಗಿ ರೈಲುಗಳು

ಮೆಟ್ರೊಗೆ ಆರು ಬೋಗಿಯ 3 ರೈಲುಗಳು ಹೊಸದಾಗಿ ಸೇರ್ಪಡೆಯಾಗಿದೆ. ಇದರಿಂದಾಗಿ ಪ್ರತಿ ದಿನದ ಪ್ರಯಾಣಿಕರ ಸಂಖ್ಯೆ ಹೆಚ್ಚತೊಡಗಿದೆ. ಬಸ್‌, ಸ್ವಂತ ವಾಹನಗಳನ್ನು ತೊರೆದು ಮೆಟ್ರೊ ಹತ್ತುತ್ತಿರುವವರ ಸಂಖ್ಯೆ ಅಧಿಕವಾಗುತ್ತಿದೆ. ಆದ್ದರಿಂದ ಮೆಟ್ರೊಗೆ ಉತ್ತಮ ಆದಾಯ ಬರುತ್ತಿದೆ. ಮೆಟ್ರೊ ಎರಡನೇ ಹಂತದ ಯೋಜನೆ ದೊಡ್ಡದಾಗಿರುವುದರಿಂದ ವಿದೇಶಿ ಹಣಕಾಸು ಸಂಸ್ಥೆಗಳಿಂದ ಸಾಲ ಪಡೆಯಲಾಗಿದೆ. ಒಂದನೇ ಹಂತದ ಯೋಜನೆಯಲ್ಲೂ ಸಾಲ ಪಡೆಯಲಾಗಿದೆ. ಈ ಸಾಲಗಳನ್ನು ತೀರಿಸಲು ಹಾಗೂ ನಿರ್ವಹಣೆಗೆ ಹೆಚ್ಚು ಹಣ ಖರ್ಚಾಗುತ್ತಿದೆ. ರೈಲು ಕಾರ್ಯಾಚರಣೆಯಿಂದ ಉತ್ತಮ ಆದಾಯ ಬಂದರೂ ಅದನ್ನು ಉಳಿಸಿಕೊಂಡು ಮುಂದುವರಿಯುವುದು ಕಷ್ಟವಾಗಿದೆ.

ಮೆಟ್ರೊದಲ್ಲಿ ನಿತ್ಯ 3.60 ಲಕ್ಷದಿಂದ 4 ಲಕ್ಷ ಮಂದಿ ಪ್ರಯಾಣಿಸುತ್ತಿದ್ದಾರೆ. 2019 ರ ಅಂತ್ಯಕ್ಕೆ ಈ ಸಂಖ್ಯೆ 5 ಲಕ್ಷಕ್ಕೆ ತಲುಪುವ ನಿರೀಕ್ಷೆ ಇದೆ.


ರೈಲು ಕಾರ್ಯಾಚರಣೆಯಿಂದ ಬಂದ ಆದಾಯ -2018

ಏಪ್ರಿಲ್‌-28.34 ಕೋಟಿ ರೂ.

ಮೇ-29.07 ಕೋಟಿ ರೂ.

ಜೂನ್‌-29.32 ಕೋಟಿ ರೂ.

ಜುಲೈ-30.51 ಕೋಟಿ ರೂ.