ಜಾಹೀರಾತು ನಿಷೇಧದಿಂದ ಮೆಟ್ರೊಗೆ ಆದಾಯ ಖೋತಾ

ಬೆಂಗಳೂರು: ಬಿಬಿಎಂಪಿಯ ಜಾಹೀರಾತು ನಿಷೇಧದ ಕ್ರಮದಿಂದ ಮೆಟ್ರೊಗೆ ತಿಂಗಳಿಗೆ 1 ಕೋಟಿ ರೂ. ಆದಾಯ ಖೋತಾ ಆಗಿದೆ.

ಟಿಕೆಟ್‌ ಹೊರತುಪಡಿಸಿದರೆ ಬಿಎಂಆರ್‌ಸಿಎಲ್‌ಗೆ ಜಾಹೀರಾತಿನಿಂದ ಹೆಚ್ಚು ಆದಾಯ ಬರುತ್ತಿದೆ. ಬಿಬಿಎಂಪಿಯಲ್ಲಿ ಇತ್ತೀಚೆಗೆ ಕೈಗೊಂಡ ನಿರ್ಣಯದ ಪ್ರಕಾರ ಒಂದು ವರ್ಷ ಜಾಹೀರಾತು ನಿಷೇಧಿಸಲಾಗಿದೆ. ಮೆಟ್ರೊದ ಕಂಬಗಳಲ್ಲಿ ಜಾಹೀರಾತು ಹಾಕಲಾಗುತ್ತಿದ್ದು, ಅದರಿಂದಲೇ ಪ್ರತಿ ವರ್ಷ 12ರಿಂದ 13 ಕೋಟಿ ರೂ. ಆದಾಯ ಬರುತ್ತಿತ್ತು. ಆದರೆ ಬಿಬಿಎಂಪಿಯ ನಿಷೇಧ ಕಂಬಗಳ ಮೇಲಿನ ಜಾಹೀರಾತಿಗೂ ಅನ್ವಯವಾಗುತ್ತದೆ. ಹೀಗಾಗಿ ಬಿಎಂಆರ್‌ಸಿಎಲ್‌ ಟೆಂಡರ್‌ ಆಹ್ವಾನಿಸಿಲ್ಲ.

ಬಿಬಿಎಂಪಿಯಲ್ಲಿ ಈಗ ಹೊಸ ಜಾಹೀರಾತು ನೀತಿ ರೂಪಿಸಲಾಗುತ್ತಿದೆ. ಸಾರ್ವಜನಿಕ ಸ್ಥಳಗಳಲ್ಲಿ ಜಾಹೀರಾತು ಯಾವ ಪ್ರಮಾಣದಲ್ಲಿ ಇರಬೇಕು ಎಂಬುದನ್ನು ಈ ನೀತಿ ನಿರ್ಧರಿಸಲಿದೆ. ಜಾಹೀರಾತು ಒಂದು ವರ್ಷ ನಿಷೇಧಗೊಂಡರೂ ಹೊಸ ನೀತಿಯು ಮೆಟ್ರೊ ಜಾಹೀರಾತಿಗೆ ಅವಕಾಶ ಕಲ್ಪಿಸುವ ಸಾಧ್ಯತೆ ಇದೆ. ಇದು ಬಂದ ಬಳಿಕ ನೀತಿಗೆ ಹೊಂದಾಣಿಕೆಯಾಗುವಂತಹ ನಿಯಮ ರೂಪಿಸಿ ಟೆಂಡರ್‌ ಆಹ್ವಾನಿಸಲು ಬಿಎಂಆರ್‌ಸಿಎಲ್‌ ತೀರ್ಮಾನಿಸಿದೆ.

2017-18ನೇ ಸಾಲಿನಲ್ಲಿ ಟೋಕನ್‌, ಸ್ಮಾರ್ಟ್‌ಕಾರ್ಡ್‌ನಿಂದ ಮೆಟ್ರೊಗೆ 281 ಕೋಟಿ ರೂ., ಪಾರ್ಕಿಂಗ್‌ ಲೈಸೆನ್ಸ್‌ ಮೊದಲಾದ ಮೂಲಗಳಿಂದ 43 ಕೋಟಿ ರೂ., ಜಾಹೀರಾತು ಲೈಸೆನ್ಸ್‌ನಿಂದ 13 ಕೋಟಿ ರೂ. ಆದಾಯ ಬಂದಿತ್ತು.

ಬಿಎಂಆರ್‌ಸಿಎಲ್‌ ಜಾಹೀರಾತು ಆದಾಯ

ವರ್ಷ ಆದಾಯ(ರೂ.)

2015-16 6,97,86,030

2016-17 6,57,32,976

2017-18 13,16,69,429

2018-19(ಅಕ್ಟೋಬರ್‌ವರೆಗೆ) 8,13,34,020