ಮೆಟ್ರೊ 2ನೇ ಹಂತಕ್ಕೆ ಯುರೋಪಿಯನ್‌ ಸಂಸ್ಥೆ ಹೂಡಿಕೆ, ಒಡಂಬಡಿಕೆಗೆ ಸಹಿ

ಬೆಂಗಳೂರು: ನಮ್ಮ ಮೆಟ್ರೊ 2ನೇ ಹಂತಕ್ಕೆ 500 ಮಿಲಿಯನ್‌ ಯುರೋ ಡಾಲರ್‌ ಹೂಡಿಕೆ ಮಾಡಲು ಯುರೋಪಿಯನ್‌ ಇನ್‌ವೆಸ್ಟ್‌ಮೆಂಟ್‌ ಬ್ಯಾಂಕ್‌ ಮುಂದೆ ಬಂದಿದೆ. ಈ ಪೈಕಿ 200 ಯುರೋ ಡಾಲರ್‌ ಹೂಡಿಕೆಗೆ ಸಿಎಂ ಎಚ್‌.ಡಿ.ಕುಮಾರಸ್ವಾಮಿ ಹಾಗೂ ಡಿಸಿಎಂ ಜಿ.ಪರಮೇಶ್ವರ್‌ ಸಮ್ಮುಖ ಶುಕ್ರವಾರ ಒಡಂಬಡಿಕೆ ಮಾಡಿಕೊಳ್ಳಲಾಯಿತು.

''ಮೆಟ್ರೊ 2ನೇ ಹಂತದಡಿ ಒಟ್ಟಾರೆ 26,405 ಕೋಟಿ ರೂ. ಹೂಡಿಕೆ ಮಾಡಬೇಕಿದೆ. ಈ ಪೈಕಿ 12,141 ಕೋಟಿ ರೂ. ಸಾಲ ಪಡೆದುಕೊಳ್ಳಬೇಕಿದೆ. ಇದಕ್ಕೆ ಯುರೋಪಿಯನ್‌ ಬ್ಯಾಂಕ್‌ 500 ಯುರೋ ಡಾಲರ್‌ ಒದಗಿಸುವುದರಿಂದ 3,800 ಕೋಟಿ ರೂ. ಲಭ್ಯವಾದಂತಾಗಲಿದೆ,'' ಎಂದು ಸಿಎಂ ಎಚ್‌.ಡಿ.ಕುಮಾರಸ್ವಾಮಿ ತಿಳಿಸಿದರು.

ರಾಜ್ಯದಲ್ಲಿ ಹಣಕಾಸು ಪರಿಸ್ಥಿತಿ ಉತ್ತಮವಾಗಿರುವುದರಿಂದಲೇ ಮೆಟ್ರೊ ಯೋಜನೆಗೆ ಇಷ್ಟೊಂದು ನೆರವು ನೀಡಲು ವಿದೇಶ ಸಂಸ್ಥೆ ಒಪ್ಪಿದೆ ಎಂದು ಈ ವೇಳೆ ಡಿಸಿಎಂ ಜಿ.ಪರಮೇಶ್ವರ್‌ ಹೇಳಿದರು.

ಯುರೋಪಿಯನ್‌ ಇನ್‌ವೆಸ್ಟ್‌ಮೆಂಟ್‌ ಬ್ಯಾಂಕ್‌ ನಿರ್ದೇಶಕಿ ಮರಿಯಾ , ಮುಖ್ಯ ಕಾರ್ಯದರ್ಶಿ ಟಿ.ಎಂ.ವಿಜಯ್‌ಭಾಸ್ಕರ್‌, ಬಿಎಂಆರ್‌ಸಿಎಲ್‌ ನಿರ್ದೇಶಕ ಅಜಯ್‌ ಸೇಠ್‌ ಪಾಲ್ಗೊಂಡಿದ್ದರು.