ಸೆ.9ರಿಂದ ಹಸಿರು ಮಾರ್ಗದಲ್ಲೂ ಮೆಟ್ರೊ ಸಂಚಾರ: 5 ನಿಮಿಷಕ್ಕೆ ಒಂದು ರೈಲು!

ಬೆಂಗಳೂರು: ಮೆಟ್ರೊ ಸಂಚಾರ ಪುನಾರಂಭದ ಬಳಿಕ ಎರಡನೇ ಹಂತದಲ್ಲಿ ಅಂದರೆ, ನಾಗಸಂದ್ರದಿಂದ- ಯಲಚೇನಹಳ್ಳಿ ನಡುವಿನ ಹಸಿರು ಮಾರ್ಗದಲ್ಲಿ ಬುಧವಾರದಿಂದ ಮೆಟ್ರೊ ರೈಲು ಸಂಚಾರ ಆರಂಭವಾಗಲಿದೆ.

ನೇರಳೆ ಜೊತೆಗೆ ಹಸಿರು ಮಾರ್ಗದಲ್ಲೂ ಮೆಟ್ರೊ ಸಂಚಾರ ಪುನಾರಂಭದಿಂದ ನಿತ್ಯದ ಪ್ರಯಾಣಕ್ಕೆ ಮೆಟ್ರೊ ಅವಲಂಬಿಸಿರುವ ಲಕ್ಷಾಂತರ ಪ್ರಯಾಣಿಕರಿಗೆ ಅನುಕೂಲವಾಗಲಿದೆ.

ಎಂದಿನಂತೆ ಹಸಿರು ಮಾರ್ಗದಲ್ಲೂ ಬೆಳಗ್ಗೆ 8 ರಿಂದ ರೈಲು ಸಂಚಾರ ಆರಂಭವಾಗಲಿದ್ದು, 11 ಗಂಟೆಗೆ ಕೊನೆಯ ರೈಲು ಹೊರಡಲಿದೆ. ಸಂಜೆ 4.30ಕ್ಕೆ ಮೊದಲ ರೈಲು ಮತ್ತು 7.30ಕ್ಕೆ ಕೊನೆಯ ರೈಲು ಸಂಚರಿಸಲಿದೆ.

ಬೆಂಗಳೂರಲ್ಲಿ ಏರ್‌ ಆಂಬ್ಯುಲೆನ್ಸ್‌ ಸೇವೆಗೆ ಬಿ.ಎಸ್‌. ಯಡಿಯೂರಪ್ಪ ಚಾಲನೆ!

ಸೆ.10ರವರೆಗೆ ಮಾತ್ರ ಸೀಮಿತ ಸಂಚಾರ ಆರಂಭವಾಗಲಿದ್ದು, ಸೆ.11ರಿಂದ ಬೆಳಗ್ಗೆ 7ರಿಂದ ರಾತ್ರಿ 9ರವರೆಗೆ ಎರಡೂ ಮಾರ್ಗಗಳಲ್ಲಿ ರೈಲು ಸಂಚರಿಸಲಿವೆ. ಎರಡೂ ಮಾರ್ಗಗಳಲ್ಲಿ ಮೆಟ್ರೊ ಆರಂಭವಾದರೆ ಪ್ರಯಾಣಿಕರ ಸಂಖ್ಯೆ ಹೆಚ್ಚಲಿದೆ. ಸೆ.11ರಿಂದ ಇನ್ನೂ ಹೆಚ್ಚಳವಾಗುವ ನಿರೀಕ್ಷೆ ಇದೆ. ಹೆಚ್ಚೆಚ್ಚು ಜನರಿಗೆ ಮೆಟ್ರೊ ಸಂಚಾರದ ಮಾಹಿತಿ ಸಿಗುತ್ತಿರುವ ಕಾರಣ ದಿನದಿಂದ ದಿನಕ್ಕೆ ಸಾಕಷ್ಟು ಸುಧಾರಣೆ ಕಾಣಲಿದೆ ಎಂದು ಮೆಟ್ರೊ ಅಧಿಕಾರಿಯೊಬ್ಬರು ತಿಳಿಸಿದರು.

ಮೆಟ್ರೋ ಸಂಚಾರ ಪುನರಾರಂಭ: ರೈಲಿನಲ್ಲಿ ಪ್ರಯಾಣಿಸಿ ಸುರಕ್ಷಾ ಕ್ರಮ ಪರಿಶೀಲನೆ ನಡೆಸಲಿರುವ ಶ್ರೀರಾಮುಲು

ನೇರಳೆ, ಹಸಿರು ಮಾರ್ಗದ ರೈಲು ಸಮಯ

• ಬೆಳಗ್ಗೆ 8ಕ್ಕೆ ಮೊದಲ ರೈಲು- 11 ಗಂಟೆಗೆ ಕೊನೆಯ ರೈಲು
• ಸಂಜೆ 4.30ಕ್ಕೆ ಮೊದಲ ರೈಲು- 7.30ಕ್ಕೆ ಕೊನೆಯ ರೈಲು

ಪ್ರಯಾಣಿಕರ ಸಂಖ್ಯೆಯಲ್ಲಿ ಏರಿಕೆ
ಸಂಚಾರ ಪುನರಾರಂಭದ 2ನೇ ದಿನವಾದ ಮಂಗಳವಾರ ಬೆಳಗ್ಗಿನ ಅವಧಿಯಲ್ಲಿ ಮೆಟ್ರೊ ರೈಲಿನಲ್ಲಿ 2409 ಜನ ಪ್ರಯಾಣಿಸಿದ್ದಾರೆ.