ಟೆರೇಸ್ ಗಾರ್ಡನಲ್ಲಿ ಮೈಕ್ರೋಗ್ರೀನ್ಸ್
ತಾರಸಿ ತೋಟದಲ್ಲಿ ಈವರೆಗೆ ಸೊಪ್ಪು, ತರಕಾರಿ, ಹೂವುಗಳನ್ನು ಬೆಳೆಯುತ್ತಿದ್ದ ನಗರದ ಜನ, ಇದೀಗ ಮೈಕ್ರೊ ಗ್ರೀನ್ಸ್ (ಮೊಳಕೆ ಸಸಿಗಳು) ಬೆಳೆಯತ್ತ ಒಲವು ತೋರುತ್ತಿದ್ದಾರೆ.
ಎಚ್.ಪಿ.ಪುಣ್ಯವತಿ
ಬೆಂಗಳೂರು: ತಾರಸಿ ತೋಟದಲ್ಲಿ ಈವರೆಗೆ ಸೊಪ್ಪು, ತರಕಾರಿ, ಹೂವುಗಳನ್ನು ಬೆಳೆಯುತ್ತಿದ್ದ ನಗರದ ಜನ, ಇದೀಗ ಮೈಕ್ರೊ ಗ್ರೀನ್ಸ್ (ಮೊಳಕೆ ಸಸಿಗಳು) ಬೆಳೆಯತ್ತ ಒಲವು ತೋರುತ್ತಿದ್ದಾರೆ.
ಮೈಕ್ರೋ ಗ್ರೀನ್ಸ್, ಮೊಳಕೆ ಕಾಳುಗಳಿಗಂತಲೂ ಹೆಚ್ಚು ಪೌಷ್ಟಿಕವಾದದು. ಹೀಗಾಗಿ ನಗರದ ಜನ ಪಾಟ್ಗಳಲ್ಲೇ ಮೈಕ್ರೊ ಗ್ರೀನ್ಸ್ಗಳನ್ನು ಬೆಳೆದು ಅದನ್ನು ಸೇವಿಸಲು ಆರಂಭಿಸಿದ್ದಾರೆ. ಸ್ಟಾರ್ ಹೋಟೆಲ್ಗಳಲ್ಲಿ ಕೂಡ ಮೈಕ್ರೊ ಗ್ರೀನ್ಸ್ಗೆ ಹೆಚ್ಚು ಬೇಡಿಕೆಯಿದೆ. ಹೀಗಾಗಿ ಈ ಬೆಳೆ ನಿಧಾನವಾಗಿ ಜನಪ್ರಿಯತೆ ಪಡೆದುಕೊಳ್ಳುತ್ತಾ ಸಾಗುತ್ತಿದೆ.
ಜಯನಗರ 5ನೇ ಬ್ಲಾಕ್, 9ನೇ ಮುಖ್ಯರಸ್ತೆಯಲ್ಲಿರುವ ಎಂಜಿನಿಯರ್ ವಿಜಯ್ ಸತೀಶ್ ಅವರು ತಮ್ಮ ಮನೆಯಲ್ಲಿ ಪಾಟ್ಗಳಲ್ಲಿ ಈ ಮೈಕ್ರೊ ಗ್ರೀನ್ಸ್ ಬೆಳೆದುಕೊಳ್ಳುತ್ತಾರೆ. ಅದೇ ರೀತಿ ನಗರದ ನಾನಾ ಮಂದಿ ಪಾಟ್ಗಳಲ್ಲಿ ಇದನ್ನು ಬೆಳೆದು ಬಳಸುತ್ತಿದ್ದಾರೆ. ''ಲಭ್ಯವಿರುವ ಸಸ್ಯಗಳ ಬೀಜಗಳನ್ನು ಪುಟ್ಟ ಟ್ರೇಗಳಲ್ಲಿ ಬಿತ್ತಿ, ತೇವಾಂಶ ಕಾಪಾಡಿಕೊಂಡರೆ, ಮನೆಗಳ ಕಿಟಕಿ ಪಟ್ಟಿಗಳ ಮೇಲೆ, ಗ್ಯಾಲರಿಗಳಲ್ಲಿ ಪುಟ್ಟ ಗಾರ್ಡನ್ ಮಾಡಲು ಇವು ಅನುಕೂಲಕರ,'' ಎನ್ನುತ್ತಾರೆ ವಿಜಯ್ ಸತೀಶ್.
ಖರ್ಚು ಹೆಚ್ಚಿಲ್ಲ. ಬೆಳೆಯುವ ವಿಧಾನವೂ ಸರಳ. ಅಲ್ಲದೆ ಬಿತ್ತಿದ ಒಂದೇ ವಾರದಲ್ಲಿ ತಿನ್ನಲು ಸಿಗುತ್ತದೆ. ಅಂದ ಹಾಗೆ ಇದನ್ನು ಬೇಯಿಸಬೇಕಾದ ರಗಳೆಯೂ ಇಲ್ಲ. ಸ್ವಲ್ಪ ಪ್ರಮಾಣದಲ್ಲಿ ತಿಂದರೂ ಸಾಕು. ಆಯಾಸ, ಸುಸ್ತು ನಿವಾರಣೆಯಾಗುತ್ತದೆ.
ಮೈಕ್ರೋಗ್ರೀನ್ಸ್ ಮಾಡುವ ಬೀಜಗಳಾವು: ಸಾಸಿವೆ ಕಾಳು, ಮೆಂತ್ಯ, ಬಿಳಿ ಸಾಸಿವೆ, ಮೂಲಂಗಿ, ಬೀಟ್ಧಿರೂಧಿಟ್, ಈರುಳ್ಳಿ, ಎಲೆಕೋಸು, ಹುರುಳಿ, ಗೋಧಿ, ಧನಿಯಾ, ಪಾಲಕ್, ದಂಟು, ಸಬ್ಬಸಿಗೆ, ಕಡ್ಲೆಬೀಜ, ಕಡ್ಲೆಕಾಳು ಹೀಗೆ ನಾನಾ ಬಗೆಯ ಬೀಜಧಿಗಧಿಳನ್ನು ಬಿತ್ತಿ, ಮೈಕ್ರೊ ಗ್ರೀನ್ಸ್ ಮಾಡಬಹುದು.
ಬೆಳೆಯುವುದು ಹೇಗೆ?: ಎರಡರಿಂದ ಮೂರಿಂಚು ಆಳವಿರುವ ಯಾವುದೇ ಟ್ರೇ/ಪಾತ್ರೆ, ಪ್ಲಾಸ್ಟಿಕ್ ಕಂಟೈನರ್ಗಳಲ್ಲಿ ಮಣ್ಣು, ಗೊಬ್ಬರ ತುಂಬಿಸಿ ನೀರು ಹಾಕಿ ಮಣ್ಣನ್ನು ಹದಗೊಳಿಸಬೇಕು. ಬಳಿಕ ಅದಕ್ಕೆ ಬೀಜಗಳನ್ನು ಸೇರಿಸಿದರೆ ಸಾಕು. ನಿತ್ಯವೂ ಬೆಳಗ್ಗೆ-ಸಂಜೆ ನೀರು ಸಿಂಪಡಿಸಬೇಕು. ಬಿತ್ತಿದ ಒಂದೇ ವಾರದಲ್ಲಿ ಎರಡೆಲೆ ತಳೆದು, ಸುಮಾರು ಮೂರಿಂಚು ಬೆಳೆದಾಗ ಕೊಯ್ಲಿಗೆ ಉತ್ತಮ ಸಮಯ.
ಡಯೆಟ್ ಪ್ರಿಯರಿಗೆ ಉತ್ತಮ ಆಯ್ಕೆ: ಇತ್ತೀಚೆಗೆ ಜನ ಮೊಳಕೆ ಸಸಿಗಳ ಬಳಕೆಯತ್ತ ಆಸಕ್ತರಾಗಿದ್ದಾರೆ. 1980ರ ವೇಳೆಯಲ್ಲೇ ಅಮೆರಿಕದ ವೈಭವೋಪೇತ ಹೋಟೆಲ್ ಮೆನುಗಳಲ್ಲಿ ರಾರಾಜಿಸುತ್ತಿದ್ದ ಈ ಮೊಳಕೆ ಸಸಿಗಳು, ಸಲಾಡ್, ಸ್ಯಾಂಡ್ವಿಚ್ ಮೊದಲಾದ ತಿನಿಸುಗಳ ಅಂದ ಹಾಗೂ ರುಚಿಯನ್ನು ಹೆಚ್ಚಿಸಲು ಬಳಕೆಯಾಗುತ್ತಿತ್ತು. ಇದೀಗ ಹಲವು ಬಗೆಯ ಮೈಕ್ರೊ ಗ್ರೀನ್ಸ್ಗಳ ಮೇಲೆ ಸಂಶೋಧನೆ ನಡೆಸಲಾಗಿದ್ದು, ಅವುಗಳಲ್ಲಿ ಅಡಗಿದ ಅಗಾಧ ಪೌಷ್ಟಿಕ ಸಂಪತ್ತೂ ಕೂಡ ಬೆಳಕಿಗೆ ಬಂದಿದೆ. ವಿಟಮಿನ್ ಸಿ, ಇ, ಎ, ಕೆ ಮುಂತಾದವುಗಳು ಹೇರಳವಾಗಿರುವುದು ಪತ್ತೆಯಾಗಿದೆ.
ಆಹಾರ ತಜ್ಞರು ಏನಂತಾರೆ: ನೀರು, ಮಣ್ಣಿನ ಸತ್ವಗಳನ್ನು ಹೀರಿಕೊಂಡು ಮತ್ತೊಂದು ಜೀವಕ್ಕೆ ಮುಂದಡಿಯಿಡುವುರಿಂದ ಪೌಷ್ಟಿಕಾಂಶದ ಸಾಂದ್ರತೆ ಹೆಚ್ಚಿರುತ್ತದೆ. ಹೀಗಾಗಿ ಇದರಲ್ಲಿ ಜೀವ ಸತ್ವಗಳು, ಖನಿಜ ಮತ್ತು ಕಿಣ್ವಗಳನ್ನು ಯಥೇಚ್ಛವಾಗಿರುತ್ತವೆ. ಲಘು ಪೋಷಕಾಂಶಗಳನ್ನು ಪಡೆಯಲು ಮೈಕ್ರೋ ಗ್ರೀನ್ಸ್ ಬಳಸಬಹುದು. ಏಕದಳ ಧಾನ್ಯದ ಮೊಳಕೆ ಸಸಿಗಳಲ್ಲಿ (ಸಸಿ ಹೊಡೆದು, ನೀರು ತುಂಬಿಕೊಂಡಿರುತ್ತದೆ) 100 ಗ್ರಾಂನಲ್ಲಿ ಶೇ.2-3ರಷ್ಟು ಪ್ರೋಟೀನ್ ಅಂಶವಿರುತ್ತದೆ. ಬೇಳೆ ಕಾಳು ದ್ವಿದಳ ಧಾನ್ಯ, ಎಣ್ಣೆಕಾಳುಗಳಲ್ಲಿ 100 ಗ್ರಾಂನಲ್ಲಿ ಶೇ. 10-12ರಷ್ಟು ಪ್ರೋಟೀನ್ ಇರುತ್ತದೆ. ಹೀಗಾಗಿ ಒಬ್ಬ ವ್ಯಕ್ತಿ ದಿನಕ್ಕೆ 50 ಗ್ರಾಂ ಮಿತಿಯಲ್ಲಿ ತಿಂದರೆ ಸಾಕು.
-ಕೆ.ಸಿ. ರೆಡ್ಡಿ, ಆಹಾರ ತಜ್ಞರು